2 Pedro 3:1-18
3 Mga hinigugma, ini an akon ikaduha nga surat ha iyo. Pariho ha akon una nga surat ginpupukaw ko an iyo abilidad ha paghunahuna hin maopay pinaagi hin pahinumdom,
2 basi hinumdoman niyo an mga ginsiring hadto han baraan nga mga propeta ngan an sugo han Ginoo ngan Paratalwas pinaagi han mga apostol.*
3 Una ha ngatanan, hibaroi niyo nga ha kataposan nga mga adlaw maabot an mga paratamay nga magtatamay han maopay. Magpapadayon hira pagbuhat uyon ha ira mga hingyap
4 ngan masiring: “Hain na an iginsaad nga iya presensya? Kay tikang ha adlaw nga an aton kaapoy-apoyan nangaturog ha kamatayon, an ngatanan nga butang nagpapadayon nga amo la gihapon tikang pa ha paghimoa han kalibotan.”
5 Kay tinuyo nga ginbalewaray nira an kamatuoran nga hadto may mga langit ngan tuna nga natindog hin marig-on ha katubigan ngan ha butnga han katubigan pinaagi han pulong han Dios;
6 ngan pinaagi hito an kalibotan hito nga panahon nabungkag han nagkaada daku nga baha.
7 Pero pinaagi han amo gihapon nga pulong, an mga langit ngan an tuna yana nakareserba ha kalayo ngan gintitipigan tubtob ha adlaw han paghukom ngan han kabungkagan han diri-diosnon nga katawohan.
8 Kondi mga hinigugma, ayaw niyo ini hingalimti, nga an usa ka adlaw kan Jehova sugad hin 1,000 ka tuig ngan an 1,000 ka tuig sugad hin usa ka adlaw.
9 Hi Jehova diri naglalangan ha pagtuman han iya saad, sugad han ginhuhunahuna han iba nga mga tawo, pero nagpapailob hiya ha iyo kay diri niya karuyag nga mabungkag an bisan hin-o, lugod karuyag niya nga magbasol an ngatanan.
10 An adlaw ni Jehova maabot sugad hin kawatan. Hito nga panahon an mga langit mawawara nga may tigda nga daguhob,* kondi an mga elemento* matutunaw tungod han sobra nga kapaso, ngan an tuna ngan an mga buhat dida hito ibubuhayhag.
11 Tungod kay hito nga paagi matutunaw ito ngatanan nga butang, hunahunaa kon sadang magin ano nga klase kamo hin mga tawo may kalabotan ha baraan nga panggawi ngan ha mga buhat tungod han debosyon ha Dios,
12 samtang ginhuhulat ngan ginhuhunahuna niyo pirme an presensya han adlaw ni Jehova, nga hito nga panahon an mga langit mabubungkag ha kalayo, ngan an mga elemento matutunaw tungod han sobra nga kapaso!
13 Kondi ginpapamulat naton an iya iginsaad nga bag-o nga mga langit ngan bag-o nga tuna, ngan dida hito maukoy an katadongan.
14 Salit mga hinigugma, tungod kay nagpapamulat kamo hito nga mga butang, buhata an iyo bug-os nga mahihimo basi ha kataposan makita niya kamo nga waray-buring ngan waray-hugaw ngan may kamurayawan.
15 Dugang pa, hunahunaa nga an pagpailob han aton Ginoo nangangahulogan hin katalwasan, sugad han iginsurat ha iyo han aton hinigugma nga bugto nga hi Pablo sumala han kinaadman nga iginhatag ha iya.
16 Ha pagkamatuod, gin-unabi niya ini nga mga butang ha ngatanan nga surat niya. Kondi may mga bahin hito nga makuri masabtan, ngan ginbabaliko ito han mga ignorante ngan han diri-magrig-on, sugad han ira ginbubuhat ha iba nga bahin han Kasuratan, nga magriresulta ha ira mismo kabungkagan.
17 Salit mga hinigugma, tungod kay iyo na ini hinbaroan nga daan, magbantay kamo nga diri kamo mahisimang han matinalapason nga mga tawo pinaagi han ira kasaypanan ngan diri mawara an iyo mismo karig-on.
18 Lugod padayon nga mag-uswag kamo ha diri-matupngan nga pagkabuotan ngan ha kahibaro mahitungod han Ginoo ngan Paratalwas nga hi Jesu-Kristo. Magin iya unta an himaya yana ngan ha kadayonan.
Mga footnote
^ Ha literal, “iyo mga apostol.”
^ O “naghahaganas nga tunog.”
^ Karuyag sidngon, an mga elemento nga nagkukompwesto han mga langit.
