Esdras 4:1-24
4 Gunna ca enemigu stiʼ Judá ne Benjamín maʼ cucuí ca judíu ni biguetaʼ de Babilonia que ti templu para Jehová, Dios stiʼ Israel.
2 Ngue runi nagueendaca guyécabe ra nuu Zorobabel ne ra nuu ca xaíque familia que ne gúdxicabe laacaʼ: «Lagudii lugar guninedu laatu dxiiñaʼ. Laadu laaca runi adorardu* Dios stitu ne huadiʼduʼ laabe sacrificiu dede tiempu biʼniʼ mandar Esar-Hadón, rey stiʼ Asiria, ni bedané laadu lugar riʼ».
3 Peru ndiʼ nga ni bicabi Zorobabel, Jesúa ne xcaadxi de ca xaíque familia stiʼ Israel: «Qué zucuinéditu laadu ti yoo para Dios stidu. Laasidu chigucuidu ti yoo para Jehová, Dios stiʼ Israel, casi biʼniʼ mandar Ciro, rey stiʼ Persia, laadu».
4 Para bizulú guiráʼ ca binni ni nabeza gaxha que cuchíbicaʼ ca judíu para guireecaʼ gana ne maʼ cadi gucuicaʼ yoo que.
5 Ne gudíxecaʼ caadxi hombre ni rudii conseju para gucueeza ni naguixhe íquecabe gúnicabe, ne zaqué bíʼnicabe biaʼ tiempu biʼniʼ mandar Ciro, rey stiʼ Persia, hasta dxi bizulú biʼniʼ mandar Darío, rey stiʼ Persia.
6 Ra bizulú biʼniʼ mandar rey Asuero, bicaacabe ti carta para guindísacabe falsu luguiáʼ ca binni de Judá ne Jerusalén.
7 Ne ca dxi cayuni mandar Artajerjes, rey stiʼ Persia, bicaa Bislam, Mitrídates ne Tabeel ne xcaadxi xcompañeru ti carta ra nuu rey Artajerjes. Bitiixhicabe ni lu diidxaʼ arameu ne bicaacabe ni né letra arameu.*
8 * Rehúm —ti hombre ni jma napa autoridad stiʼ gobiernu—* ne escriba Simsái, bicaacaʼ carta riʼ ra nuu rey Artajerjes para guiniʼcaʼ mal de ca binni de Jerusalén.
9 (Ca ni bicaa carta riʼ nga Rehúm —hombre ni jma napa autoridad stiʼ gobiernu—, Simsái escriba que, ne xcaadxi de ca xcompañeru, ca juez, ca gobernador ni qué gapa peʼ autoridad, ca secretariu, guidxi Erec, ca babilonio, ca binni nabeza Susa —laca laacabe nga ca elamita—
10 ne xcaadxi guidxi ni yené Asnapar, ti hombre risaca ne de respetu, ndaaniʼ ca guidxi stiʼ Samaria, ne xcaadxi binni ni nabeza ndaaniʼ ca guidxi ni nuu ladu riaaziʼ gubidxa de guiiguʼ Éufrates.*
11 Ndiʼ nga ti copia stiʼ carta ni biseendacabe).
«Para rey Artajerjes, ni biseendaʼ ca mozo stiluʼ, ca hombre nabeza ndaaniʼ ca guidxi ni nuu ladu riaaziʼ gubidxa de guiiguʼ Éufrates:
12 Nuudu gábidu lii, rey, ca judíu ni biree de ra nuuluʼ para gueedacaʼ neza ra nuudu maʼ bedandácabe Jerusalén. Sti biaje candísacabe guidxi ni qué ruzuubaʼ diidxaʼ ne qué iquiiñeʼ que, cusaacabe ca muru stini ne cayuni chaahuicabe ca base stini.
13 Laaca cayábidu lii, rey, pa guni chaahuicabe guidxi ca ne gunduuxecabe ca muru stini la? qué zaguíxecabe lii nin ti clase impuestu.* Ne pur nga maʼ qué zadale ca tesoro stiʼ ca rey.
14 De ra palaciu ca nga zeeda ni riáxadu* ne cadi galán diʼ gudiʼdu lugar guixiéʼ ca cosa risaca stiʼ rey. Nga runi cuséʼndadu carta riʼ para quixhenadu lii, rey.
15 Ne para gaca investigar lu libru ra zeeda ca registru stiʼ ca rey ni gurí ante de lii. Ra guchialuʼ libru ca zudiiluʼ cuenta qué ruzuubaʼ guidxi riʼ diidxaʼ, ne pur nga rapa ca rey ne xcaadxi guidxi* guendanagana, ne maca de dxiqué riasa ca binni riʼ para gucaalucaʼ ca ni runi mandar ndaaniʼ xquídxicaʼ. Ne pur nga binitilú xquídxicabe.
16 Cayábidu lii, rey, pa guni chaahuicabe guidxi ca ne guni chaahuicabe ca muru stini, maʼ qué zanda guni mandarluʼ ca guidxi ni nuu ladu riaaziʼ gubidxa de guiiguʼ Éufrates».
17 Para bicabi rey que Rehúm —hombre ni jma napa autoridad stiʼ gobiernu—, Simsái escriba que, ne xcaadxi de ca xcompañérucabe ni nabeza Samaria ne xcaadxi binni ni nabeza ndaaniʼ ca guidxi ni nuu ladu riaaziʼ gubidxa stiʼ guiiguʼ Éufrates:
«¡Laguicaa ti diuxi!
18 Maʼ biindaʼ chaahuicabe nezaluáʼ* guiʼchiʼ ni biseendatu ra nuaaʼ que.
19 Bineʼ mandar gaca investigar ne maʼ bihuinni, dede dxiqué, huayasa guidxi riʼ para gucaalucaʼ ca rey ne stale biaje huayásacabe para gucaalúcabe ca ni runi mandar ndaaniʼ guidxi riʼ.
20 Guyuu caadxi rey nadipaʼ ndaaniʼ guidxi Jerusalén, ni biʼniʼ mandar ca guidxi ni nuu ladu riaaziʼ gubidxa de guiiguʼ Éufrates ne biʼniʼ cobrarcaʼ guiráʼ clase impuestu.*
21 Yanna, canabaʼ laatu gábitu ca binni ca gucueezacaʼ dxiiñaʼ ni cayúnicaʼ ne cadi guni chaahuicabe guidxi ca dede ora maʼ guinieeʼ gácani.
22 Ne qué chiguiaanda laatu gúnitu ni cayabeʼ laatu riʼ para cadi jmaruʼ si guixiéʼ ca cosa risaca stiʼ rey».
23 Ora binadiaga Rehúm, Simsái escriba que, ne ca xcompañeru ni cá lu carta ni biseendaʼ rey Artajerjes ra nuucaʼ, nagueendaca guyecaʼ Jerusalén ne biʼniʼ obligarcaʼ ca judíu gucueezacaʼ dxiiñaʼ cayúnicaʼ.
24 Dxi que nga bisaana de guni chaahuicabe lidxi Dios, lídxibe ni guyuu Jerusalén, ne biaanadxí dxiiñaʼ que hasta lu guiropa iza de cayuni mandar Darío, rey stiʼ Persia.
Nota
^ Lit. «ruyúbidu».
^ O zándaca «Gucuani né letra arameu ne despué biʼniʼ traducírcabe ni».
^ Dxi gucuá Esd 4:8 hasta 6:18 gucuani lu diidxaʼ arameu.
^ O «stiʼ imperiu persa».
^ O «ca guidxi ni nuu jma chericaʼ de Guiiguʼ ca».
^ Raríʼ caniʼni de chonna tipu impuestu: ni riguixe cada binni, ni riguíxecabe pur ca cosa ni nápacabe ne ni riguíxecabe para tídicabe lu ca neza que ora maʼ zécabe de viaje.
^ Lit. «Laadu ridoʼdoʼ zidi stiʼ palaciu ca».
^ O «provincia».
^ O zándaca «Maʼ biʼniʼ traducírcabe ne maʼ biindanécabe naa».
^ Raríʼ caniʼni de chonna tipu impuestu: ni riguixe cada binni, ni riguíxecabe pur ca cosa ni nápacabe ne ni riguíxecabe para tídicabe lu ca neza que ora maʼ zécabe de viaje.
