2 Pedro 1:1-21
1 Tikang kan Simon Pedro, nga uripon ngan apostol ni Jesu-Kristo, para ha mga nagkaada na hin pagtoo nga sugad kapresyoso han amon,* pinaagi han pagkamatadong han aton Dios ngan han Paratalwas nga hi Jesu-Kristo:
2 Mahura unta kamo han diri-matupngan nga pagkabuotan ngan kamurayawan pinaagi han husto nga kahibaro mahitungod han Dios ngan kan Jesus nga aton Ginoo,
3 kay pinaagi han gahum han Dios gintagan kita han ngatanan nga butang nga mabulig ha aton nga magkinabuhi nga may debosyon ha Dios pinaagi han husto nga kahibaro mahitungod ha iya nga nagtawag ha aton pinaagi han himaya ngan pagkamaopay.
4 Tungod han himaya ngan pagkamaopay, gintagan kita niya han presyoso ngan maopay gud nga mga saad, basi pinaagi hini magin mga espiritu kamo pariho han Dios, kay nakatalwas kita tikang ha karaotan han kalibotan nga resulta han diri-mapugngan nga malaw-ay nga hingyap.
5 Tungod hini, mangalimbasog gud kamo nga idugang ha iyo pagtoo an pagkamaopay, ha iyo pagkamaopay an kahibaro,
6 ha iyo kahibaro an pagpugong ha kalugaringon, ha iyo pagpugong ha kalugaringon an pagpailob, ha iyo pagpailob an debosyon ha Dios,
7 ha iyo debosyon ha Dios an minagburugto nga gugma, ngan ha iyo minagburugto nga gugma an gugma ha ngatanan nga tawo.
8 Kay kon ito nga mga kalidad aada ha iyo ngan hura kamo hito, mapupugngan kamo hito nga magin diri-aktibo o diri-mabungahon ha pag-aplikar han husto nga kahibaro mahitungod han aton Ginoo nga hi Jesu-Kristo.
9 Kay kon ini nga mga butang waray dida ha usa nga tawo, buta hiya, gintatahoban an iya mga mata* basi diri makita an kalamrag, ngan nagin limtanon hiya nga ginlimpyohan na hiya tikang ha mga sala nga iya nabuhat hadto.
10 Tungod hini, mga kabugtoan, buhata an iyo bug-os nga mahihimo basi magpabilin kamo nga matinumanon sugad nga mga tinawag ngan mga pinili; kay kon padayon nga ginbubuhat niyo ini diri gud kamo mapapakyas.
11 Ha pagkamatuod, hini nga paagi daku gud an magigin bendisyon ha iyo ngan makakasulod kamo ha waray kataposan nga Ginhadian han aton Ginoo ngan Paratalwas nga hi Jesu-Kristo.
12 Tungod hini magigin andam ako pirme ha pagpahinumdom ha iyo mahitungod hito, bisan kon maaram na kamo hito ngan marig-on na gud ha kamatuoran nga aada ha iyo.
13 Pero para ha akon, tama la nga aghaton ko kamo pinaagi hin mga pahinumdom samtang aadi pa ako hini nga tabernakulo,*
14 kay maaram ako nga diri mag-iiha babayaan ko ini nga tabernakulo, sugad han iginpasabot liwat ha akon han aton Ginoo nga hi Jesu-Kristo.
15 Salit bubuhaton ko pirme an bug-os ko nga mahihimo, basi kon bumaya na ako, mahinumdoman* niyo ini nga mga pahinumdom.
16 Han iginpahibaro namon ha iyo an gahum ngan presensya* han aton Ginoo nga hi Jesu-Kristo, waray ito ibasar ha buwa nga mga istorya nga tuso nga ginhimo han tawo, lugod kami mismo mga testigo nga nakakita han iya pagkaharangdon.
17 Kay nakarawat niya tikang ha Dios nga Amay an dungog ngan himaya, han ginsiring ha iya ini nga mga pulong* han mahimayaon nga Dios: “Ini an akon anak, nga akon hinigugma, nga akon nalilipayan.”
18 Oo, ini an mga pulong nga amon hinbatian tikang ha langit samtang kaupod kami niya ha baraan nga bukid.
19 Salit nagin mas marig-on an amon pagsarig ha tagna; ngan maopay gud nga gintatagan niyo ito hin atensyon sugad hin lampara nga naglalamrag ha masirom nga lugar, (tubtob ha kaagahon ngan pagsirang han bitoon ha kaadlawon,) ha iyo kasingkasing.
20 Kay maaram na kamo nga waray tagna ha Kasuratan nga nagtikang ha kalugaringon nga interpretasyon.
21 Kay waray pa gud tagna nga iginpahayag pinaagi han kaburut-on han tawo, lugod tikang ha Dios an ginyakan han mga tawo samtang ginigiyahan hira han baraan nga espiritu.
Mga footnote
^ O “may pribilehiyo nga pariho han amon.”
^ O “harap.”
^ Karuyag sidngon, “tunan-on nga lawas.”
^ O “maunabi.”
^ Kitaa an Apendise 5.
^ Ha literal, “tingog.”
