Esdras 3:1-13
3 Lu beeu gadxe que, dxi maʼ nuu ca israelita* que ndaaniʼ xquídxicaʼ, guirácabe bidxíñacabe Jerusalén para gúnicabe dxiiñaʼ tobi si.
2 Jesúa xiiñiʼ Jehozadac ne ca sacerdote ni naca xcompañérube, zaqueca Zorobabel xiiñiʼ Sealtiel ne ca biʼchiʼ, bizulú gundísacabe altar stiʼ Dios stiʼ Israel para gúnicabe sacrificiu ni riaʼquiʼ, casi cá ni lu Ley stiʼ Moisés, hombre stiʼ Dios ni dxandíʼ.
3 Peru, neca cadxíbicabe ca guidxi ni nabeza gaxha de laacabe que, bíʼnicabe altar que lugar ra maca nuuni. De raqué bizulú bidiicabe sacrificiu ni riaʼquiʼ para Jehová: ca sacrificiu ni riaʼquiʼ ni rudiicabe siadóʼ ne ni rudiicabe huadxí.
4 De raqué bíʼnicabe Saa stiʼ ca Ramada,* casi maca cá gácani, ne guiráʼ dxi bidiicabe sacrificiu ni riaʼquiʼ biaʼ nexheʼ gudiicabe cada dxi.
5 Despué bidiicabe ofrenda ni riaʼquiʼ ni rudiicabe guiráʼ dxi, ca ofrenda ni rudiicabe dxi riree beeuhuiiniʼ ne ca ni rudiicabe ca dxi raca saa para Jehová, ne zaqueca ca ofrenda ni guiale de tuuxa gudii Jehová.
6 Dede primé dxi stiʼ beeu gadxe que bizulú bidiicabe sacrificiu ni riaʼquiʼ para Jehová, neca caʼruʼ gataʼ ca base stiʼ templu stiʼ Jehová.
7 De raqué bidiicabe bueltu ca hombre ni rugá guié ne ca artesanu. Laaca bidiicabe guendaró, vinu ne aceite ca binni de Sidón ne ca de Tiro para chicaacaʼ yaga cedru lu Líbano ne gutiidicaʼ ni lu nisadóʼ para chinecaʼ ni Jope, casi biʼniʼ mandar Ciro, rey stiʼ Persia, gácani.
8 Lu guiropa iza de yendá Zorobabel xiiñiʼ Sealtiel ne Jesúa xiiñiʼ Jehozadac ra lidxi Dios ni dxandíʼ ni nuu Jerusalén, lu guiropa beeu que bizulú biʼninécabe ca bíʼchicabe dxiiñaʼ, ca sacerdote ne ca levita, ne guiráʼ ca ni biree de Babilonia ne biguétacaʼ Jerusalén. Ne gunábacabe ca levita ni napa gande iza para delante gúʼyacaʼ ca dxiiñaʼ ni cayaca ra lidxi Jehová.
9 Ngue runi Jesúa, ca xiiñiʼ ne ca biʼchiʼ, ne Cadmiel ne ca xiiñiʼ, ca xiiñiʼ Judá, guyuucaʼ lade ca ni cayuni dxiiñaʼ ra lidxi Dios ni dxandíʼ para gúʼyacabe dxiiñaʼ ni cayaca raqué. Laaca guyuu ca xiiñiʼ Henadad ládecabe, ca xniétube ne ca familia stiʼ ca xiiñibe purtiʼ laaca levita laacaʼ.
10 Dxi gudixhe ca trabajador que ca base stiʼ templu stiʼ Jehová, nacu ca sacerdote que lari especial sticaʼ ne naazecaʼ trompeta, ne ca levita, ca xiiñiʼ Asaf naazecaʼ címbalo.* Bizuhuaacabe para gusisácacabe Jehová ne yenándacabe ni maca gudixhe David, rey stiʼ Israel, gúnicabe.
11 Ne bizulú bisisácacabe Jehová ne cudiicabe xquixe peʼ laa. Ne cayuundacabe pur turnu ca diidxaʼ riʼ: «Purtiʼ nacháʼhuibe; qué ziuu dxi gusaana de gannaxhiibe Israel». De raqué guidubi guidxi que bizulú biindacaʼ jma nadipaʼ ne bisisácacaʼ Jehová purtiʼ maʼ gudíxhecabe ca base stiʼ lidxi Jehová.
12 Stale de ca sacerdote, ca levita ne ca xaíque stiʼ ca familia neza bixhózecaʼ —ca ni maʼ nagola ne bíʼyacaʼ yoo ni gurí primé que— bizulú cayuunacaʼ ne cucaacaʼ ridxi ora bíʼyacaʼ gudíxhecabe ca base stiʼ yoo que. Peru laaca stale tu laa bizulú cucaa ridxi né guiráʼ stipa stiʼ de tantu cayecheʼ.
13 Ngue runi qué ñanda nihuinni tuu ngue cucaa ridxi pur cayuunaʼ ne tuu ngue cucaa ridxi de tantu cayecheʼ. De tantu reciu cucaacabe ridxi dede zitu binadiaga binni laacabe.
