TIKANG HA IBA-IBA NGA DAPIT HAN KALIBOTAN
Mahitungod ha Amerika
An mga sumat tikang ha weste nga bahin han kalibotan nagpapakita han bili han waray tubtoban nga kinaadman han Biblia.
Ibani an Istres
Sumala ha usa nga pagsaliksik ha Vancouver, Canada, mahimo magpabilin nga hamubo an istres han usa kon tulo la ka beses niya kikitaon an iya e-mail kada adlaw, imbes nga pag-inusisahon ito pirme. An nanguna han surbey, hi Kostadin Kushlev, nasiring: “Nakukurian an mga tawo ha pagpugong han hingyap nga kitaon an ira email, kondi an pag-ato hini nakakaiban han istres.”
ALAYON HUNAHUNA INI: Nagkikinabuhi kita ha “peligroso gud nga mga panahon nga makuri pakiangayan,” salit diri ba kita sadang mamiling hin mga paagi basi maibanan an aton istres?
Kahibalik Tikang han Kadaot han Duro nga Pagpangisda
Ha Belize ngan ha iba nga dapit han Caribbean, “may mga ebidensya han pagdamu han mga buskay, banagan, ngan mga isda ha mga lugar nga diri igintutugot han gobyerno an pagpangisda,” sumala ha report han Wildlife Conservation Society (WCS). Ito nagdugang: “An kahibalik han nagtitikaubos nga mga linarang ha mga lugar diin diri igintutugot an pangawil, mahimo umabot la hin 1-6 ka tuig kontra ha ginpapangawilan nga mga lugar, kondi an bug-os nga kahiuli han kadagatan . . . mahimo umabot hin mga dekada.” Hi Janet Gibson, usa nga direktor ha WCS, nagsiring mahitungod ha Belize: “Matin-aw nga an pagdiri han gobyerno ha pagpangawil ha pipira nga dapit, makakabulig basi bumalik an mga isda ngan an iba nga mga linarang ha ira natural nga urukyan.”
ALAYON HUNAHUNA INI: Diri ba an abilidad han palibot nga makapahiuli ha orihinal nga kahimtang nagpapamatuod nga may maaramon nga Maglalarang?—Salmo 104:24, 25.
Kamadarahog ha Brazil
Nagtitikaduro an kamadarahog ha Brazil, siring han usa nga news service nga Agência Brasil. Han 2012, umabot hin sobra 56,000 an kaso han homicide—ini an pinakahitaas nga nairekord han Ministry of Health. An public security specialist nga hi Luís Sapori natoo nga ini nga pagdamu nagpapakita hin paghamubo han moral. Kon an mga tawo mawad-an hin respeto ha mga balaud han sosiedad, “nagtitikang hira pagin madarahog basi matuman an ira karuyag,” siring ni Sapori.
MAARAM KA BA? An Biblia nagtagna nga maabot an panahon nga an gugma “magtutugnaw” ngan an karaotan magtitikadamu.—Mateo 24:3, 12.
