Ikaw ba ‘Nabanyak ha mga Itutusok’?

HA MGA panahon han Biblia, an itutusok—usa ka hilaba nga pudlos, kasagaran nga tais nga metal an durho hito—ginagamit ha pagpalakat ngan pagtugway ha mga hayop nga pantrabaho. Kon an hayop matig-a nga naato ha mga pagtusok pinaagi han pagduso hito, ano an resulta? Imbes nga magkaada maopay nga pag-abat, nadugang la ito hin kasakit ha hayop.

An binanhaw nga hi Jesu-Kristo naghisgot mahitungod han mga itutusok han nagpakita hiya kan Saulo, nga tikadto ha pagdakop ha iba nga mga disipulo ni Jesus. Ha butnga han nakakabuta nga kalamrag, hinbatian ni Saulo hi Jesus nga nasiring: “Saulo, Saulo, kay ano nga gintitimaraot mo ako? An padayon nga pagbanyak ha mga itutusok nagpapakuri ha imo.” Pinaagi han pagtimaraot ha mga Kristiano, hi Saulo ha pagkamatuod nakikig-away ha Dios, nangangalimbasog ha usa nga binuhatan nga makakadaot la ha iya.—Buhat 26:14, NW.

Kita ba liwat bangin diri-tinuyo nga ‘nabanyak ha mga itutusok’? Iginpapariho han Biblia “an mga pulong han makinaadmananon” ha mga itutusok nga nag-aaghat ha aton nga gumios tipaunhan ha husto nga direksyon. (Eklesiastes 12:11) An inspirado nga sagdon ha Pulong han Dios makakapagios ngan makakagiya ha aton ha husto nga paagi—kon karawaton naton ito. (2 Timoteo 3:16) An pagkontra ha mga pagpagios hito makakadaot la ha aton.

Ginsunod ni Saulo an mga pulong ni Jesus, ginbag-o an iya binuhatan, ngan nagin an hinigugma nga Kristiano nga hi apostol Pablo. An aton pagsunod ha sagdon han Dios magdadara liwat ha aton hin waray kataposan nga mga bendisyon.—Proberbios 3:1-6.

[Ginkuhaan han Retrato ha pahina 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers