Esdras 6:1-22
6 Ngue runi biʼniʼ mandar rey Darío gaca investigar ra nuu ca documentu* stiʼ Babilonia, ra riaapaʼ ca tesoro que.
2 Ne bidxélacabe ti rollo ndaaniʼ yoo naroʼbaʼ ne naguidxi nuu Ecbátana, tobi de ca guidxi stiʼ Media. Lu rollo que cá ni biʼniʼ mandar rey que, nani:
3 «Lu primé iza de cayuni mandar rey Ciro, gulee rey riʼ ti orden para gucuícabe lidxi Dios Jerusalén. “Naquiiñeʼ guibiguetaʼ gucuí ca judíu yoo ca para ganda gúnicabe sacrificiu raqué, ne quíxhecabe ca base stini. Naquiiñeʼ gapa yoo ca 60 codo* de nasoo ne 60 codo de xilaga.*
4 Zápani chonna elada guié ne ti línea de puru yaga. Xcuenta rey quixe guiráʼ gastu gúnicabe.
5 Laaca naquiiñeʼ gudxiguétacabe guiráʼ traste de oro ne de plata ni riquiiñeʼ ra lidxi Dios, ca ni gulee Nabucodonosor de ndaaniʼ templu stiʼ Jerusalén ne bedané cani Babilonia. Ne naquiiñeʼ gudxiguétacabe cani xlugárcani ndaaniʼ templu stiʼ Jerusalén ne guiaanacani ra lidxi Dios”».
6 «Nga runi, Tatenái —gobernador stiʼ ca guidxi ni nuu ladu riaaziʼ gubidxa de guiiguʼ Éufrates—, Setar-Bozenái ne ca xcompañérutu —ca gobernador ni qué gapa peʼ autoridad stiʼ ca guidxi ni nuu ladu riaaziʼ gubidxa de guiiguʼ Éufrates—, canabaʼ laatu cadi chiguzuhuaatu racá.
7 Qué chiguchiiñatu ca ni cayuni dxiiñaʼ ra lidxi Dios. Zabiguetaʼ zucuí gobernador stiʼ ca judíu ne ca hombre huaniisi* nuu ládecabe lidxi Dios ra guyuuni dxiqué.
8 Ne para ganda gacanetu ca hombre huaniisi ni nuu lade ca judíu guibiguetaʼ gucuicaʼ lidxi Dios, cayuneʼ mandar laatu gúnitu ndiʼ: para cadi guiaanadxí dxiiñaʼ ca, nagueendaca naquiiñeʼ quíxetu laacabe ca gastu cayúnicabe, lacuee ni lade ca tesoro stiʼ rey ni reeda de ca impuestu ni riguixe ca guidxi ni nuu ladu riaaziʼ gubidxa de guiiguʼ Éufrates.
9 Ne guiráʼ dxi naquiiñeʼ gudiitu ca sacerdote ni nuu Jerusalén ni guinábacaʼ, intiica cosa ni iquiiñecaʼ: torohuiiniʼ, dendxuʼ barracu ne dendxuhuiiniʼ para ca ofrenda ni riaʼquiʼ ni gudiicabe Dios ni nuu guibáʼ, zaqueca trigu, zidi, vinu ne aceite.
10 Ti zacá siempre gudiicabe ofrenda ni chuulaʼdxiʼ Dios ni nuu guibáʼ ne guni orárcabe para chuʼ rey ne ca xiiñiʼ nazaaca.
11 Laaca maʼ bineʼ mandar guiree orden riʼ: pa tuuxa qué naʼ guni ni cayuneʼ mandar riʼ la? napa xidé gáxhacabe ti yaga napa lídxibe ne guindísacabe laabe para gucaacabe* laabe luni. Naquiiñeʼ gúnicabe lídxibe bañu para cheʼ binni* pur qué ninabe nuzuubabe stiidxaʼ rey.
12 Ne Dios ni maʼ gudixhe guisaca lá racá* gunitilú tutiica rey o guidxi ni qué gulabi ni cayuneʼ mandar riʼ ne gunitilú lidxi Dios, ni nuu Jerusalén. Naa, Darío, naa nga cayuneʼ mandar ni. Ne naquiiñeʼ gácani nagueendaca».
13 Ngue runi nagueendaca biʼniʼ Tatenái —gobernador stiʼ ca guidxi ni nuu ladu riaaziʼ gubidxa de guiiguʼ Éufrates—, Setar-Bozenái ne ca xcompañérucaʼ guiráʼ ni biʼniʼ mandar rey Darío.
14 Guizáʼ guyuu ca hombre huaniisi ni nuu lade ca judíu que gana pur ca profecía ni guníʼ profeta Ageo ne Zacarías —xnietu Idó—, qué nusaanacabe de ñúnicabe dxiiñaʼ dede ra biluxe yoo que. Ne bilúxecabe ni casi biʼniʼ mandar Dios stiʼ Israel, ne casi biʼniʼ mandar Ciro, Darío ne Artajerjes, rey stiʼ Persia.
15 Bilúxecabe yoo que lu guionna gubidxa stiʼ beeu adar, dxi mayaca gusaa Darío xhoopaʼ iza de cayuni mandar.
16 Ngue runi guiráʼ ca israelita, ca sacerdote, ca levita ne xcaadxi de ca binni ni guleza Babilonia né stale guendanayecheʼ biʼniʼ inaugurarcaʼ* lidxi Dios.
17 Dxi guca inaugurar lidxi Dios bidiicabe ti gayuaa toro, chupa gayuaa dendxuʼ barracu, tapa gayuaa dendxuhuiiniʼ ne, bidiicabe para ofrenda pur pecadu stiʼ guidubi guidxi Israel, 12 chivu barracu, biaʼ ca tribu stiʼ Israel.
18 Ne gudixhe chaahuicabe ca sacerdote ne ca levita que pur grupu para gúnicaʼ xhiiñaʼ Dios casi cá ni lu libru stiʼ Moisés.
19 Biʼniʼ ca ni biguetaʼ de Babilonia que Pascua 14 stiʼ primé beeu que.
20 Guiráʼ ca sacerdote ne ca levita que nayacaʼ,* purtiʼ guirácabe bisiácabe laacabe. Ngue runi biiticabe ti maniʼ para sacrificiu stiʼ Pascua que pur guiráʼ binni ni beeda de Babilonia, pur xcaadxi sacerdote ne pur laacabe.
21 Despué gudó ca israelita ni biguetaʼ de Babilonia sacrificiu que. Gudonécabe ni guiráʼ ca binni ni guyuu ládecabe, ni bisaana ca cosa yuudxuʼ ni runi xcaadxi guidxi ni nuu lu ca layú que, para guni adorarcaʼ* Jehová, Dios stiʼ Israel.
22 Laaca bíʼnicabe né stale guendanayecheʼ Saa stiʼ ca Pan Sin Levadura gadxe gubidxa, purtiʼ bichá tipa Jehová ladxidóʼcabe de guendanayecheʼ ne purtiʼ bicaabe rey stiʼ Asiria chuʼ pur laacabe ne gacané laacabe cuí lidxi Dios ni dxandíʼ, Dios stiʼ Israel.
