Naahooma 3:1-19
3 Asa suuttaa gussiya katameeyyo aayyeero!
A baletoynne bonqqee kumidooro.
A asaa shankkatiyogaa agga erukku!
2 Lissuwan shociyogeenne goomaa giirettay siyettees,Paray adaraasiyogeenne gaaree gurettiyogee beettees.
3 Paraa toggidaagee piriissees, bisoy phaphalqqi gees, tooraykka phoolees,Worido asati daro, qassi anhay guufettiis;Anhawu zawi baawa.
Asay anhatun xubettiiddi bees.
4 Hegee hanidoy bitaa godattiya, malanchchiyanne puulanchchiya,Dereta ba shaaramuxatettan, qassi so asaa ba bitan balettiyara,Shaaramuxiya ba shaaramuxatettan oottido darobaa gaasuwana.
5 Olanchchatu Goday Yihoowi hagaadan gees: “Hekko! Taani ne* bolli denddaas,Taani ne qamisiya pude qaarana;Taani dereti ne kalluwa,Qassi kawotettati ne kawushshaa beꞌanaadan oottana.
6 Taani miiriqabaa* ne bolli olana,Qassi nena kawushshana;Taani nena sheneyiyaba oottana.
7 Nena beꞌiya ubbay ne matappe woxxi xayananne hagaadan gaana:‘Nanawa baysa gidaasu!
Iyyo qarettanay oonee?’
Nena minttettanaageeta taani awuppe demmanee?
8 Nayle waarotu matan deꞌiya No-amoonappe* neeni aadhdhay?
O haattay dooddiis;I duretettay abbaa, qassi I dirssaykka abbaa.
9 Zawi baynna I wolqqawu gaasoy Toophphiyanne Gibxxe.
Nena maaddidaageeti Putanne Liibiya asata.
10 Shin O betissidosona;O omooddidi efiidosona.
Qassi I naata oge doona ubban* busakkidosona.
Bonchchettida I attuma asatu bolli saamaa yeggidosona,Qassi I gita asatu ubbaa tohuwa sanssalatan qachchidosona.
11 Hegaa bollikka neeni mattottana;Neeni qosettana.
Neeni ne morkkiyappe baqatiyosaa koyana.
12 Ne qatoti ubbay bayra ayfee teerido balasiya mittatu mala;Mittata qaattiyo wode, ayfee miyageetu doonan qoqqofettana.
13 Ne olanchchati ne giddon deꞌiya maccaasatu mala.
Ne biittaa penggeti ne morkketuyyo aakkidi dooyettana.
Ne penggeta gorddiyobata tamay maana.
14 Neeni doodettiyo wodiyawu haattaa duuqqa wotta!
Ne qatota mintta.
Torqqottiyasaa wodhdhada urqqaa yedhdha;Xuubiya medhdhiyobaa oyqqa.
15 Haray atto yankka, nena tamay maana.
Nena bisuwan qanxxi olana.
Booliya marati miyogaadan, bisoy nena maana.
Booliya maratudan coratta!
Ee, booliyadan coratta!
16 Neeni ne zalꞌꞌanchchata saluwa xoolinttetuppe aaruwan corayadasa.
Booliya maray ba gogaa qaaridi paalli bayees.
17 Nena naagiyageeti booliya mala,Qassi nena kaalettiyageeti shamꞌꞌi shamꞌꞌiya booliya mala.
Kinchchiyo gallassi eti shuchchaa kooppuwan shemppoosona,Shin away kiyiyo wode paalli bayoosona;Qassi eti deꞌiyosaa ooninne erenna.
18 Nenoo, Asoore kawuwawu, ne henttanchchata xiskkoy gophphayees;Bonchchettida ne asati bantta son deꞌoosona.
Ne asay deretu bolli laalettiis,Qassi eta shiishshiya uri baawa.
19 Ne bolli bashshay yiyo wode nena ooninne maaddenna.
Ne masunttay paxana danddayenna.
Nebaa siyiyaageeti ubbay bantta kushiya baqqana.Ayssi giikko, neeni cadda oyqqada meqettaa iitidoogan waayettibeennay oonee?”
