Vhurifhi Ha U Thoma Vhu Yaho Kha Timotheo 4:1-16
4 Ipfi ḽa Mudzimu ḽi khwaṱhisedza uri tshifhingani tshi ḓaho vhaṅwe vha ḓo wa lutendoni, vha thetshelesa maipfi a vhufhura ane a nga a bva kha Mudzimu+ na pfunzo dza madimoni,
2 dzi ḓiswaho nga vhathu vha re na muhoyo vhane vha zwifha,+ vha luvalo lwo rindilaho lune lwa nga lwo fhiswa nga tsimbi.
3 Vha thivhela vhathu uri vha si vhe mbinganoni+ na u vha vhudza uri vha songo ḽa zwiṅwe zwiḽiwa,+ fhedzi Mudzimu o sika zwenezwi zwiḽiwa uri vha re na lutendo+ nge vha wana nḓivho yo teaho ya ngoho, vha zwi ḽe+ vha tshi livhuwa.
4 Ngauri zwoṱhe zwe Mudzimu a zwi sika ndi zwavhuḓi,+ a hu na zwi songo fanelaho u ḽiwa+ arali ri tshi zwi ḽa ri tshi livhuwa,
5 ngauri zwo itwa zwikhethwa nga ipfi ḽa Mudzimu, zwo rabelelwa.
6 Arali wa ṋea vhahashu yeneyi nyeletshedzo, u ḓo vha mushumeli wavhuḓi wa Kristo Yesu, o aluswaho na u khwaṱhiswa nga maipfi ane a ita uri ri vhe na lutendo kha Mudzimu na pfunzo yavhuḓi ye wa i tevhedza nga vhuronwane.+
7 Fhedzi iledza mazwifhi a nyadzisaho Mudzimu,+ a fanaho na ane a ambiwa nga vhakegulu. Nṱhani hazwo, lwela* u ḓikumedzela kha Mudzimu.
8 Ngauri nyonyoloso i vhuyedza zwiṱuku, fhedzi u ḓikumedzela kha Mudzimu hu vhuyedza kha zwoṱhe ngauri zwi ri fhulufhedzisa zwa vhutshilo ha zwino na ha tshifhingani tshi ḓaho.+
9 Eneo mafhungo ndi a ngoho, a fanela u ṱanganedzwa nga mbilu yoṱhe.
10 Ndi ngazwo ri tshi shuma ri sa neti na u ita zwoṱhe zwine ra nga kona,+ ngauri ro fhulufhela Mudzimu a tshilaho, ane a vha Mutshidzi+ wa vhathu vhoṱhe,+ zwihuluhulu vha fhulufhedzeaho.
11 Dzula u tshi vha laya nga u rali na u vha funza zwenezwi.
12 U songo tenda u nyadziwa ngauri u muswa. Nṱhani hazwo, ivha tsumbo yavhuḓi kha vha fhulufhedzeaho nga zwine wa amba, nga vhuḓifari, nga lufuno, nga lutendo na nga u kuna.
13 Bvela phanḓa u tshi ita vhuḓidini ha u vhalela vhaṅwe,+ u tshi ṱuṱuwedza, u tshi funza, u swika ndi tshi ḓa.
14 U songo litshelela tshifhiwa tshine wa vha natsho, tshe wa ṋewa tshone nga vhuporofita musi tshigwada tsha vhahulwane tshi tshi u vhea zwanḓa.+
15 Elekanya nga zwenezwi zwithu; u ḓikumedzele khazwo, uri mvelaphanḓa yau i vhonwe zwavhuḓi nga vhathu vhoṱhe.
16 Ḓiṱhogomele, u ṱhogomele na nḓila ine wa funza ngayo.+ Konḓelela kha zwenezwi zwithu, ngauri u tshi ita zwenezwo u ḓo ḓitshidza, wa tshidza na vhane vha u thetshelesa.+
Ṱhaluso dzi re magumoni a siaṱari
^ Thevhedz., “ita nyonyoloso.”
