Filipos 2:1-30
2 Kon may maihahatag kamo nga bisan ano nga pagparig-on pinaagi han Kristo, bisan ano nga mahigugmaon nga pagliaw, pagtagad ha usa kag usa, pagpalangga ngan pagpaid,
2 lipaya ako niyo hin bug-os pinaagi han iyo pagpakita nga nagkakauruyon kamo ha panhunahuna ngan naghihigugmaay kamo, bug-os nga nagkakaurosa* ngan nagkakauruyon an hunahuna.
3 Ayaw pagbuhat hin bisan ano tungod ha pagin makiawayon o tungod ha pagpaimportante ha kalugaringon, lugod mapainubsanon nga tagda nga mas labaw ha iyo an iba.
4 Magin matinagaron kamo, diri la para ha iyo kalugaringon nga kaopayan, kondi para liwat ha kaopayan han iba.
5 Ipadayon niyo ini nga iyo disposisyon nga pariho han kan Kristo Jesus,
6 nga bisan kon pariho hiya ha dagway han Dios, waray hiya maghunahuna nga man-agaw, karuyag sidngon, nga magin katupong hiya han Dios.
7 Waray gud, kondi ginbayaan niya an ngatanan nga iya gintatag-iya ngan nagin pariho hin uripon. Nagin tawo hiya.
8 Labot pa, han nagin tawo* hiya, nagpaubos hiya ngan nagin masinugtanon tubtob ha kamatayon, oo, kamatayon ha pasakitan nga kahoy.*
9 Tungod liwat hini nga hinungdan, iginbutang hiya han Dios ha hitaas nga posisyon ngan mahigugmaon nga gintagan hiya hin ngaran nga labaw han ngatanan nga ngaran,
10 basi ha ngaran ni Jesus lumuhod an tagsa nga tuhod han mga aadto ha langit ngan aanhi ha tuna ngan aada ha ilarom han tuna,
11 ngan an tagsa nga dila dayag nga kumarawat nga hi Jesu-Kristo an Ginoo para ha himaya han Dios nga Amay.
12 Salit mga hinigugma, sugad la nga pirme kamo nasugot, diri la durante han akon presensya kondi labi na gud yana nga diri ako niyo kaupod, padayon kamo nga mangalimbasog nga may kahadlok ngan pangurog para ha iyo katalwasan.
13 Kay an Dios nagbubuhat uyon ha iya nalilipayan, pinaagi ha pagpakusog han iyo hingyap ngan paghatag ha iyo hin gahum ha pagbuhat han ngatanan nga iya karuyag.
14 Padayon nga buhata niyo an ngatanan nga waray pagngurutob ngan diskusyon,
15 basi waray ikasaway ha iyo ngan magin inosente kamo, mga anak han Dios nga waray hugaw ha butnga hinin maraot ngan matinalapason nga henerasyon, nga ha butnga nira naglalamrag kamo sugad hin mga sugâ ha kalibotan.
16 Kapti hin marig-on an pulong han kinabuhi, basi magkaada ako hinungdan nga malipay ha adlaw han Kristo, kay maaram ako nga waray makarag an akon pagdalagan o maduruto nga pagbuhat.
17 Kondi bisan kon pariho ako hin halad nga irimnon nga iginbubuhos ha iyo halad, nga amo an iyo pag-alagad* tungod han iyo pagtoo, nalilipay ako ngan nagrarayhak upod niyo ngatanan.
18 Ha pariho nga paagi, kamo liwat sadang malipay ngan magrayhak kaupod ko.
19 Kondi naglalaom ako nga ha diri mag-iiha, pakakadaon ha iyo han Ginoo nga hi Jesus hi Timoteo, basi maparig-on* ako kon mabatian ko an sumat mahitungod ha iyo.
20 Kay waray ako iba nga masusugo ngada ha iyo nga pariho ha iya an disposisyon, nga sinsero nga magmamangno ha iyo.
21 Kay an iba nagtitinguha han kalugaringon la nira nga mga kaopayan, diri han mga kaopayan ni Kristo Jesus.
22 Kondi maaram kamo han ebidensya nga iginpakita niya mahitungod ha iya kalugaringon, nga pariho hin anak upod han iya amay, nagpauripon hiya kaupod ko ha pagpauswag han maopay nga sumat.
23 Salit hiya an ginlalaoman ko nga pakakadaon ko dayon kon mahibaroan ko na an mahitatabo ha akon.
24 Oo, nasarig gud ako ha Ginoo nga diri mag-iiha, makada liwat ako.
25 Pero yana ginhuhunahuna ko nga kinahanglan pakadaon ko ha iyo hi Epafrodito nga akon bugto ngan igkasi-magburuhat ngan igkasi-sundalo, nga ginsugo niyo sugad nga representante basi mag-asikaso han akon panginahanglan,
26 kay naghahandom hiya nga makita kamo ngatanan ngan nasusubo gud hiya kay nahibaro kamo nga nagkasakit hiya.
27 Oo, nagkasakit hiya nga haros mamatay na; pero nalooy ha iya an Dios, ngani diri la ha iya kondi ha akon liwat, basi diri na madugangan an akon kasubo.
28 Amo nga pakakadaon ko dayon hiya ha iyo, basi pagkirigta niyo magmalipayon na liwat kamo ngan maibanan an akon kabaraka.
29 Salit malipayon nga abiabiha niyo hiya sugad han iyo nahiaraan nga pag-abiabi ha mga sumurunod han Ginoo; ngan higugmaa niyo an sugad nga klase hin mga tawo,
30 kay tungod ha buruhaton han Ginoo haros mamatay hiya, ngan gin-atubang niya* an peligro basi mag-ataman ha akon, nga diri niyo mahihimo kay waray kamo didi.
Mga footnote
^ Ha literal, “nagkakaurosa ha kalag.”
^ Ha literal, “nakita ha dagway han tawo.”
^ Kitaa an Apendise 6.
^ O “pagserbisyo ha publiko.”
^ Ha literal, “malipay an kalag.”
^ Ha literal, “han iya kalag.”
