2 Pedro 2:1-22
2 Pero sugad la nga nagkaada buwa nga mga propeta dida ha katawohan, magkakaada liwat buwa nga mga magturutdo dida ha iyo. Patago nga magpapatikang hira hin makabungkag nga mga sekta ngan isasalikway pa ngani nira an agaron nga nagpalit ha ira, nga magriresulta han ira mismo madagmit nga kabungkagan.
2 Dugang pa, damu an magsusubad han ira mangil-ad nga mga buhat, ngan sugad nga resulta, an dalan han kamatuoran pakakarauton.
3 May kahakog nga sasalingabuton liwat nira nga makabentaha ha iyo pinaagi hin hinimo-himo nga mga istorya. Pero an paghukom ha ira nga hadto pa gindesisyonan, madagmit nga nagtitiarabot, ngan an ira kabungkagan sigurado nga maabot.
4 Waray gud mag-alang an Dios ha pagsirot ha mga anghel nga nakasala, ngan pinaagi han paglabog ha ira ngadto ha Tartaro,* gindara hira ha sobra kasirom nga higlarom nga buho basi maghulat han paghukom.
5 Waray hiya mag-alang pagsirot ha daan nga kalibotan, pero gintalwas niya hi Noe, nga parasangyaw han katadongan, upod an pito pa han ginpahinabo niya an daku nga baha ha kalibotan han diri-diosnon nga katawohan.
6 Ginsirotan niya an mga syudad han Sodoma ngan Gomorra pinaagi han pagsunoga hito tubtob nga nagin abo. Nagpapakita ito hin ehemplo kon ano an mahitatabo ha diri-diosnon nga mga tawo ha tidaraon.
7 Iya gintalwas an matadong nga hi Lot, nga nabido gud han mangil-ad nga paggawi* han matinalapason nga katawohan—
8 kay kada adlaw, an mga pagtalapas nga nakikita ngan nababatian hiton matadong nga tawo samtang nakikig-upod ha ira nagpapasakit gud han iya matadong nga kalag.
9 Salit maaram hi Jehova kon paonan-o tatalwason tikang ha kasakitan an katawohan nga may debosyon ha Dios, pero an diri-matadong nga katawohan iginlalain niya para ha kabungkagan* ha adlaw han paghukom,
10 labi na an mga nangangalimbasog nga hugawan an unod han iba ngan an mga nagtatamay han awtoridad.*
Tungod kay nag-iinsister han ira karuyag ngan matig-a an ulo, diri hira nahahadlok pagyakan hin maraot ha mga dungganon,
11 pero an mga anghel, bisan kon mas makusog hira ngan mas gamhanan, diri nag-aakusar ha buwa nga mga magturutdo pinaagi hin nakakainsulto nga mga pulong tungod han ira pagrespeto kan Jehova.
12 Pero ito nga mga tawo, nga pariho hin waray-buot nga mga hayop nga nagios la uyon ha kinaiya, nga igin-anak basi dakpon ngan patayon, nagyayakan hin nakakainsulto mahitungod han mga butang nga diri nira hinbabaroan. Mabubungkag hira tungod han ira mismo maraot nga mga buhat.
13 Mag-aantos hira hin kadaot sugad nga balos han ira mismo nakakadaot nga mga buhat.
Nalilipay gud hira ha pagpatakas ha mahimyang nga pagkinabuhi bisan kon adlaw. Mga buring hira ngan mga hugaw nga nalilipay gud* ha ira nakakalimbong nga mga katutdoan samtang nagkakalipay upod niyo.
14 An ira mga mata puno hin pag-adulteryo* ngan diri hira nakakabaya ha pagbinuhat hin sala, ngan ginsusulay nira an magluya nga kalag. Nabansay an ira kasingkasing ha kahakog. Mga anak hira nga iginsumpa.
15 Tungod kay binaya hira ha matadong nga dalan, nahisimang hira. Ginsunod nira an dalan han anak nga lalaki ni Beor nga hi Balaam, nga naruyag gud han balos ha pagbuhat hin sayop,
16 pero ginsaway hiya tungod han iya pagtalapas han husto. An maraot nga buhat han propeta ginpugngan hin diri nakakayakan nga hayop nga pantrabaho nga nagyakan pariho han tingog han tawo.
17 Pariho hira hin mga burabod nga waray tubig ngan mga dampog nga ginpapalid han makusog nga bagyo, ngan an sobra kadulom nga kasisidman naghuhulat ha ira.
18 Kay an ira may-paghambog nga panyakan waray pulos. Ngan pinaagi ha pagpukaw han makasasala nga mga hingyap ngan pinaagi han mangil-ad nga mga paggawi, ginsusulay nira an mga tawo nga nakalikay pa la ha mga nagkikinabuhi ha sayop nga paagi.
19 Nagsasaad hira hin kagawasan para ha ira, pero hira mismo uripon han sayop nga mga buhat. Kay kon an bisan hin-o nadadaog han iba, hiya nagigin uripon niya.*
20 Mas maraot pa gud kay han una an ira ultimo nga dadangatan kon mahidabi utro hira hini nga mga butang ngan madaog hito katapos nira makalikay ha mga kahugawan han kalibotan pinaagi han husto nga kahibaro mahitungod han Ginoo ngan Paratalwas nga hi Jesu-Kristo.
21 Kay mas maopay pa kon waray nira hibaroi hin bug-os an matadong nga dalan kay han talikdan an baraan nga kasugoanan katapos nira makarawat ito.
22 Nahitabo ha ira an ginsisiring han totoo nga proberbio: “An ayam binalik pagkaon ha iginsuka hito, ngan an baboy nga kinarigo na binalik paglublob ha lapok.”
Mga footnote
^ Kitaa an “Tartaro” ha Glossary.
^ Kitaa an “Mangil-ad nga paggawi” ha Glossary.
^ Ha literal, “pag-utod.”
^ O “nagmiminos han nagmamando.”
^ O “nagpapatakas ha waray-kontrol nga kalipayan.”
^ Kitaa an “Adulteryo” ha Glossary.
^ O “han usa nga butang, hiya nagigin uripon hito.”
