Esdras 9:1-15
9 Ne despué de bínidu ca cosa riʼ, bidxiña ca príncipe que ra nuaaʼ ne gúdxicaʼ naa: «Caʼruʼ guixeleʼ guidxi Israel, ca sacerdote ne ca levita de ca guidxi ni nabeza gaxha ne qué huasaana de gúnicabe ca cosa yuudxuʼ rúnicaʼ. Caʼruʼ gusaana de gúnicabe ca cosa ni runi ca cananeu, ca hitita, ca perizita, ca jebuseu, ca ammonita, ca moabita, ca egipciu ne ca amorreu.
2 Purtiʼ laacabe ne ca xiiñicabe maʼ bichaganácabe ca gunaa de ca guidxi riʼ. Neca nácacabe ti guidxi ni maʼ bireechú para Dios, maʼ biúʼchacabe ca binni de ca guidxi riʼ. Dede né ca príncipe ne ca xaíque guidxi primeca laacaʼ maʼ bicheenecaʼ Dios».
3 Ora binadiagaʼ ndiʼ, guchezaʼ lari ni nacuaʼ xagueteʼ ne lari ziuulaʼ sin manga stinneʼ, guxhaʼ guicha iqueʼ ne guicha ruaaʼ, gurieeʼ taʼyaʼ ne qué guirá guidxagayaaʼ ni guníʼcabe que.
4 Ne, pur pecadu ni biʼniʼ ca ni biguetaʼ de Babilonia, bidxiña guiráʼ ca ni nabé runi respetar* stiidxaʼ Dios stiʼ Israel ra nuaaʼ. Ne de tantu qué guirá guidxagayaaʼ, biaanaʼ zubaʼ raqué dede ora rudiicabe ofrenda de biidxiʼ ni rudiicabe huadxí.
5 Ne ora bedandá hora rudiicabe ofrenda de biidxiʼ ni rudiicabe huadxí, biasaʼ de ra zubaʼ triste que. Ne, interu nareza ca xhabaʼ,* biabaʼ layú ne bizuxibeʼ, gundisanaʼyaʼ nezalú Jehová Dios stinneʼ.
6 Ne gunieeʼ «Dios stinneʼ, guizáʼ catuí luaʼ dede que gapaʼ cara guindisaluaʼ nezaluluʼ,* Dios stinneʼ. Guizáʼ maʼ stale donda dxiʼbaʼ íquedu purtiʼ guizáʼ maʼ bicheʼdu, ne maʼ bidale donda stidu dede maʼ yendácani guibáʼ.
7 Dede ca dxi bibani ca bixhozebiidadu* hasta nagasi guizáʼ maʼ nuadu donda, ne pur ca donda stidu, cásica laadu, ca rey stidu ne ca sacerdote stidu huayábadu lu náʼ ca rey stiʼ xcaadxi guidxi. Huayuuticabe ca binni xquídxidu né espada, huabeecabe laadu de xquídxidu, huabáʼnacabe stidu ne huasituícabe ludu, ne dede yanna cayácani zacá.
8 Peru neca ti tiempuhuiiniʼ maʼ bisihuínniluʼ nacháʼhuiluʼ né laadu Jehová, Dios stidu. Maʼ bidiiluʼ lugar guxoñelú caadxi de laadu ne maʼ bidiiluʼ laadu ti lugar ra zanda chuʼdu seguru,* ndaaniʼ ti lugar ni maʼ guliluʼ ti zacá guzaaniʼ ludu de guendanayecheʼ, Dios stidu, ne gudxiguétaluʼ laadu caadxi stipa yanna purtiʼ nácarudu esclavu.
9 Purtiʼ, neca nácadu esclavu, peru lii, Dios stidu, qué huayuu dxi gusaanaluʼ laadu biaʼ tiempu huayácadu esclavu. Maʼ bisihuínniluʼ guizáʼ nadxiiluʼ laadu ne maʼ biniibiluʼ ladxidóʼ ca rey stiʼ Persia para gacanecaʼ laadu. Zacá nga guluuluʼ gana laadu para guindísadu lídxiluʼ ne para guni chaahuidu guiráʼ ra gucanani, ne maʼ bidiiluʼ laadu ti muru de guié* ndaaniʼ guidxi Judá ne Jerusalén.
10 »Yanna, despué de guiráʼ ndiʼ, ¿xii ndiʼ zanda gábidu lii, Dios stidu? Maʼ cadi zinándadu ca mandamientu stiluʼ,
11 ca ni gunábaluʼ ca profeta stiluʼ gudiicaʼ laadu. Gúdxiluʼ laadu: “Nabiidiʼ ca guidxi ra chichuutu ca, purtiʼ nabiidiʼ ca binni de ca guidxi ca pur guiráʼ cosa yuudxuʼ rúnicaʼ. Ne maʼ biʼniʼ biidicabe layú riʼ de punta punta.
12 Nga runi cadi gucheelatu ca xiiñidxaapatu ca xiiñicabe ne cadi guicaatu ca xiiñidxaapacabe para guichaganacaʼ ca xiiñitu. Ne qué chuʼ dxi gacanetu laacabe gápacabe guendariuudxí ne guibánicabe galán. Zacatiʼ zácatu ti guidxi nadipaʼ, ne zoto* ca cosa galán ni rudii lu ca layú riʼ ne zusaananetu layú riʼ ca xiiñitu casi herencia para guibánicabe luni xadxí”.
13 Ne despué de guiráʼ ni huazaacadu pur ca cosa ni cadi jneza huayúnidu ne guiráʼ donda stidu —peru lii, Dios stidu, qué huayuni tratarluʼ laadu casi runi merecerdu neca maʼ bicheʼdu, lugar de nga maʼ bidiiluʼ lugar guxoñeludu, guiráʼ ca ni nuudu raríʼ—,
14 ¿ñee zusaana de chinándadu ca mandamientu stiluʼ sti biaje ne zuchéʼladu ca xiiñidu ca binni ni runi ca cosa yuudxuʼ riʼ la? ¿Cadi dxandíʼ guizáʼ nidxiichineluʼ laadu dede nunduuxeluʼ guiráʼ xixedu ne nin tobi qué nilá la?
15 Jehová, Dios stiʼ Israel, nácaluʼ ti Dios ni runi ni jneza, purtiʼ maʼ bidiiluʼ lugar guibani caadxi de laadu dede ca dxi riʼ. Neca zacá zuhuaʼdu nezaluluʼ né donda stidu, purtiʼ qué gápadidu derechu guzuhuaʼdu nezaluluʼ despué de ni maʼ bínidu».
