Filipos 1:1-30
1 Tikang kan Pablo ngan kan Timoteo, nga mga uripon ni Kristo Jesus, para ha ngatanan nga baraan ha Filipos nga kahiusa ni Kristo Jesus, ngan ha mga paramangno ngan mga ministeryal nga surugoon:
2 Makarawat unta niyo an diri-matupngan nga pagkabuotan ngan kamurayawan tikang ha Dios nga aton Amay ngan ha aton Ginoo nga hi Jesu-Kristo.
3 Nagpapasalamat ako pirme ha akon Dios kon nahinunumdom ako ha iyo
4 ha kada pangangamuyo ko para ha iyo ngatanan. Ha tagsa nga akon pangamuyo, malipayon ako
5 tungod han iyo bulig para ha maopay nga sumat tikang ha siyahan nga adlaw tubtob yana.
6 Kay nasarig ako nga hiya nga nagtikang hin maopay nga buhat ha iyo magtatapos hito ha adlaw ni Jesu-Kristo.
7 Husto la nga ini an hunahunaon ko mahitungod ha iyo ngatanan, kay kamo aadi ha akon kasingkasing, kamo nga binulig ha akon ha prisohan ngan ha pagdepensa han maopay nga sumat ngan ha pagkaada legal nga katungod ha pagsangyaw hito. Hini nga paagi, nagin kaangbit ko kamo han diri-matupngan nga pagkabuotan.
8 Testigo ko an Dios nga ginhahandom ko gud kamo ngatanan kay pinalangga ko kamo pariho han pagpalangga ha iyo ni Kristo Jesus.
9 Ngan padayon nga igin-aampo ko nga madugangan pa gud an iyo gugma upod an husto nga kahibaro ngan bug-os nga pagsabot;
10 basi masiguro niyo an mas importante nga mga butang, basi mawaray kamo kasaypanan ngan diri makapakdol* ha iba tubtob ha adlaw han Kristo,
11 ngan basi mapuno kamo han magtadong nga buhat,* pinaagi kan Jesu-Kristo, para ha himaya ngan kadayawan han Dios.
12 Yana mga kabugtoan, karuyag ko hibaroan niyo nga an akon mga buruhaton nagresulta gud ha pag-uswag han maopay nga sumat,
13 basi an akon kapriso tungod han Kristo mahibaroan han ngatanan nga Gwardya han Emperador han Roma* ngan han iba pa nga tawo.
14 Yana, kadam-an han kabugtoan ha Ginoo nagkaada pagsarig tungod han akon kapriso, ngan waray kahadlok nga nagpapakita hira hin dugang nga kaisog ha pagsangyaw han pulong han Dios.
15 Ha pagkamatuod, iginsasangyaw han iba an Kristo tungod ha kaawa ngan kompetisyon, pero an iba tungod ha maopay nga motibo.
16 An mga nagsasangyaw tungod ha maopay nga motibo nagpapasamwak han Kristo tungod ha gugma, kay maaram hira nga ginpili ako basi depensahan an maopay nga sumat;
17 pero an mga nagsasangyaw tungod ha kaawa ngan kompetisyon nagbubuhat hito, diri tungod han maopay nga motibo, kondi tungod ha pagin makiawayon, kay intensyon nira nga pakurian ako samtang priso.
18 Ano an resulta? Ha anoman nga paagi, pakunokuno man o kamatuoran, naipapasamwak an Kristo ngan tungod hini nalilipay ako. Ha pagkamatuod, padayon nga malilipay ako,
19 kay maaram ako nga magriresulta ini han akon katalwasan tungod han iyo pangamuyo ngan han bulig tikang ha espiritu ni Jesu-Kristo.
20 Uyon ini han akon ginpapamulat gud ngan ginlalaoman nga diri ako maaawod ha anoman nga paagi. Kondi pinaagi han kagawasan ha pagyakan, an Kristo pirme papasidunggan yana, sugad han naglabay, pinaagi han akon lawas, mabuhi man ako o mamatay.
21 Ha akon kahimtang, kon mabuhi man ako, para ito han Kristo, ngan kon mamatay ako, bentaha ko ito.
22 Samtang buhi ako,* bunga ini han akon buruhaton, pero diri ako maaram kon hain an akon pipilion.
23 Diri ako maaram kon hain hito nga duha an akon pipilion, kay hingyap ko nga magkaada kagawasan ngan makaupod an Kristo, ngan sigurado ako nga mas maopay gud ito.
24 Pero mas kinahanglan nga magpabilin ako nga buhi tungod ha iyo.
25 Salit tungod kay kombinsido ako hito, maaram ako nga magpapabilin ako ngan padayon nga makakaupod niyo ngatanan para ha iyo kauswagan ngan ha kalipay nga resulta han iyo pagtoo,
26 basi mapuno gud kamo hin kalipay kan Kristo Jesus tungod ha akon kon makaupod ko kamo utro.
27 Basta gumawi* gud kamo uyon ha maopay nga sumat mahitungod han Kristo, basi kon kumada man ako ngan makigkita ha iyo o kon diri, makabati ako mahitungod ha iyo ngan mahibaro nga natindog kamo hin marig-on nga may usa nga espiritu, usa nga kalag nga urosa nga nangangalimbasog para ha pagtoo ha maopay nga sumat,
28 ngan ha bisan ano nga paagi diri gud napataranta ha iyo mga kaaway. Ito mismo an pamatuod han kabungkagan para ha ira, kondi katalwasan para ha iyo, ngan ini nga tigaman tikang ha Dios.
29 Kay gintagan kamo hin pribilehiyo tungod han Kristo, nga diri la kamo tumoo ha iya kondi mag-antos liwat tungod ha iya.
30 Kay naatubang kamo hin pakig-away nga pariho han iyo nakita nga akon gin-aatubang, ngan hinbaroan niyo yana nga gin-aatubang ko pa gihapon ito.
Mga footnote
^ O “makapaluya han pagtoo han iba.” Kitaa an “Kahipakdol” ha Glossary.
^ Ha literal, “matadong nga bunga.”
^ Ha literal, “Pretoriano nga Gwardya.” Kitaa an Glossary.
^ Ha literal, “ha unod.”
^ O “magpadayon sugad nga mga tuminungnong.”
