2 Timoteo 2:1-26
2 Salit anak ko, padayon nga magkaada ka hin kusog pinaagi han diri-matupngan nga pagkabuotan nga nagtitikang ha pagin kahiusa ni Kristo Jesus.
2 Ngan mahitungod han mga butang nga imo nabatian ha akon nga ginsuportahan hin damu nga saksi, itapod ito nga mga butang ha matinumanon nga kalalakin-an, basi hira liwat magin kwalipikado gud ha pagtutdo ha iba.
3 Sugad nga maopay nga sundalo ni Kristo Jesus antosa an kasakitan.
4 Waray nagsusundalo nga nagninegosyo, basi mapalipay niya an nagpalista ha iya sugad nga sundalo.
5 Dugang pa, bisan ha mga pauyag, an bisan hin-o nga kaapi ha kompetisyon nga diri nasunod ha mga surundon diri gintatagan hin premyo.*
6 An maduruto nga parag-uma kinahanglan amo an siyahan nga makaon han mga bunga.
7 Pirme hunahunaa an akon ginsisiring, ngan tatagan ka han Ginoo hin pagsabot* ha ngatanan nga butang.
8 Hinumdumi nga hi Jesu-Kristo ginbanhaw ngan tulin* hiya ni David, sumala ha maopay nga sumat nga akon iginsasangyaw,
9 nga tungod hito nag-aantos ako ngan ginpriso nga sugad hin magburuhat hin maraot. Pero an pulong han Dios diri nakagapos.
10 Tungod hito padayon nga gin-iilob ko an ngatanan tungod han mga pinili, basi makarawat liwat nira an katalwasan pinaagi kan Kristo Jesus upod an waray kataposan nga himaya.
11 Masasarigan ini nga ginsiring: Ha pagkamatuod, kon mamatay kita kaupod niya, mabubuhi liwat kita kaupod niya;
12 kon padayon nga magpailob kita, maghahadi liwat kita kaupod niya; kon ignigar naton hiya, igninigar liwat kita niya;
13 bisan kon kita diri-matinumanon, nagpapabilin hiya nga matinumanon, kay diri niya kukontrahon an iya kalugaringon.
14 Pirme hira pahinumdoma hini nga mga butang, ha atubangan han Dios tutdui hira* nga diri mag-araway mahitungod han mga pulong, kay waray gud ito kapulsanan tungod kay nakakadaot ito ha mga namamati.
15 Buhata an imo bug-os nga mahihimo nga uyonan ka han Dios, sugad nga magburuhat nga waray iginkakaawod, nga igintututdo ngan iginsasaysay an pulong han kamatuoran ha husto nga paagi.
16 Pero paglikay ha waray pulos nga iristorya nga supak ha kon ano an baraan; kay mas makakadugang ito han pagin diri-diosnon,
17 ngan an ira pulong magsasarang pariho hin gangrena.* Hira Himeneo ngan Fileto kaupod
18 han mga binaya ha kamatuoran, kay nasiring hira nga nahitabo na an pagkabanhaw, ngan gindadaot nira an pagtoo han iba.
19 Bisan pa hito, padayon nga natindog an marig-on nga pundasyon han Dios nga may nakasurat sugad nga selyo: “Kilala ni Jehova an iya mga gintatag-iya,” ngan: “Sadang isalikway han ngatanan nga natawag ha ngaran ni Jehova an pagkadiri-matadong.”
20 Ha usa nga daku nga balay may mga surudlan nga diri la hinimo ha bulawan ngan silber kondi hinimo liwat ha kahoy ngan lapok, ngan an iba para ha dungganon nga katuyoan pero an iba para ha diri dungganon nga katuyoan.
21 Salit an bisan hin-o nga naglilikay ha diri dungganon nga katuyoan, magigin surudlan hiya para ha dungganon nga katuyoan, ginbaraan, mapulsanon ha nagtatag-iya ha iya, ngan andam ha tagsa nga maopay nga buhat.
22 Kon sugad, paglikay ha mga hingyap han pagkabatan-on, lugod talinguhaa an pagkamatadong, pagtoo, gugma, kamurayawan, upod han mga natawag ha Ginoo nga may limpyo nga kasingkasing.
23 Paglikay liwat ha linurong ngan waray pulos nga mga debate, kay maaram ka nga nagriresulta ito hin mga araway.
24 Kay an uripon han Ginoo diri kinahanglan makig-away, lugod kinahanglan magin buotan ha ngatanan, kwalipikado ha pagtutdo, nagpupugong ha kalugaringon kon ginbubuhatan hin maraot,
25 ngan may pagkamalumo nga nagtututdo ha mga rebelyoso, kay bangin itugot han Dios nga magbag-o an ira kasingkasing,* basi magkaada hira husto nga kahibaro ha kamatuoran,
26 ngan basi mahibalik an ira maopay nga panhunahuna ngan makapalagiw ha lit-ag han Yawa, kay iya hira nadakop nga buhi basi magbuhat han iya kaburut-on.
Mga footnote
^ O “ginkukoronahan.”
^ O “husto nga pagturotimbang.”
^ O “binhi.”
^ Ha literal, “pagpamatuod hin maopay ha ira.”
^ O “samad nga nakakadunot han unod.”
^ O “magbasol.”
