Ibraawe Asaassi Xaafettidaagaa 2:1-18
2 Nuuni siyidobata awudeegaappenne aaruwan qoppana koshshiyoy hegaassa; yaatikko, mule wora simmokko.
2 Ayssi giikko, kiitanchchatu baggaara odettida qaalay ammanettees, qassi hegaa kanttidi azazettibeenna asi suure ogiyan qaxxayettiis;
3 yaatin, nuuni ha gita atotettaabaa akeekan qoppana xayikko, waanidi qaxxayettennan attanee? Ayssi giikko, he atotettaabaa nu Goday yootiyogaa doommiis, qassi appe siyidaageeti hegaa nuuyyo yootidosona;
4 Xoossaykka malaatata, garamiyabatanne malaaliya dumma dummabata oottidinne ba sheniyadan geeshsha ayyaanaa gishidi hegaa markkattiis.
5 Ayssi giikko, kiitanchchati sinttappe asay deꞌanasaa, nuuni yootiyo saꞌaa haaranaadan Xoossay oottibeenna.
6 Shin issi markkay issi sohuwan hagaadan giis: “Neeni A hassayanawu asi aybee, woy neeni A xeellanawu asa naꞌi aybee?
7 Neeni A kiitanchchatuppe guuttaa ziqqissadasa; ayyo gitatettaanne bonchchuwa woytuwa immadasa, qassi ne kushee oottidobaa bolli A sunttadasa.
8 Neeni ubbabay A maatan haarettanaadan oottadasa.” Xoossay ubbabaa ayyo haarissido wode, ayyo haarissennan aggidobi baawa. Shin haꞌꞌi ubbabay ayyo haarettin beꞌiichchibookko.
9 Gidoppe attin, Xoossay kiitanchchatuppe guuttaa ziqqissido Yesuusi hayqqana gakkanaashin waayettido gishshawu, haꞌꞌi gitatettaanne bonchchuwa woytuwa ekkida A beꞌoos. Laggetiyabi baynna Xoossaa kehatettan I asa ubbawu hayqqiis.
10 Ubbabay Xoossaayyonne Xoossan deꞌees. Daro naata gitayanawu, nu ammanuwan nuna kaalettiyagee waayettanaadan Xoossay anttiyogee* bessiyaba. Hegaa gishshawu, I yaanidi eta ashshanawu danddayiyagaa gidiis.
11 Ayssi giikko, ubbaa aaway, geeshshiya Yesuusaageekka geeyiyageetuugeekka issuwa; hegaappe denddidaagan, I eta ishatoo gaanawu yeellatenna;
12 I, “Taani ne sunttaa ta ishatuyyo awaajjana; galchchaa giddon nena yettan sabbana” yaagees.
13 Qassi, “Taani an ammanettana” yaagees. Hegaa bollikka, “Hekko! Tananne Yihoowi* taayyo immido naata” yaagees.
14 Hegaa gishshawu, ‘naati’ suuttappenne ashoppe merettidoogaadan, ikka hegaadan merettiis; hegaappe denddidaagan, I hayqqido gishshawu, worana danddayiya Dabloosa xayssana danddayees;
15 qassi hayquwa yayyiyo gishshawu bantta deꞌo laytta ubban aylledan deꞌidaageeta ubbaa I laꞌa kessana danddayees.
16 Ayssi giikko, I maaddiiddi deꞌiyoy Abrahaama zerettaappe attin, kiitanchchata gidokkona.
17 Hegaa gishshawu, I ubbaban ba “ishata” milatana koshshiis; hegaappe denddidaagan, I asaa nagaraa gishshawu Xoossaara eta sigettiya* yarshsho oottidi bana aatti immanawu, Xoossaara gayttidabatun maariyanne* ammanettiya gita kahine gidana danddayees.
18 I paacettiyo wode waayettido gishshawu, paacettiiddi deꞌiyageeta maaddana danddayees.
