Imbbaaqooma 2:1-20
2 Taani ta naagiyosan eqqada deꞌashshana,Qassi taani mino gimbbiya bolli eqqana.
I ta baggaara ay haasayanaakko,Qassi taayyo seeray imettiyo wode taani ay zaaranaakko beꞌanawu aggennan wochchana.
2 He wode Yihoowi taayyo hagaadan zaariis:
“Ba qaalaa xoqqissidi nabbabiyagee metootennan* nabbabana mala,Ajjuutaa xaafa, qassi shuchchatu bolli hegaa geeshshada wooca.
3 Ayssi giikko, ajjuutay ba keerettida wodiya naagees,Hegee ba wurssettawu* eesotees, qassi hegee worddo gidanawu deꞌenna.*
Haray atto, hegee takkiyakkokka,* naagiyogaa aggoppa!*
Ayssi giikko, hegee tumuppe polettana.
Hegee gamꞌꞌenna!
4 Otorettiyagaa xeella;*I ba wozanan suure gidenna.
Shin xilloy ba ammanettiyogan* deꞌana.
5 Tumuppe, woynee balettiyo gishshawuAxiraariya urawu I halchchidobay polettenna.
I ba qaaqqaa* Duufuwadan* gita oottees;I hayquwa mala, qassi alana danddayenna.
I aggennan dereta ubbaa shiishsheesinneDeretetta ubbaa bawu ekkees.
6 Hageeti ubbay leemiso haasayaa, qanꞌꞌishiya, qassi akeekanawu metiyabata A bolli haasayanawu dookkonaa?
Eti hagaadan gaana:
‘Babaa gidennabaa dagayiyagawu—Awude gakkanaashin?—Qassi ba acuwa ubba yaa darissiyagawu aayyeero!
7 Neeni acotidoogeeti denddi agganawu dookkonaa?
Eti beegottananne nena buqana,Qassi neeni etawu bonqqiyoba gidana.
8 Attida deretetta ubbay nena bonqqana,Ayssi giikko, neeni daro dereta bonqqadasa,Neeni asaa suuttaa gussadasa,Qassi saꞌaa bashshadasa,Katamatanne etan deꞌiyageetakka bashshadasa.
9 Bashshaappe kessi ekkanawu giidiBa keettaa xoqqasan keexxanawu,Suure gidenna ogiyan ba keettaassi shiishshiyagawu aayyeero!
10 Neeni ne keettawu yeellaa ehiyabaa maqqadasa.
Daro deretettaa pittada xayssiyogan ne* bolli nagaraa oottadasa.
11 Ayssi giikko, gimbbiyappe shuchchay waassana,Qassi kaaraappe hootay hegaa kooshimmana.
12 Suuttaa gussiyogan katamaa keexxiyagawu,Qassi iitatettan katamaa essiyagawu aayyeero!
13 Hekko! Deretettay tamaa mizanawu minni oottanaadan,Qassi dereti coo mela daafuranaadan oottiyagee Olanchchatu Godaa Yihoowa gidennee?
14 Ayssi giikko, haattay abbaa kammiyogaadan,Saꞌay Yihoowa bonchchuwa eran kumana.
15 Eta kalluwa beꞌanawu giidi,Eta mattoyanawu, an yiilluwanne hanqquwa gujjidiBa laggetuyyo uyiyobaa immiyagawu aayyeero!
16 Neeni bonchchuwa gidennan kawushshaa kallana.
Neenikka uya, yaatada neeni qaxxarettabeennaagaa qoncciya kessa.*
Yihoowa ushachcha kushiyan deꞌiya wanccay ne mati yaana,Qassi ne bonchchuwa yeellay kammana;
17 Ayssi giikko, Libanosa bolli oottido danobay nena kammana,Qassi doꞌata shabbirida bashshay ne bolli yaana,Ayssi giikko, neeni asaa suuttaa gussadasa,Qassi saꞌaa bashshadasa,Katamatanne etan deꞌiyageetakka bashshadasa.
18 Issi uri massidi medhdhidoMasettida misilee ay maaddii?
Birataappe medhdhido misileenne* wordduwa asttamaaree ay maaddii?Eta medhdhiyagee etan ammanettiyaba gidikkokka,I medhdhiyobati pattenna duude xoossata.
19 Mittaa, “Beegotta” giyagawu,
Woy duude shuchchaa, “Beegotta! Nuna tamaarissa!” giyagawu aayyeero!
Hekko! I worqqaanne biraa tigidoogaa,Qassi shemppiyo ayba shemppoykka A giddon baawa.
20 Shin Yihoowi ba geeshsha keettan* deꞌees.
Saꞌa ubbawu, A sinttan coꞌꞌu ga!’”
Footnotes
^ Woykko “tololayidi.”
^ Woykko “poluwawu.”
^ Mise, “worddotenna.”
^ Woykko “takkiyaba milatiyakkokka.”
^ Woykko “yeemottada naaga!”
^ Woykko “Hekko! A shemppoy pugettiis.”
^ Woykko geella, “ba ammanuwan.”
^ Woykko “shemppuwa.”
^ Woykko “Shiꞌoliyadan,” hegeekka, asi ubbi moogettiyo sohuwa. Qonccissuwa xeella.
^ Woykko “ne shemppuwa.”
^ Woykko geella, “ganddigaara.”
^ Woykko “seerissi medhdhido hawultteenne.”
^ Woykko “beeta maqidasiyan; garuwan.”
