Esdras 1:1-11
1 Lu primé iza de cayuni mandar Ciro, rey stiʼ Persia, biniibi Jehová ladxidoʼbe para cueebe ti ley ni guireeche lu guidubi naca reinu stibe para gaca cumplir stiidxaʼ Jehová ni guníʼ Jeremías. Bicaabe ley que lu guiʼchiʼ ne sicaríʼ nani:
2 «Ndiʼ nga ni ná Ciro, rey stiʼ Persia: “Maʼ bidii Jehová, Dios ni nuu guibáʼ, naa guiráʼ ca reinu ni nuu lu guidxilayú ne maʼ gunábabe naa gucueeʼ ti yoo Jerusalén, ni nuu Judá.
3 Guiráʼ ca ni naca de xquídxibe, cadi guixeleʼ Dios sticaʼ de laacaʼ ne checaʼ Jerusalén —ni nuu Judá— ne guni chaahuicaʼ lidxi Jehová, Dios stiʼ Israel. Laabe nga Dios ni dxandíʼ, ne guyuu lídxibe Jerusalén.*
4 Tutiica de laacabe ni nabeza ládetu, ratiica si nuu, gacané ca xpecinu* laa. Gudiicabe laa oro, plata, cosa risaca ni nápacaʼ ne maniʼ sticaʼ. Aparte de ca ofrenda ni guiale de laacaʼ gudiicaʼ para lidxi Dios ni dxandíʼ, lídxibe ni guyuu Jerusalén”».
5 De raqué, ca xaíque familia neza bixhoze ca binni de Judá ne de Benjamín, ca sacerdote ne ca levita, guiráʼ ca ni bicuudxi Dios ni dxandíʼ ladxidóʼ, guyuucaʼ listu para checaʼ ne guni chaahuicaʼ lidxi Jehová, ni guyuu Jerusalén.
6 Gucané ca xpecínucabe laacabe ne bidiicaʼ laacabe cosa de oro ne de plata, ca cosa ni nápacaʼ, maniʼ sticaʼ ne xcaadxi cosa risaca, ne aparte de guiráʼ ofrenda ni biale de laacaʼ gudiicaʼ.
7 Laaca biʼniʼ mandar rey Ciro gudxiguétacabe ca cosa ni riquiiñeʼ ra lidxi Jehová, ni gulee Nabucodonosor de Jerusalén ne guluu ndaaniʼ lidxi dios stiʼ.
8 De raqué biʼniʼ mandar Ciro, rey stiʼ Persia, guʼyaʼ tesoreru Mitrídates cueecabe ca cosa que ne gucaacabe ni lu ti lista para Sesbazar,* xaíque stiʼ tribu stiʼ Judá.
9 Ndiʼ nga lista que: 30 traste de oro ni napa forma dxumihuiiniʼ, ti mil traste de plata ni napa forma dxumihuiiniʼ, ne sti 29 traste aparte,*
10 30 tazón nahuiiniʼ de oro, tapa gayuaa chii tazón nahuiiniʼ de plata ne sti mil traste.
11 Biaʼsi gaayuʼ mil tapa gayuaa traste de oro ne de plata guleecabe. Yené Sesbazar guiráʼ ndiʼ dxi biree ca binni que de Babilonia ne biguétacaʼ Jerusalén, ca binni riʼ nga ca ni guleecabe de xquídxicaʼ.
