Ufayssiya Deˈuwaa Deˈanawu Ammanttiya Kaaletuwaa Awuppe Demmana Danddayiyoo?
Kasetiya huuphe yohotun beˈidoogaadan, qaaday, xoqqa timirttee, duretettaynne loˈˈo asa gidiyoogaa xallay ufayssiya deˈuwaa demmanawu maaddees giidi asay qoppiyo gishshawu hegaadan oottanawu baaxetiis. SHin hegaa malabatun ufayssaa demmanawu maliyoogee erenna sohuwa baanawu likke gidenna karttaa goˈettiyoogaa mala. Hegaa giyoogee ufayssaa demmanawu ammanttiya kaaletoy baawa giyoogee? Akkay!
OOPPENNE AADHDHIYAAGAAPPE DEMMIYO KAALETUWAA
Nuuni issibaa kuuyiyo wode, nuuppe bariyan woy eran aadhdhiya uraa darotoo zoriyaa oychchoos. Hegaadankka, nuuppe bariyaaninne eran keehi aadhdhiyaagaappe, ufayssiya deˈuwawu ammanttiya kaaletuwaa demmana danddayoos. Nuuni he zoriyaa 3,500 gidiya layttaappe kase xaafettida Geeshsha Maxaafaappe nabbabana danddayoos.
Neeni Geeshsha Maxaafan ammanettana danddayiyoy aybissee? Geeshsha Maxaafaa Xaafissidaagee saluwan saˈan deˈiya ooppenne bariyaaninne eran aadhdhiyaagaa gidiyo gishshataassa. Geeshsha Maxaafay A ‘Merinaasappe Deˈiyaagaa’ woy “merinaappe merinaa gakkanaayyookka” deˈiyaagaa giidi qonccissees. (Daaneela 7:9; Mazamure 90:2) Qassi I ‘salota medhdhida, biittaakka giigissida’ tumu Xoossaa. (Isiyaasa 45:18) I ba sunttay Yihoowa gidiyoogaa nuussi yootiis.—Mazamure 83:18.
Geeshsha Maxaafay, issi zaree woy wogay haraappe aadhdhees giidi yootenna. Gaasoykka, Geeshsha Maxaafaa xaafissidaagee asa ubbaa medhdhidaagaa gidiyo gishshataassa. An deˈiya zoree ubba wodekka maaddees; qassi kumetta saˈan deˈiya asa ubbaa goˈˈees. Geeshsha Maxaafay hara ay maxaafaappenne aaruwan daro qaalatun birshshettidanne keehi daro heeran deˈiya asawu gakkida maxaafa. * Hegaa gishshawu, ubbasan deˈiya asaykka A nabbabananne appe kaaletuwaa demmana danddayees. Hegee Geeshsha Maxaafay yootiyoobaara maayettiyaaba:
“Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa [nashshees.]”—OOSUWAA 10:34, 35.
Bantta naata siiqiyaanne etawu kaaletuwaa immiya yelidaageetugaadan, siiqiya nu Aawaa Yihooway ba Qaalaa Geeshsha Maxaafaa baggaara nuussi maaddiya kaaletuwaa yootees. (2 Ximootiyoosa 3:16) I nuna medhdhidaagaanne nuuni ufayttanaadan oottiyaabata eriyaagaa gidiyo gishshawu, A Qaalan ammanettana danddayoos.
Hegaa mala deˈuwaa demmanawu neeni ay oottana koshshii? Kaalliya huuphe yohuwaa beˈa.
^ MENT. 6 Geeshsha Maxaafay birshshettidonne asawu gakkido hanotaabaa gujjada eranawu, www. jw.org saytiyan Amaarattuwan, GEESHSHA MAXAAFAA TIMIRTTETA > TAARIKIYAANNE GEESHSHA MAXAAFAA giyaagaa xeella.
^ MENT. 16 Gujjada eranawu Yihoowa Markkati attamido, Geeshsha Maxaafay Xoossaa Qaaleeyye Asa Qaalee? (Amaarattuwaa) giya maxaafaa shemppo 9 xeella. Ha maxaafaa www.jw.org saytiyan Intternneetiyan demmana danddayaasa. LAYBREERIYA > MAXAAFATANNE BROOSHURETA giyaagaa xeella.
Hageeta Beˈadii?
WOCHCHIYO KEELAA
Sinttanaabaa Xeelliyaagan Tumubaa
Xoossay saˈawunne an deˈana asawu yootidobay ne hidootaa minttees.
WOCHCHIYO KEELAA
Geeshsha Maxaafaa Kaaletoy Ha Wodiyan Maaddii?
Daqiiqan daqiiqan oorattabay darobay odettishin, 2,000 gidiya layttappe kase xaafettida Geeshsha Maxaafaa issi uri kaallana koshshanddeeshsha?
WOCHCHIYO KEELAA
Geeshsha Maxaafaanne Ne Sinttanaa De’uwaa
Ha ammanttenna alamiyan galla galla nuna gakkiya, nu sinttan de’iyaabaa mala metuwaa xoonanawu Xoossaa Qaalay maaddees. SHin Geeshsha Maxaafay maaddiyoy hegaa xallaana gidenna. Nu sinttanaa de’uwaabaakka loytti qonccissees.
