Esdras 7:1-28
7 Despué de bizaaca guiráʼ ndiʼ, ca dxi cayuni mandar Artajerjes, rey stiʼ Persia, biguetaʼ Esdras.* Laabe nga xiiñiʼ Seraya, xiiñiʼ Azarías, xiiñiʼ Hilquías,
2 xiiñiʼ Salum, xiiñiʼ Sadoc, xiiñiʼ Ahitub,
3 xiiñiʼ Amarías, xiiñiʼ Azarías, xiiñiʼ Merayot,
4 xiiñiʼ Zerahías, xiiñiʼ Uzí, xiiñiʼ Buquí,
5 xiiñiʼ Abisúa, xiiñiʼ Finehás, xiiñiʼ Eleazar, xiiñiʼ Aarón, xaíque stiʼ ca sacerdote.
6 Esdras riʼ nga guyé* Babilonia. Gúcabe ti hombre ni guizáʼ nanna guni copiar* Ley stiʼ Moisés, ni bidii Jehová, Dios stiʼ Israel. Cumu nuuné Jehová Dios stibe laabe la? bidii rey que laabe guiráʼ ni gunábabe laa.
7 Caadxi israelita, sacerdote, levita, ni ruundaʼ, ni rapa ra puertaʼ ne ni runi dxiiñaʼ ra templu* guyecaʼ Jerusalén ante gusaa rey Artajerjes gadxe iza de cayuni mandar.
8 Yendá Esdras Jerusalén lu beeu gaayuʼ, ante gusaa rey que gadxe iza de cayuni mandar.
9 Bireebe de Babilonia primé dxi stiʼ primé beeu ne yendabe Jerusalén primé dxi stiʼ beeu gaayuʼ, purtiʼ nachaʼhuiʼ Dios stibe ne bidiináʼ laabe.
10 Guluu Esdras listu ladxidóʼ para guʼyaʼ xi ná Ley stiʼ Jehová, para guni ni nani ne gusiidiʼ ca ley ne ca decisión stibe ndaaniʼ guidxi Israel.
11 Ndiʼ nga ti copia stiʼ carta ni bidii rey Artajerjes sacerdote Esdras, ti hombre ni nanna guni copiar* ne guizáʼ nanna guni estudiar ca mandamientu stiʼ Jehová ne ca ley ni bidii guidxi Israel.
12 * «Ni bicaa Artajerjes —rey stiʼ guiráʼ rey— para sacerdote Esdras, ti hombre ni runi copiar* Ley stiʼ Dios ni nuu guibáʼ. Gupa stale guendariuudxí.
13 Maʼ guleeʼ ti orden ni caníʼ zanda cheʼ guiráʼ ca israelita ni nabeza biaʼ ra runeʼ mandar, ne ca sacerdote sticaʼ ne ca levita para chinecaʼ lii Jerusalén pa racaláʼdxicaʼ.
14 Purtiʼ naa ne gadxe hombre ni rudii conseju naa cuséʼndadu lii cheluʼ Judá ne Jerusalén chiguuyaluʼ pa cayúnicabe ni ná Ley stiʼ Dios stiluʼ, ni naazeluʼ ca.
15 Laaca zineluʼ plata ne oro ni racalaʼdxiʼ rey ne ca hombre ni rudii conseju laa gudiicaʼ Dios stiʼ Israel, ni nuu Jerusalén.
16 Laaca zineluʼ guiráʼ plata ne oro ni gudii* grupu de guidxi ra nuu Babilonia lii ne guiráʼ ca donación ni gacalaʼdxiʼ guidxi ca ne ca sacerdote ca gudiicaʼ lii para lidxi Dios sticaʼ, ni nuu Jerusalén.
17 Ne nagueendaca biquiiñeʼ bueltu ca para siluʼ toro, dendxuʼ barracu, dendxuhuiiniʼ ne siluʼ ofrenda de biidxiʼ ne ofrenda ni rixii* stiʼ cada tobi de laacame ne naquiiñeʼ gudiiluʼ cani lu altar ni nuu ra lidxi Dios stiluʼ, ni nuu Jerusalén.
18 »Ne ni guiaana de guiráʼ plata ne oro ca, lii ne ca bíʼchiluʼ laguuyaʼ ximodo jma jneza iquiiñetu ni, casi ribeza Dios stitu gúnitu ni.
19 Laaca zuni entregarluʼ ndaaniʼ guidxi Jerusalén nezalú Dios stiluʼ guiráʼ ca traste ni guicaaluʼ para iquiiñeʼ lu ca dxiiñaʼ ni raca ra lidxi Dios stiluʼ.
20 Ne intiica cosa ni caquiiñeʼ gudiiluʼ para lidxi Dios stiluʼ, gudixeneni bueltu ni nuu lade ca tesoro stiʼ rey.
21 »Naa, rey Artajerjes, maʼ bidieeʼ orden guiráʼ ca tesoreru stiʼ ca guidxi ni nuu ladu riaaziʼ gubidxa de guiiguʼ Éufrates para gudiicaʼ sacerdote Esdras —hombre ni runi copiar* Ley stiʼ Dios ni nuu guibáʼ— guiráʼ ni guinábabe laacaʼ, ne gúnicaʼ ni nagueendaca:
22 zanda gudiicaʼ laabe hasta ti gayuaa talentu* de plata, ti gayuaa coro* de trigu, ti gayuaa bato* de vinu ne ti gayuaa bato de aceite ne zidi biaʼ tiica iquiiñebe.
23 Guiráʼ ni guni mandar Dios ni nuu guibáʼ gaca ra lidxi, gácani né stale gana ti cadi guidxiichiné Dios ni nuu guibáʼ xquídxidu, naa ne ca xiiñeʼ.
24 Laaca maʼ gudxeʼ laacabe cadi guni cobrárcabe intiica clase impuestu* ca sacerdote, ca levita, ca músicu, ca ni rapa ra puertaʼ, ca ni runi dxiiñaʼ ra templu* ne xcaadxi ni runi dxiiñaʼ ra lidxi Dios riʼ.
25 »Ne lii, Esdras, biquiiñeʼ guendabiaaniʼ ni maʼ bidii Dios lii,* gulí caadxi hombre ni napa autoridad lade ca juez ne gulí juez para guni juzgar guiráʼ ca binni ni nabeza ndaaniʼ ca guidxi ni nuu ladu riaaziʼ gubidxa de guiiguʼ Éufrates, guiráʼ ca ni runibiáʼ ca ley stiʼ Dios stiluʼ, ne laaca naquiiñeʼ gusiiditu ca ley riʼ tutiica binni ni qué runibiáʼ cani.
26 Guiráʼ tu qué naʼ chinanda Ley stiʼ Dios stiluʼ ne ley stiʼ rey, nagueendaca naquiiñeʼ gatiʼ o guiládxicabe laa de xquidxi, quixe ti multa o guseguyoocabe laa».
27 ¡Guisaca lá Jehová, Dios stiʼ ca bixhozebiidadu,* purtiʼ bíʼnibe guiale de ndaaniʼ ladxidóʼ rey ca guni chaahuiʼ lidxi Jehová ni nuu Jerusalén ne gúnini ti yoo sicarú!
28 Maʼ bisihuinni Dios guizáʼ nadxii naa ne maʼ bicaabe rey ca, ca hombre ni rudii conseju laa ne ca príncipe ni jma napa autoridad stiʼ rey gacanecaʼ naa, ngue runi gupaʼ valor* purtiʼ biiyaʼ modo bidiináʼ Jehová Dios stinneʼ naa, ne bisendacaaʼ caadxi xaíque stiʼ Israel para chinecaʼ naa.
Nota
^ Riníʼ lá riʼ “guendaracané”.
^ Lit. «gudxiʼbaʼ».
^ O «ca netineu». Lit. «ca ni guca entregar».
^ Dxi gucuá Esd 7:12-26 gucuani lu diidxaʼ arameu.
^ Lit. «ni guidxélaluʼ ndaaniʼ».
^ Ti talentu nga 34.2 kg. Biiyaʼ apén. B14.
^ Ti coro nga 220 L. Biiyaʼ apén. B14.
^ Ti bato nga 22 L. Biiyaʼ apén. B14.
^ Raríʼ caniʼni de chonna tipu impuestu: ni riguixe cada binni, ni riguíxecabe pur ca cosa ni nápacabe ne ni riguíxecabe para tídicabe lu ca neza que ora maʼ zécabe de viaje.
^ O «ca netineu». Lit. «ca ni guca entregar».
^ Lit. «guendabiaaniʼ stiʼ Dios stiluʼ ni nuu lu naluʼ».
^ O «ca familia stidu ni bibani dxiqué».
^ O «gupaʼ stipa».
