2 Timoteo 4:1-22
4 Ha atubangan han Dios ngan ni Kristo Jesus, nga maghuhukom han mga buhi ngan mga patay, ngan pinaagi han iya pagpakita ngan han iya Ginhadian, seryoso nga ginsusugo ko ikaw
2 nga isangyaw an pulong, ayaw paglangan ha pagbuhat hini ha maopay nga mga panahon ngan ha makuri nga mga panahon, pagsaway, pagpahamangno, pagsagdon, ngan buhata ini nga may pagkapasensyoso ngan arte ha pagtutdo.
3 Kay maabot an panahon nga an mga tawo diri mamamati han makapahimsog nga katutdoan, kondi basi masunod an ira mga hingyap, maruruyag hira nga palibotan hira hin mga magturutdo nga maggigitik han ira mga talinga.*
4 Diri hira mamamati han kamatuoran, ngan maghahatag hin atensyon ha buwa nga mga istorya.
5 Pero ikaw, tipigi an imo maopay nga panhunahuna ha ngatanan nga butang, antosa an kakurian, buhata an buruhaton han ebanghelisador,* bug-os nga tumana an imo sagrado nga buruhaton.
6 Kay iginhuwad na ako pariho hin halad nga irimnon, ngan hirani na an panahon han akon paggawas.
7 Nakig-away ako han maopay nga pakig-away, natapos ko an rumba, ngan gintipigan ko an pagtoo.
8 Tikang yana nakareserba na ha akon an korona han pagkamatadong sugad nga premyo, nga ha itinanda nga adlaw ihahatag ha akon han Ginoo, an matadong nga hukom, pero diri la ha akon kondi ha ngatanan liwat nga nagpapamulat han iya pagpakita.
9 Pangalimbasog gud nga makakadi ka dayon,
10 kay ginbayaan ako ni Demas tungod kay nahigugma hiya hini nga sistema, ngan kinadto hiya ha Tesalonica; hi Cresente kinadto ha Galacia, ngan hi Tito kinadto ha Dalmacia.
11 Hi Lucas la an akon kaupod didi. Iupod hi Marcos, kay daku hiya nga bulig ha akon ha sagrado nga buruhaton.
12 Pero ginpakadto ko hi Tiquico ha Efeso.
13 Pagkadi mo, dad-a an kurigmos nga ginbilin ko kan Carpo ha Troas, ngan an mga linukot nga basahon, labi na an mga pergamino.*
14 Hi Alejandro nga panday hin tumbaga* nagbuhat hin damu nga karaotan ha akon. Hi Jehova an mabulos ha iya uyon ha iya mga buhat.
15 Pag-ikmat liwat ha iya, kay nakontra gud hiya ha aton mensahe.
16 Ha akon siyahan nga pagdepensa waray dinapig ha akon, lugod ginbayaan ako nira ngatanan—hinaot diri hira magkaada baratunon.
17 Pero an Ginoo tinindog hirani ha akon ngan gintagan ako hin gahum, basi pinaagi ha akon bug-os nga matuman an pagsangyaw ngan makabati hito an ngatanan nga nasud; ngan gintalwas ako tikang ha baba han leon.
18 An Ginoo magtatalwas ha akon tikang ha ngatanan nga karaotan ngan magtitipig ha akon para ha iya Ginhadian ha langit. Magin iya unta an himaya ha kadayonan. Amen.
19 Ipaabot an akon pangumusta kanda Prisca ngan Aquila ngan ha panimalay ni Onesiforo.
20 Hi Erasto nagpabilin ha Corinto, pero ginbayaan ko hi Trofimo ha Mileto kay may sakit hiya.
21 Pangalimbasog gud pagkadi antes han kathagkot.
Nangungumusta ha imo hi Eubulo, sugad man hira Pudente, Lino, Claudia, ngan an ngatanan nga kabugtoan.
22 Hinaot bendisyonan han Ginoo an maopay nga espiritu nga imo iginpapakita. Makarawat unta niyo an iya diri-matupngan nga pagkabuotan.
Mga footnote
^ O “magsusumat ha ira han karuyag nira mabatian.”
^ O “padayon nga isangyaw an maopay nga sumat.”
^ Anit nga linukot nga mga basahon.
^ Ha English, copper.
