Kha luimbo lwawe lu rendaho Musiki, Khosi Davida wa Isiraele ḽa kale o imba a ri: “Zwi ntakadzaho ndi u ita zwiné Iwe Mudzimu wanga wa zwi funa; mulayo wau u mbiluni yanga.” (Ps. 40:8) Hu sa londwi vhuleme na mutsiko we a sedzana nawo vhutshiloni hawe, Davida o vha a tshi takalela u ita zwine Mudzimu a zwi funa. Vhukuma, Davida o vha e si ene mugwadameli wa Yehova e eṱhe we a vha a tshi takalela u shumela Mudzimu wa ngoho.

Musi a tshi shumisa maipfi a re kha Psalme ya 40:8 kha Messia kana Kristo, muapostola Paulo o ṅwala uri: “Musi [Yesu] a tshi ḓa shangoni o ri: ‘A wo ngo ṱoḓa tshiṱhavhelo na tshipfumelelo, fhedzi wo nndugisela muvhili. A wo ngo takalela zwipfumelelo zwoṱhe zwa u fhiswa na tshipfumelelo tsha tshivhi.’ Nda mbo ri, ‘Ndo ḓa (ho ṅwalwa nga ha nṋe kha mupombo wa bugu) u ita zwine wa zwi funa.’”—Vhaheb. 10:5-7.

Musi Yesu a tshee kha ḽifhasi, o vha a tshi takalela u vhona tsiko, u vha na dzikhonani na u ḽa na vhaṅwe zwiḽiwa. (Mat. 6:26-29; Yoh. 2:1, 2; 12:1, 2) Naho zwo ralo, zwe a vha e na dzangalelo ḽihulu khazwo na zwe a vha a tshi zwi takalela vhukuma, ho vha hu u ita zwine Khotsi awe a zwi funa. Yesu o ri: “Zwiḽiwa zwanga ndi u ita zwi funwaho nga o nthumaho na u vuledza mushumo wawe.” (Yoh. 4:34; 6:38) Vhafunziwa vha Yesu vho guda kha Muṋe wavho tshiphiri tsha dakalo ḽa vhukuma. Nga dakalo ḽihulu, vho ḓiimisela na u fhisetshela u vhudza vhaṅwe mulaedza wa Muvhuso.—Luka 10:1, 8, 9, 17.

Yesu o ṋea vhatevheli vhawe ndaela ya uri: “Iyani ni ite vhathu vha tshaka dzoṱhe vhafunziwa, ni vha lovhedze dzinani ḽa Khotsi na ḽa Murwa na ḽa muya mukhethwa, ni vha funze u tevhedza zwoṱhe zwe nda ni laya. Ni humbule uri ndi na inwi misi yoṱhe u swika vhufheloni ha ano maitele a zwithu.” (Mat. 28:19, 20) U ita yeneyi ndaela zwi katela u huwelela kha vhathu hune vha nga wanala hone, u ita nyendo dza u vhuyelela kha vhe vha sumbedza dzangalelo na u fara pfunzo dza Bivhili na vhenevho vhathu. U ita wonoyo mushumo zwi nga vha tshisima tsha dakalo ḽihulwane.

 Hu sa lwondwi uri vhathu vha sumbedza dzangalelo kha mushumo washu kana hai, mavhonele ashu avhuḓi ndi a ndeme kha u wana dakalo vhuḓinḓani. Ndi ngani ri tshi bvela phanḓa ri tshi ḓivhadza mafhungo maḓifha naho ri tshi sedzana na vhathu vha si na dzangalelo? Ngauri ri ṱhogomela uri u huwelela nga ha Muvhuso na mushumo wa u ita vhafunziwa zwi sumbedza uri ri funa Mudzimu na vhane ra huwelela khavho. Vhukuma, vhutshilo vhu khomboni—hashu na ha vhane ra huwelela khavho. (Hesek. 3:17-21; 1 Tim. 4:16) Kha ri ṱolisise dziṅwe mbuno dze dza thusa vhunzhi ha vhashumisani nga riṋe u itela u dzula vha tshi tikedza kana u fhisetshela vhuḓinḓa tsimuni ine ya konḓa.

U shumisa mbudziso dzo teaho vhuḓinḓani hashu kanzhi zwi ita uri hu vhe na mvelelo dzavhuḓi. Ḽiṅwe ḓuvha nga matsheloni Amalia o vhona muṅwe munna phakhani a tshi khou vhala gurannda. A ya khae nahone a mu vhudzisa arali o no vhala mafhungo maḓifha kha yeneyo gurannda. Musi a tshi mu vhudza uri ha athu u vhala mafhungo maḓifha, Amalia a ri: “Nṋe ndo ni farela mafhungo maḓifha a Muvhuso wa Mudzimu.” Zwenezwo zwo ita uri onoyo munna a vhe na dzangalelo na u ṱanganedza pfunzo ya Bivhili. Zwi re zwone ndi uri Amalia o kona u thoma pfunzo tharu dza Bivhili kha yeneyo phakha.

Janice o ita uri fhethu hune a shuma hone hu vhe tsimu yawe. Musi mulindi na mulindi ngae vha tshi sumbedza u vha na dzangalelo kha thero i re kha khandiso ya Tshiingamo, Janice o vha fulufhedzisa uri u ḓo vha ṋea dzimagazini tshifhinga tshoṱhe. O ita zwi fanaho na kha muṅwe mushumisani ngae we a vha o nyanyulea nga thero dzo fhamba-fhambanaho dzo haseledzwaho kha Tshiingamo na Awake! Zwenezwo zwo ita uri na muṅwe mushumisani ngae a humbele dzimagazini. Janice o amba uri: “Yeneyo ndi phaṱhutshedzo nngafhani i bvaho ha Yehova!” Mafheleloni o vha na vhathu vha 11 vhane a vha tshimbidzela magazini mushumoni.

Mulavhelesi a dalelaho o ṱuṱuwedza uri vhuḓinḓani ha nnḓu nga nnḓu, vhahuweleli a vho ngo fanela u phetha nyambedzano yavho na ṋemuḓi nga u sokou amba uri vha ḓo vhuya ḽiṅwe ḓuvha. Nṱhani hazwo, vha nga vhudzisa ṋemuḓi uri: “Naa ni nga takalela uri ndi ni sumbedze nḓila ine pfunzo ya Bivhili ya farwa ngayo?” kana, “Ndi ḽifhio ḓuvha na tshifhinga tshine na ṱoḓa ndi tshi vhuya ngatsho u itela u bvela phanḓa na nyambedzano yashu?” Mulavhelesi a dalelaho o vhiga uri nga u shumisa eneo maambele, vhaṅwe vhahashu vha tshinnani na vha tshisadzini kha tshivhidzo tshe a vha o tshi dalela, vho thoma pfunzo dza Bivhili dza hayani dza 44 nga vhege nthihi.

U ita nyendo dza u vhuyelela nga u ṱavhanya—naho ho fhira maḓuvha a si gathi ri tshi kha ḓi tou bva u ita lwendo lwa u thoma—zwi nga vhuyedza vhukuma. Ndi ngani? Ngauri u ita nga u ralo zwi sumbedza uri ri na dzangalelo ḽa vhukuma ḽa u thusa vha mbilu dzavhuḓi u pfesesa Bivhili. Musi muṅwe mufumakadzi a tshi vhudziswa uri ndi ngani o ṱanganedza pfunzo ya  Bivhili na Ṱhanzi dza Yehova o ri: “Ndo thoma u guda ngauri vho ntsumbedza uri vha na dzangalelo ḽa vhukuma na lufuno.”

Lwa tshifhinganyana musi e Tshikoloni tsha Tshumelo ya Vhuvulanḓila, Madaí o fara pfunzo dza Bivhili na vhathu vha 15 nahone a ṋea vhaṅwe vhahuweleli pfunzo ṱhanu. Pfunzo dzawe dza Bivhili dzi si gathi dzo thoma u ya miṱanganoni yashu tshifhinga tshoṱhe. Ndi mini zwe zwa thusa Madaí u thoma pfunzo nnzhi ngaurali? Tshikolo tsho mu ṱuṱuwedza uri a dzule a tshi ita nyendo dza u vhuyelela u swika a tshi wana vhane vha vha na dzangalelo ḽa vhukuma. Iṅwe Ṱhanzi ye ya thusa vhanzhi u guda ngoho ya Bivhili yo ri: “Ndo guda uri u konḓela musi u tshi ita nyendo dza u vhuyelela ndi zwa ndeme u itela u thusa vhathu vhane vha ṱoḓa u ḓivha nga ha Yehova.”

U ita nyendo dza u vhuyelela na u fara pfunzo dza Bivhili zwi ṱoḓa vhuḓidini vhuhulwane. Naho zwo ralo, mbuyelo dzi fhira vhuḓidini hoṱhe vhune ha ṱoḓea. Musi ri tshi fhisetshela mushumo wa u huwelela nga ha Muvhuso, ri nga thusa vhaṅwe uri vha vhe “na nḓivho yo teaho ya ngoho,” nahone zwenezwo zwi ḓo ita uri vha tshidzwe. (1 Tim. 2:3, 4) Kha riṋe, zwi nga ita uri ri fushee na u vha na dakalo ḽi sa vhambedzwi na tshithu.