Mga Pakiana Tikang ha mga Magbarasa

Kay ano nga an Isaias 30:21 naghihisgot mahitungod han pulong ni Jehova sugad nga tikang ha “imo luyo,” nga an nauna nga bersikulo nagbubutang kan Jehova ha atubangan pinaagi ha pagsiring, “An imo mga mata makakakita han imo mga magturutdo [“Gihitaasi nga Instruktor,” NW]”?

An Isaias 30:20, 21 mababasa: “An imo mga magturutdo [“Gihitaasi nga Instruktor,” NW] diri na mananago, kondi an imo mga mata makakakita han imo mga magturutdo [“Gihitaasi nga Instruktor,” NW]; ngan an imo mga talinga makakabati han usa nga pulong ha imo luyo, nga nasiring: Amo ini an dalan, maglakat kamo dida hini; kon kamo sumimang ha too nga kamot, ngan kon kamo sumimang ha wala.”

Kon literal nga tatagdon an teksto, nakikita han parabasa hi Jehova, an Gihitaasi nga Instruktor, ha iya atubangan kondi nabati han Iya tingog tikang ha luyo. Kondi, simboliko an mga pulong ngan sadang sabton ha sugad hito nga paagi.

An paagi han pagkayakan nga mahahanduraw han usa pinaagi han pagbasa ha bersikulo 20 amo an mahitungod han usa nga surugoon nga andam ha pag-alagad ha iya agaron, andam pirme nga gumios uyon ha mga instruksyon han agaron. Pariho la han usa nga surugoon nga atentibo nga nag-oobserba ha kamot han iya agaron basi hisabtan an iginpapasabot han iya kaburut-on, an katawohan ni Jehova yana nga panahon nakatutok han ira atensyon ha nag-uuswag nga basado-ha-Biblia nga mga instruksyon nga iginhahatag ni Jehova pinaagi han iya tunan-on nga organisasyon. (Salmo 123:1, 2) Oo, ira ginsusunod an iya giya, nga alerto ha anoman nga iginpapahayag ni Jehova pinaagi han “matinumanon ngan maaramon nga uripon.”—Mateo 24:45-47, NW.

Kondi, ano an mahimo ipasabot mahitungod han pulong nga nababatian han iya mga surugoon tikang ha luyo? Makatadunganon sabton nga an tingog tikang ha luyo amo an tingog han Dios nga ginyakan ha naglabay, nga nakarekord ha iya sinurat nga Pulong sugad nga ginpasimple han iya “matinumanon . . . nga tinaporan.” (Lukas 12:42) An moderno nga mga surugoon han Dios nakakabati han iya tingog pinaagi han maduruto nga pag-aram ha Biblia ngan pinaagi han pag-aplikar han mga prinsipyo hito ha ira kinabuhi ha bulig han mga publikasyon nga gin-andam han “matinumanon ngan maaramon nga uripon,” “an matinumanon . . . nga tinaporan.” Pinaagi han pagsarig ngan pagin alerto gud ha napapanahon nga giya nga iginhahatag han Gihitaasi nga Instruktor ngan pinaagi han pag-aram ha Pulong han Dios, nga iginsurat mga siglo na an naglabay, simboliko nga nakikita hiya han iya mga surugoon ha ira atubangan ngan nababatian an iya tingog tikang ha luyo.—Roma 15:4.