Imbbaaqooma 1:1-17

  • Hiraagaa yootiyagee maaduwawu waassidobaa (1-4)

    • “Godaa Yihoowaa, awude gakkanaashin?” (2)

    • “Naaquwa neeni coꞌꞌu gaada xeelliyoy aybissee?” (3)

  • Kaladata, Xoossay pirddaa polissiyo miishshata (5-11)

  • Hiraagaa yootiyagee Yihoowassi watiwatees (12-17)

    • ‘Ta Xoossawu, neeni hayqqakka’ (12)

    • ‘Neeni hanttaarabaa xeellenna mala, keehi geeshsha’ (13)

1  Hiraagaa yootiya Imbbaaqoomi* ajjuutan beꞌido awaajjuwa:  2  Godaa Yihoowaa, awude gakkanaashin taani maaduwawu neekko waassana bessii? Neeni ta yootiyobaa siyanay awudee? Awude gakkanaashin taani nena maaduwawu oychchana bessii? Neeni tana danobaappe ashshanay* awudee?  3  Taani iita oosuwa beꞌanaadan neeni oottiyoy aybissee? Qassi naaquwa neeni coꞌꞌu gaada xeelliyoy aybissee? Bashshaynne danobay ta sinttan deꞌiyoy aybissee? Qassi cabboynne karssikarssay daridoy aybissee?  4  Hegaappe denddidaagan, higgee aynne maaddennaba gidiis,Qassi suure pirdday mulekka baawa. Ayssi giikko, iitay xilluwa dooddiis;Suure pirdday geellattidoy hegaassa.  5  “Deretu giddo xeellite, qassi wudite! Malaalettidi tishshi ootti xeellitenne garamettite;Ayssi giikko, intte wodiyan issibay hanana,Hegee intteyyo odettiyakkokka intte ammanennaba.  6  Ayssi giikko, meqetti baynnanne kiirimmiya deriya,Kaladata hekko taani denttays. Eti banttabaa gidenna keettata bonqqi ekkanawu,Saꞌaa aaho sohota woraajjoosona.  7  Eti daganttiyageetanne yashshiyageeta. Eti bantta higgiya banttawu kessoosonanne maataa oyqqoosona.*  8  Eta parati maahetuppe aaruwan eesotoosona,Qassi eti qamma wanggireellotuppe aaruwan meqetta iita. Eta ola parati sinttawu piriixoosona,Eta parati haahuwappe yoosona. Eti miyobaa oyqqanawu eesotiya argganttaadan duge xonggettoosona.  9  Eti ubbay danobawu gixxi denddidaageeta. Eta somꞌꞌoti issippe shiiqiyo wode arshsho carkkuwa mala,Qassi eti omooddettidaageeta shafiyadan kaashoosona. 10  Eti kawotu bolli qilliiccoosona,Qassi xoqqa sunttatu bolli miiccoosona. Eti qato ubbaa bolli miiccoosona;Eti detuwa giigissidi A oyqqoosona. 11  Yaatidi, eti carkkuwadan sinttawu boosonanne yaara kanttoosona,Shin eti mooranchcha kiyana,Ayssi giikko, eti bantta wolqqay bantta xoossaappe yiidoogaa yootoosona.”* 12  Godaa Yihoowaa, neeni merinaasappe deꞌiyagaa gidikkii? Ta Xoossawu, ta Geeshshawu, neeni hayqqakka.* Godaa Yihoowaa, neeni ne pirddaa polissanawu eta sunttadasa;Ta Zaallawu, eta neeni qaxxayuwawu* giigissadasa. 13  Ne ayfeti hanttaarabaa xeellenna mala, keehi geeshsha,Qassi neeni iitatettaa coꞌꞌu ga xeellana danddayakka. Yaatin aybissi balettiya asaa coꞌꞌu ga xeellay,Qassi iita uri baappe aaruwan xillo gidida ura mittiyo wode, aybissi sirphphi gay? 14  Neeni asaa abbaa moliya mala,Haariyabi baynna zuummiyabatu mala aybissi oottay? 15  I* eta ubbaa moliya oyqqiyo piriyan pude goochchees. I eta ba gitiyan oyqqees,Qassi I eta moliya oyqqiyo ba gitiyan shiishshees. I keehi ufayttiyoy hegaassa. 16  Hegaa gishshawu, I ba gitiyawu yarshshuwa shiishshees,Qassi moliya oyqqiyo ba gitiyawu yarshshees;*Ayssi giikko, eta gaasuwan, A gakkiyagee keehi shica,Qassi A qumay muruta. 17  Yaatin I ubbatoo ba gitiyan kunttiiddinne qoliiddi* deꞌanee? I dereta qareti baynnan busakkiiddi deꞌanee?

Footnotes

^ Birshshettay “Wozanappe Qoommiyogaa” gidennan aggenna.
^ Woykko “kelttiya gelanay.”
^ Woykko “anggaa ekkoosona.”
^ Woykko geella, “eta wolqqay eta xoossaa.”
^ Woykko geella, “nuuni hayqqokko.”
^ Woykko “seerawu.”
^ Hegeekka, Kalada asa gidiya morkkiya.
^ Woykko “yarshshuwa cuwaa cuwayees.”
^ Woykko geella, “ba bisuwa shoddiiddi.”

Copyrights for this publication