Ibraawe Asaassi Xaafettidaagaa 6:1-20
6 Hegaappe denddidaagan, haꞌꞌi nuuni Kiristtoosabaa koyro tamaaridobata ammaniichchido gishshawu, gamma gakkanawu baaxetiyogaa aggana koshshenna; nuuni koyro timirtteta zaarettidi tamaarana* koshshenna; hegeetikka, zilꞌꞌetti laamettidi pattenna oosuwa aggiyogaanne Xoossaa ammaniyogaa,
2 muukettaabaanne kushiya wotuwabaa, hayqqidaageetu dendduwabaanne merinaa pirddaabaa timirttiya.
3 Qassi Xoossaa shene gidikko, nuuni hegaa oottana.
4 Issi wode pooꞌuwanne coo imettiya saluwa imotaa, qassi geeshsha ayyaanaa ekkidaageeta,
5 hegaa bollikka, Xoossaa loꞌꞌo qaalaa ekkidaageetanne sinttappe yaanabaa* wolqqaa beꞌidaageeta,
6 gidikkokka, ammanuwappe wora simmidaageeta haranttuwa zilꞌꞌettidi laamettanaadan maaddana danddayettenna; ayssi giikko, eti Xoossaa Naꞌaa mittaa bolli haranttuwa kaqqoosonanne asaa sinttan kawushshoosona.
7 Biittaa bolli darotoo bukkiya iray Xoossaa anjjo; he biittay iraa uyidi, oottida urawu loꞌꞌo kattaa ayfees.
8 Shin hegee aggunttaanne ohaa mokkikko aynne maaddenna, qassi mata wode qanggettananne wurssettan taman xuugettana.
9 Shin siiqo ishatoo, nuuni hegaa giikkonne, intte attanaadan maaddiyabaa oottiiddi deꞌiyogaa ammanettoos.
10 Ayssi giikko, Xoossay suurebaa oottees; hegaa gishshawu, intte geeshshatuyyo haggaazidoogaaninne haggaaziiddi deꞌiyogan oottidobaa, qassi A sunttaa siiqidoogaa I dogenna.
11 Shin intte naagiyobay polettanaagaa wurssettay gakkanaashin ammanettidi, intte ubbay hegaadan minnidi oottanaadan amottoos;
12 yaanikko, intte azallekketa, shin Xoossay immana giidobaa ammanuwaninne danddayan laattiyageetu mala gideeta.
13 Ayssi giikko, Xoossay Abrahaama anjjanaagaa yootido wode, appe aadhdhiyay mule baynna gishshawu banan caaqqiis;
14 I, “Taani tumu nena anjjananne tumu ne zerettaa corayana” yaagiis.
15 Qassi Abrahaami danddayan naagi simmidi, Xoossay immana giidobaa ekkiis.
16 Ayssi giikko, asay baappe aadhdhiya uran caaqqees; he caaqoy eti giidobay tuma gidiyogaa ammanttiyo gishshawu, palama ubbay hegan wurees.
17 Hegaadankka, Xoossay I immana giidobaa laattiyageetuyyo ba halchchoy* laamettennaagaa keehi qonccissi bessanawu maacido wode, hegaa caaquwan tumayiis;*
18 hegaappe denddidaagan, he naaꞌꞌubatun, Xoossay worddotana danddayennabatuuninne laamettennabatun A naaguwakko baqatida nuuni nu sinttan deꞌiya hidootan muleera ammanettanawu keehi minettana danddayoos.
19 Nuuyyo deꞌiya ha hidootay shemppuwawu* markkabiya techchaa mala; he hidootay sirissennanne mino, qassi nuna magalasho giddo gelissees;
20 merinawu Malkkixedeqa mala gita kahine gidida Yesuusi nuuyyo ogiya dooyiiddinne giigissiiddi nuuppe kasetidi yaa geliis.
