‘An Mahusay nga Kanding ha Bukid’

AN MAHUSAY diri pulong nga ginagamit han kadam-an ha aton ha paghulagway han kanding. Bangin hunahunaon naton an mga kanding sugad nga mapulsanon nga mga hayop nga nakaon han haros bisan ano ngan naghahatag ha aton hin marasa nga karne ngan masustansya nga gatas​—kondi diri gud naton tatawagon hira nga mahusay.

Kondi, ginhulagway han Biblia an asawa sugad nga ‘makaruruyag ngan mahusay nga kanding ha bukid.’ (Proberbios 5:​18, 19) Hi Salomon, usa nga parasurat han libro nga Mga Proberbios, maopay nga paraobserba han mga ihalas nga mga hayop han Israel, salit sigurado nga mayada hiya husto nga hinungdan ha paggamit hini nga pagtanding. (1 Hadi 4:​30-33) Bangin pariho han iya amay nga hi David, naobserbahan niya an mga kanding ha bukid nga pirme nakadto ha En-gedi, hirani ha mga baybayon han Dagat nga Patay.

An gutiay nga mga panon han mga kanding ha bukid nga nag-uukoy ha hirani nga Disyerto han Judea regular nga nabisita ha burabod han En-gedi. Tungod kay ito la an maopay nga surok han tubig hinin mamara nga lugar, an En-gedi amo an naruruyagan nga surok han tubig han mga kanding ha bukid ha mga siglo na. Ha pagkamatuod an ngaran nga En-gedi posible nga nangangahulogan hin “burabod han nati nga kanding,” usa nga ebidensya han regular nga presensya han nati nga mga kanding hini nga lugar. Hi Hadi David nagtago dinhi tikang ha pagtimaraot ni Hadi Saul, bisan kon kinahanglan hiya mag-ukoy sugad nga pinalagiw “ha kabatoan han ihalas nga kakandingan.”​— 1 Samuel 24:​1, 2.

 Ha En-gedi makakakita ka pa gihapon hin babaye nga ihalas nga kanding, o kanding ha bukid, nga matahom nga nalusad ha batoon nga bakilid samtang ginsusundan niya an lalaki nga kanding ngadto ha tubig. Ngan bangin magtikang ka pakasabot han kaparihoan han babaye nga ihalas nga kanding ha maunungon nga asawa. An iya kalmado nga kinaiya ngan elegante nga porma nagpapakita liwat han mga kalidad han babaye. An pulong nga ‘mahusay’ matin-aw nga may kalabotan han katahom ngan pagkaelegante han kanding ha bukid. a

An babaye nga ihalas nga kanding kinahanglan magin marig-on ngan magin matahom. Sugad han iginpatin-aw ni Jehova kan Job, an kanding ha bukid nag-aanak ha mga bakilid, ha batoon, nga diri-kombinyente nga mga lugar diin gutiay la an pagkaon ngan diri-maopay an temperatura. (Job 39:1) Bisan pa hini nga mga kakurian, gin-aataman niya an iya mga nati ngan gintututdoan hira ha pagsaka ngan paglukso hin malaksi ha mga bato pariho ha iya. Maisugon nga ginpapanalipdan liwat han babaye nga ihalas nga kanding an iya mga nati tikang ha mapintas nga mga hayop. Usa nga paraobserba an nakakita hin kanding ha bukid nga nakikig-away ha agila ha sulod hin trenta minutos, samtang an nati nga kanding nakupkop ha ilarom niya para han panalipod.

An Kristiano nga mga asawa ngan mga iroy agsob nga kinahanglan mag-ataman han ira mga anak ha maraot nga mga kahimtang. Pariho han kanding ha bukid, nagpapakita hira hin dedikasyon ngan pagkadiri-hakog ha pagtuman hinin hatag-han-Dios nga responsabilidad. Ngan maisugon nga nangangalimbasog hira ha pagpanalipod ha ira mga anak tikang ha espirituwal nga mga peligro. Salit, imbes nga minuson an kababayin-an tungod hini nga pagtanding, ginpapabug-atan ni Salomon ha pagkatinuod an katahom ngan kahusay​—an espirituwal nga mga kalidad nga nagraranggat bisan ha gikukurii nga palibot.

[Footnote]

[Mga Retrato ha pahina 30, 31]

An Kristiano nga asawa ngan iroy nagpapakita hin matahom espirituwal nga mga kalidad kon gintutuman an hatag-han-Dios ha iya nga mga responsabilidad