Naahooma 1:1-15
1 Nanawe bolli awaajjettidabaa: Elqqosha asa gidiya Naahoomi* beꞌido ajjuutaa maxaafaa:
2 Yihoowi ooninne A xallawu goynnanaadan koyiyanne halo kiyiya Xoossaa;Yihoowi haluwa kiyees, qassi hanqqettana hanees.
Yihoowi bana eqettiyageetu bolli haluwa kiyees,Qassi I ba morkketu bolli hanqqetti uttiis.
3 Yihoowi elle hanqqettenna, qassi A wolqqay gita,Shin Yihoowi bessiyagaadan qaxxayennan mule aggenna.
I yiyo wode bashshiya carkkoynne gotee denddees,Qassi A tohuwappe garssaara shaaray buhedan denddees.
4 I abbaa seerees, qassi melissees;I shaafati ubbay melanaadan oottees.
Bashanaaninne Qarmmelosan mokkidabay shullees,Libanosa ciishshaykka shullees.
5 A gaasuwan dereti qaaxxoosona,Zumbbullatikka* seeroosona.
A somꞌꞌuwappe denddidaagan saꞌay qaaxxana,Hegaadankka, biittaynne aani deꞌiya ubbabay qaaxxana.
6 I hanqqettin A sinttan ooni eqqana danddayii?
Qassi A hanqquwa suuluwa danddayanay oonee?
A hanqqoy tamaadan eexxana,Qassi A gaasuwan zaallati meꞌerettana.
7 Yihoowi loꞌꞌo, I meto gallassi mino qato.
I baakko baqatanawu* koyiyageetuyyo qoppees.*
8 I wolqqaama diꞌuwan Nanawe* muleera xayssana,Qassi A morkketa xumay yedettana.
9 Yihoowa bolli intte ay maqettanee?
I muleera xayssiiddi deꞌees.
Metoy naaꞌꞌantto denddenna.
10 Eti agunttaadan dadetti uttidosona,Eti ushshaa* uyidi mattottidaageetu mala;Shin eti melida dalaadan* xuugettana.
11 Yihoowa bolli iitabaa maqqiya,Qassi pattennabaa zoriya uri neeppe kiyana.
12 Yihoowi hagaadan gees:
“Eti kumetta wolqqay deꞌiyogeetanne cora gidikkokka,Qanxxettananne kichchana.*
Taani nena* barchchiya bessaas, shin hegaappe simmin barchcheyikke.
13 Taani A qambbaraa menttada ne bollappe diggana,Qassi neeni qashettidobaa naaꞌꞌu kessa duuttana.
14 Yihoowi nebaa* hagaadan maaciis:‘Ne sunttay zaarettidi denddenna.
Taani masettida misiletanne birata* hawultteta ne xoossatu keettaappe* xayssana.
Neeni pattennaba gidiyo gishshawu, taani neeyyo duufuwa bookkana.’
15 Hekko! Mishiraachchuwa yootiya,Qassi sarotettaa awaajjiya uri deretu bollaara yees.
Nenoo Yihudaa, ne baalata bonchcha, neeni geppidobaa pola,Ayssi giikko, pattenna uri ne giddoora zaarettidi mule kanttenna.
I muleera xayana.”
Footnotes
^ Birshshettay “Minttettiyagaa.”
^ Woykko “Qeeri deretikka.”
^ Woykko “banan sheephetanawu.”
^ Woykko “koyiyageeta xeellees.” Mise, “koyiyageeta erees.”
^ Mise, “I sohuwa.”
^ Woykko “gisttiya parssuwa.”
^ Woykko “utulaadan.”
^ Woykko geella, “I kanttana.”
^ Hegeekka, Yihudaa.
^ Hegeekka, Asoorebaa.
^ Woykko “seerissidi medhdhido.”
^ Woykko “beeta maqidasiyappe; garuwappe.”
