Filipos 3:1-21
3 Ha kataposan, mga kabugtoan ko, padayon nga magkalipay kamo ha Ginoo. Diri ako ginkakapoy pagsurat ha iyo han amo gihapon nga mga butang, kay proteksyon ito ha iyo.
2 Pag-ikmat kamo ha kaayaman,* pag-ikmat ha mga nagbubuhat han nakakadaot, ngan pag-ikmat ha mga nagsasamad han unod.*
3 Kita an totoo nga mga ginturi, kay nagbubuhat kita han sagrado nga pag-alagad pinaagi han espiritu han Dios, ngan iginhahambog naton hi Kristo Jesus ngan diri naton iginbabasar ha unod an aton pagsarig,
4 bisan kon mas may mga hinungdan ako ha pagsarig ha unod kay ha bisan hin-o.
Kon may bisan hin-o nga naghuhunahuna nga may mga hinungdan hiya ha pagsarig ha unod, labi na gud ako:
5 ginturi ha ikawalo ka adlaw, tulin han Israel, tikang ha tribo ni Benjamin, Hebreo nga anak han mga Hebreo; mahitungod han pagsunod ha balaud, Pariseo ako hadto;
6 mahitungod han pagin aktibo, gintimaraot ko an kongregasyon; mahitungod han pagkamatadong pinaagi han balaud, ginpamatud-an ko nga waray ikasaway ha akon.
7 Pero an mga butang nga may bentaha ha akon, ginhunahuna ko nga waray pulos* tungod han Kristo.
8 Oo, mahitungod hito, gintatagad ko gud liwat nga waray pulos an ngatanan nga butang tungod han pinakabirilhon nga kahibaro mahitungod kan Kristo Jesus nga akon Ginoo. Tungod ha iya ginsalikway ko an ngatanan nga butang ngan gintatagad ko ito sugad nga mga basura, basi magkaada ako duok nga relasyon ha Kristo
9 ngan magin kahiusa niya, diri tungod han akon pagkamatadong pinaagi han pagsunod ha balaud, kondi tungod ha pagkamatadong pinaagi han pagtoo ha Kristo—an pagkamatadong tikang ha Dios nga iginbasar ha pagtoo.
10 Katuyoan ko nga mahibaro mahitungod ha iya ngan han gahum han iya pagkabanhaw ngan makiangbit ha iya mga pag-antos, ngan andam ako mamatay pariho han iya kamatayon,
11 basi masiguro kon posible gud nga makarawat ko an una nga pagkabanhaw tikang ha mga patay.
12 Diri nga nakarawat ko na ito o perpekto na ako, kondi nangangalimbasog ako basi makab-ot ko gud ito, nga tungod hito ginpili* ako ni Kristo Jesus.
13 Mga kabugtoan, diri ko ginhuhunahuna nga nakaptan ko na ito, pero usa nga butang an sigurado: Ginkakalimtan ko an mga butang nga ginbayaan ngan gin-aabot ko an mga butang ha unhan,
14 ngan nangangalimbasog gud ako nga makab-ot an akon tumong basi makarawat an premyo nga langitnon nga pagtawag han Dios pinaagi kan Kristo Jesus.
15 Salit an mga hamtong ha aton magkaada unta hini nga disposisyon; ngan kon diri sugad hini an iyo panhunahuna ha anoman nga paagi, ipapahayag ha iyo han Dios an husto nga disposisyon.
16 Pero anoman nga pag-uswag an aton nahimo, padayon kita nga maglakat hin husto ha amo gihapon nga paagi.
17 Mga kabugtoan, urosa nga magsubad kamo ha akon ngan kitaa niyo pirme an mga nagkikinabuhi uyon ha susbaranan nga amon iginpakita ha iyo.
18 Kay damu an agsob ko unabihon hadto pero yana nagtatangis ako kon gin-uunabi ko hira, kay nagkikinabuhi hira sugad nga mga kaaway han pasakitan nga kahoy* han Kristo.
19 Kabungkagan an ira kataposan, ngan an ira dios amo an ira tiyan, ngan iginhahambog nira an mga butang nga angay nira ikaawod, ngan ira ginhuhunahuna an mga butang ha kalibotan.
20 Pero ha langit an aton pagkatuminungnong, ngan may paghandom nga ginpapamulat naton an paratalwas tikang didto, an Ginoo nga hi Jesu-Kristo,
21 nga magamit han iya daku nga gahum ha pagbag-o han aton maluya nga lawas basi magin pariho han iya mahimayaon nga lawas, ngan ha pagsakop han ngatanan nga butang.
Mga footnote
^ Karuyag sidngon, imoral ngan maraot nga mga tawo.
^ An “mga nasuporta ha pagturi.”
^ O “kinaburut-on nga iginsalikway.”
^ Ha literal, “ginkaptan.”
^ Kitaa an Apendise 6.
