2 Timoteo 3:1-17
3 Pero hibaroi ini nga ha kataposan nga mga adlaw maabot an peligroso gud nga mga panahon nga makuri pakiangayan.
2 Kay an mga tawo magigin mahigugmaon ha ira la kalugaringon, mahigugmaon ha kwarta, hambog, daku an buot, mapasiparahon, diri-masinugtanon ha mga kag-anak, diri mapasalamaton, diri maunungon,
3 waray gugma ha mga kapamilya, diri naruruyag ha bisan ano nga pakigsabot, mga parapakaraot, waray pagpugong ha kalugaringon, mapintas, waray gugma ha kaopayan,
4 mga traydor, matig-a an ulo, mapahitas-on, mahigugmaon ha kalipayan imbes nga mahigugmaon ha Dios,
5 ngan diosnon pagkit-on, pero diri nagkikinabuhi uyon ha gahum hito; paglikay hini ngatanan.
6 Kay ha ira nagtitikang an mga tawo nga tuso nga nasulod ha mga panimalay ngan ginbibihag nira an maluya nga kababayin-an nga nadadaog han ira mga sala, nadadara han iba-iba nga mga hingyap,
7 pirme nag-aaram pero diri gud nagkakaada husto nga kahibaro ha kamatuoran.
8 Hira liwat padayon nga nakontra ha kamatuoran pariho kanda Jannes ngan Jambres nga kinontra kan Moises. An sugad nga mga tawo bug-os nga nadaot an panhunahuna, ngan diri nalilipayan han Dios kay diri hira nagkikinabuhi uyon ha pagtoo.
9 Labot pa, diri hira mag-uuswag, kay an ira kalurongan makikita gud han ngatanan, pariho ha kalurongan hiton duha nga lalaki.
10 Pero ikaw, ginsunod mo hin maopay an akon igintutdo, an akon pagkinabuhi, an akon katuyoan, an akon pagtoo, an akon pagkapasensyoso,* an akon gugma, an akon pagpailob,
11 ngan maaram ka han mga pagtimaraot ngan mga pag-antos nga akon naeksperyensyahan ha Antiokia, ha Iconio, ngan ha Listra. Gin-ilob ko ini nga mga pagtimaraot, ngan gintalwas ako han Ginoo tikang hini ngatanan.
12 Ha pagkamatuod, pagtitimarauton liwat an ngatanan nga naruruyag magkinabuhi nga may debosyon ha Dios sugad nga mga disipulo ni Kristo Jesus.
13 Pero an magraot nga tawo ngan mga impostor mas magtitikaraot pa gud, nanlilimbong ngan nalilimbongan.
14 Pero ikaw, padayon nga buhata an mga butang nga imo hinbaroan ngan nakombinse ka nga toohan, kay maaram ka kon hin-o an nagtutdo hito ha imo
15 ngan tikang ha imo katawo hinbaroan mo an baraan nga mga sinurat, nga nakakabulig ha imo nga magin maaramon para ha katalwasan pinaagi han pagtoo kan Kristo Jesus.
16 An ngatanan nga Kasuratan giniyahan han Dios ngan mapulsanon ha pagtutdo, ha pagsaway, ha pagtadong, ngan ha pagdisiplina uyon ha katadongan,
17 basi an surugoon han Dios magin bug-os nga may-kapas, andam gud ha tagsa nga maopay nga buhat.
Mga footnote
^ O “hilawig nga pagpailob.”
