Ibraawe Asaassi Xaafettidaagaa 4:1-16
4 Xoossay nuuni haꞌꞌikka I shemppiyosaa gelana danddayiyogaa yootees. Hegaa gishshawu, I intteppe oonanne yaa gelana bessenna asadan xeellenna mala, nuuni naagettana* koshshees.
2 Ayssi giikko, nuuyyokka etaagaadan mishiraachchoy odettiis; shin hegaa siyida harati ammanidoogaadan eti ammanibeenna gishshawu, siyidobay eta maaddibeenna.
3 Qassi ammanida nuuni he shemppiyosaa geloos; ayssi giikko, I hagaadan giis: “Yaatin taani hanqqettada, ‘Eti taani shemppiyosaa gelokkona’ yaagada caaqqaas.” I saꞌaa doomettan* ba oosuwa wurssidaba gidikkonne, hegaadan giis.
4 Ayssi giikko, issi sohuwan laappuntta gallassaabaa hagaadan gees: “Qassi Xoossay laappuntta gallassi ba ooso ubbaappe shemppiis,”
5 qassikka I, “Eti taani shemppiyosaa gelokkona” yaagiis.
6 Simi asay haꞌꞌikka yaa gelana danddayiyo gishshawunne mishiraachchoy koyro etawu odettidoogeeti azazettibeennaagaa gaasuwan gelibeenna gishshawu,
7 daro wodeppe guyyiyan Daawiti xaafido mazamuriyan I, “Hachchi” giidi, issi gallassaa haranttuwakka dummayiis; hegee qommoora odettidaagaadaana: “Hachchi, intte I yootiyobaa siyikko, intte wozanaa muumissoppite.”
8 Ayssi giikko, Yaasu eta kaalettidi shemppiyosaa gelissidaba gidiyakko, Xoossay hegaappe simmin hara gallassaabaa yootenna.
9 Hegaa gishshawu, Xoossaa asawu sambbataa shemppoy haꞌꞌikka deꞌees.
10 Ayssi giikko, Xoossay ba oosuwappe shemppidoogaadan, I shemppiyosaa gelida asikka ba oosuwappe shemppiis.
11 Hegaa gishshawu, nuuni he shemppiyosaa gelanawu nuuyyo danddayettida ubbabaa oottana koshshees; yaatikko, ooninne makkalida he asatu ogiyan hemettiyogaa doommenna.
12 Ayssi giikko, Xoossaa qaalay paxa deꞌeesinne wolqqaama, qassi naaꞌꞌu zooziyan qanxxiya ay mashshappenne aaruwan qarattees; haray atto, shemppuwanne* ayyaanaa,* hegaadankka, kuriyanne kolzziya shaakkanawu caddees, qassi nuuni nu wozanan qoppiyobaanne amottiyobaa bessana danddayees.
13 Hegaa bollikka, Xoossaa ayfiyappe geemmida issi meretinne baawa, shin nuuni ayyo zaarana bessiyo A sinttan ubbabay kallonne qoncci beettees.
14 Simi saluwa gelida gita kahinee, Xoossaa Naꞌay Yesuusi nuuyyo deꞌiyo gishshawu, nuuni A ammanananne abaa asawu ubbatoo yootana bessees.
15 Ayssi giikko, nu gita kahinee nuuni mino gidenna gishshawu nuuyyo qoppennaagaanne qarettennaagaa gidenna, shin I nuugaadan ubbaban paacettikkokka nagaraa oottibeenna.
16 Hegaa gishshawu, simi laggetiyabi baynna kehatettaa araataakko yayyennan shiiqoos; yaatikko, nuussi maadoy koshshiyo wode Xoossay nuuyyo qarettananne laggetiyabi baynna kehatettaa kehana danddayees.
