Esdras 8:1-36
8 Ndiʼ nga ca xaíque stiʼ ca familia* ni bireené naa de Babilonia, dxi cayuni mandar rey Artajerjes ne ndiʼ nga registru stícabe pur familia:
2 de ca xiiñiʼ Finehás la? biree Guersom; de ca xiiñiʼ Itamar la? Daniel; de ca xiiñiʼ David la? Hatús;
3 de lade ca xiiñiʼ Secanías, ni zeeda de lade ca xiiñiʼ Parós la? Zacarías né ti gayuaa cincuenta hombre ni gucuá lá;
4 de ca xiiñiʼ Pahat-Moab la? Elieho-Enái xiiñiʼ Zerahías, né chupa gayuaa hombre;
5 de ca xiiñiʼ Zatú la? Secanías xiiñiʼ Jahaziel, né chonna gayuaa hombre;
6 de ca xiiñiʼ Adín la? Ébed xiiñiʼ Jonatán né cincuenta hombre;
7 de ca xiiñiʼ Elam la? Jesayá xiiñiʼ Atalía, né setenta hombre;
8 de ca xiiñiʼ Sefatías la? Zebadías xiiñiʼ Miguel, né ochenta hombre;
9 de ca xiiñiʼ Joab la? Abdías xiiñiʼ Jehiel, né chupa gayuaa dieciocho hombre;
10 de ca xiiñiʼ Baní la? Selomit xiiñiʼ Josifías, né ti gayuaa sesenta hombre;
11 de ca xiiñiʼ Bebái la? Zacarías xiiñiʼ Bebái, né veintiocho hombre;
12 de ca xiiñiʼ Azgad la? Johanán xiiñiʼ Hacatán, né ti gayuaa chii hombre;
13 de ca xiiñiʼ Adonicam la? Elifélet, Jeiel ne Semaya, né sesenta hombre, laacabe nga ca últimu ni biguetaʼ;
14 ne de ca xiiñiʼ Bigvái la? Utái ne Zabbud, né setenta hombre.
15 Bichiñaʼ laacabe guriá guiiguʼ ni rindá Ahavá ne gudíxhedu campamentu stidu raqué chonna gubidxa. Peru, ora biyubeʼ lade ca binni que ne lade ca sacerdote, qué nidxelaʼ nin ti levita.
16 Ngue runi bisendacaaʼ ca xaíque riʼ: Eliezer, Ariel, Semaya, Elnatán, Jarib, Elnatán, Natán, Zacarías ne Mesulam, ne ca maestru riʼ: Joiarib ne Elnatán.
17 Ne biseendaʼ laacabe chiguiniʼnécabe Idó, xaíque stiʼ ti lugar láʼ Casifía. Gudxeʼ laacabe guinábacabe Idó ne ca biʼchiʼ, —ca ni runi dxiiñaʼ ra templu* ni nuu Casifía— guedanecaʼ hombre para guni dxiiñaʼ ndaaniʼ lidxi Dios stidu.
18 Cumu nachaʼhuiʼ Dios ne bidiináʼ laadu la? bedanécabe Serebías ra nuudu —ti hombre nuu xpiaaniʼ ni zeeda de ca xiiñiʼ Mahlí, xnietu Leví, xiiñiʼ Israel—, laaca bedanécabe ca xiiñiʼ ne ca biʼchiʼ. Biaʼsi 18 hombre.
19 Laaca bedanécabe Hasabías ne Jesayá, ca ni zeeda de ca merarita, ne ca bíʼchicaʼ ne ca xiiñicaʼ. Biaʼsi gande hombre.
20 Ne chupa gayuaa gande hombre ni runi dxiiñaʼ ra templu,* ca ni gulí David ne ca príncipe para gacanecaʼ ca levita. Guirácabe gucuá lácabe lu registru.
21 Para bineʼ mandar gaca ti ayuno* raqué, guriá guiiguʼ Ahavá, para gusihuínnidu nácadu humilde nezalú Dios stidu ne guinábadu laabe gacanebe laadu lu viaje ra chinedu ca xiiñidu ne ca cosa stidu.
22 Bituí luaʼ ninabaʼ rey que nudii laadu soldadu ne hombre ni riguiʼbaʼ caballu para ñápacaʼ laadu de ca enemigu stidu neza ziuudu, purtiʼ maʼ gúdxidu laabe: «Nachaʼhuiʼ Dios stidu ne rudiinabe guiráʼ ca ni ruyubi laabe, peru riaba stipa ne xiana stibe luguiáʼ ca ni rusaana laabe».
23 Ngue runi biʼniʼ ayunardu ne guizáʼ gunábadu Dios stidu gacané laadu, ne bicaadiágabe laadu.
24 Despué guleechuaʼ 12 xaíque stiʼ ca sacerdote: Serebías ne Hasabías, ne chii bíʼchicaʼ.
25 Ne guluaabiaʼyaʼ plata, oro ne ca cosa ni biʼniʼ donar rey que, ne ni biʼniʼ donar ca hombre ni rudii conseju laa, ca príncipe ne guiráʼ ca israelita nuu raqué para ra lidxi Dios stidu.
26 Guluaabiaʼyaʼ ne bidieeʼ laacabe xhoopaʼ gayuaa cincuenta talentu* de plata, ti gayuaa traste de plata ni risaca chupa talentu, ti gayuaa talentu de oro,
27 gande tazónhuiiniʼ de oro ni risaca ti mil dárico* ne chupa traste de cobre de ni jma galán, color naxiñáʼ dede ruzaaniʼ, ni rusisácacabe casi risaca oro.
28 De raqué gudxeʼ laacabe: «Nácatu santo* para Jehová, ne ca traste riʼ laaca nácacani santo, ne plata ne oro riʼ nácacani ti ofrenda ni biale de laacabe gudiicabe Jehová, Dios stiʼ ca bixhozebiidatu.*
29 Lagapa chaahuiʼ cani dede ora chindatu Jerusalén ne cuʼbiaʼtu cani nezalú ca xaíque stiʼ ca sacerdote, ca levita ne ca príncipe stiʼ ca familia stiʼ Israel ndaaniʼ ca cuartu ni nuu ra lidxi Jehová».
30 Para gucuaa ca sacerdote ne ca levita que ca plata, oro ne ca traste ni guyuubiaʼ que para chiné cani Jerusalén, ra lidxi Dios stidu.
31 Bedandá dxi bireʼdu de guriá guiiguʼ Ahavá 12 stiʼ primé beeu que ne ziuudu Jerusalén. Qué nusaana Dios stidu laadu ne guidubi neza gúpabe laadu de ca enemigu stidu ne nin ti gubaanaʼ qué niree ludu.
32 De raqué yendadu Jerusalén ne biaanadu raqué chonna gubidxa.
33 Ne ra guidapa gubidxa que guluʼbiaʼdu plata, oro ne ca traste que ra lidxi Dios stidu ne bidiʼdu cani sacerdote Meremot xiiñiʼ Uriya, nezalú Eleazar xiiñiʼ Finehás ne ca levita riʼ: Jozabad xiiñiʼ Jesuá ne Noadías xiiñiʼ Binuí.
34 Bigábacabe guirácani, guluubiáʼcabe ne bicaacabe pabiáʼ gunaa guirani.
35 Ne guiráʼ ca ni guleza Babilonia ne biguetaʼ de raqué bidiicaʼ sacrificiu ni riaʼquiʼ para Dios stiʼ Israel: 12 toro pur guidubi naca guidxi Israel, 96 dendxuʼ barracu, 77 dendxuhuiiniʼ, ne para ofrenda pur pecadu la? bidiicabe 12 chivu barracu. Guiráʼ ndiʼ bidiicabe casi ofrenda ni riaʼquiʼ para Jehová.
36 Despué bidiʼdu ca orden ni gulee rey que ca xaíque stiʼ ca gobernador* ne ca gobernador stiʼ ca guidxi ni nuu ladu riaaziʼ gubidxa de guiiguʼ Éufrates, ne gucanécabe guidxi que ne bidiicabe guiráʼ ni iquiiñeʼ para lidxi Dios ni dxandíʼ.
Nota
^ O «ca xaíque familia neza bixhózecaʼ».
^ O «ca netineu». Lit. «ca ni guca entregar».
^ O «ca netineu». Lit. «ca ni guca entregar».
^ O «cadi go binni gastiʼ».
^ Ti talentu nga 34.2 kg. Biiyaʼ apén. B14.
^ Ti dárico nga ti moneda de oro stiʼ ca persa. Biiyaʼ apén. B14.
^ O «ca familia stitu ni bibani dxiqué».
^ O «ca sátrapa». Sicaríʼ nga rábicabe ca gobernador stiʼ ca guidxi ra runi mandar imperiu stiʼ ca persa, ne riniʼni “ca ni rapa ti reinu”.
