Pilia an Kinabuhi nga Waray Kataposan

DAMU nga mga tawo yana an may-ada damu gud nga mapipilian. Pananglitan, an mga bado nga aton iginsusul-ot, an pagkaon nga aton kinakaon, ngan an aton gintatrabahoan ngan inuukyan agsob nga nagkikinahanglan hin pagpili. Ha damu nga mga bahin han kalibotan, kustomre na an pagpili hin magigin padis han usa. Kondi, an Biblia naghahatag hin mapipilian nga nalabaw ha ngatanan nga iba nga mga mapipilian—usa nga mahimo magkaada hito an ngatanan nga katawohan.

An Biblia nasiring: “Hiya nga nagpapadayon ha pagkamatadong makakadangat ha kinabuhi, ngan hiya nga nasunod ha karaotan nagbubuhat hini ha iya kalugaringon nga kamatayon.” (Proberbios 11:19) Ngan hi Jesu-Kristo nagpahayag: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.”—Juan 17:3.

Oo, an aton Maglalarang naghahatag ha aton hin higayon nga pilion an dalan nga mahimo magtugway ngadto ha kinabuhi nga waray kataposan! Ano an kinahanglan pagbuhaton naton basi makarawat an kinabuhi nga waray kataposan?

Sumala ha Biblia, “ha dalan han pagkamatadong amo an kinabuhi.” (Proberbios 12:28) Mahimo kita magin usa han mga magtadong nga aada ha dalan ngadto ha kinabuhi nga waray kataposan. Paonan-o? Pinaagi han pagsiguro nga an aton mga kinabuhi nasunod ha kaburut-on han Dios ngan ha iya mga sugo. (Mateo 7:13, 14) Salit hinaot himoon naton an husto nga pagpili ngan karawaton an regalo han Dios nga kinabuhi nga waray kataposan.—Roma 6:23.