Ano an ngaran han Dios?

An ngatanan han aton kapamilya may-ada ngaran. Bisan an aton mga hayop may ngaran! Salit diri ba makatadunganon la nga may ngaran gihap an Dios? Ha Biblia, damu an tawag ha Dios, sugad han Dios nga Makagarahum-ha-ngatanan, Soberano nga Ginoo, ngan Maglalarang, kondi may-ada gihap hiya personal nga ngaran.—Basaha an Isaias 42:8.

Ha damu nga bersyon han Biblia, mababasa an ngaran han Dios ha Salmo 83:18. Pananglitan, ha New World Translation of the Holy Scriptures, ito nasiring: “Ikaw, nga an ngaran amo hi Jehova, ikaw la an Gihihitaasi ha bug-os nga tuna.”

Kay ano nga sadang naton gamiton an ngaran han Dios?

Karuyag han Dios nga gamiton naton an iya ngaran. Kon nakikiistorya kita ha aton hinigugma, pananglitan ha aton duok nga sangkay, ginagamit naton an ngaran han aton sangkay. Diri ba sugad liwat hito kon makikiistorya kita ha Dios? Dugang pa, karuyag ni Jesu-Kristo nga gamiton an ngaran han Dios.—Basaha an Mateo 6:9; Juan 17:26.

Kondi basi magin sangkay han Dios, damu pa an sadang naton hibaroan mahitungod ha iya, labot la han iya ngaran. Pananglitan, ano an personalidad han Dios? Posible gud ba magin duok ha Dios? Mabibilngan mo an mga baton hito ha Biblia. Para ha dugang nga impormasyon, kitaa an kapitulo 1 hini nga libro nga iginpublikar han mga Saksi ni Jehova.