U Ita Uri Tshifhinga Tsha U Guda Tshi Takadze Nahone Tshi Vhuyedze

Ri nga ita mini u itela uri u guda Bivhili zwi takadze? Ri nga ita mini u itela uri tshifhinga tshashu tsha u guda tshi vhuyedze? Kha ri ṱolisise nga u tou pfufhifhadza nḓila tharu dza ndeme dzine dza ḓo ri thusa uri ri vhuyelwe nga pfunzo ya Bivhili ya muthu nga eṱhe.

1 RABELANI: Tshithu tsha u thoma tshine na fanela u tshi ita ndi u rabela. (Ps. 42:8) Ndi ngani? Ngauri ri fanela u dzhia u guda Ipfi ḽa Mudzimu sa tshipiḓa tsha vhurabeli hashu. Ngauralo, ri fanela u humbela Yehova uri a ri thuse u dzudzanya mbilu na mihumbulo yashu na u ri ṋea muya wawe mukhethwa. (Luka 11:13) Barbara o no vhaho murumiwa tshifhinga tshilapfu u ri: “Tshifhinga tshoṱhe musi ndi sa athu vhala na u guda Bivhili ndi thoma nga u rabela. Musi ndi tshi fhedza, ndi pfa Yehova e na nṋe na uri u takalela zwine nda khou zwi ita.” U rabela musi ri sa athu guda zwi ita uri mihumbulo na mbilu dzashu zwi ṱanganedze nga vhuḓalo zwiḽiwa zwinzhi zwa muya.

2 ELEKANYANI: Nga nṱhani ha u shaya tshifhinga, vhaṅwe vha sokou vhala Ipfi ḽa Mudzimu Bivhili, fhedzi a vha vhuyelwi. Carlos o no fhedzaho miṅwaha i fhiraho 50 a tshi khou shumela Yehova, o ṱhogomela uri ndi zwa ndeme uri a vhetshele thungo tshifhinga tsha u elekanya u itela uri a vhuyelwe nga u guda. O ri: “Zwino ndi vho vhala masiaṱari a si gathi a Bivhili—a ṱoḓaho u vha mavhili nga ḓuvha. Zwenezwo zwi ita uri ndi vhe na tshifhinga tsho engedzeaho tsha u elekanya nga ha zwe nda zwi vhala u itela uri ndi gude zwithu zwa ndeme.” (Ps. 77:12) Musi ri tshi ḓiṋea tshifhinga tsha u elekanya, ri engedza nḓivho yashu na u pfesesa zwine Mudzimu a funa zwi tshi itwa.—Vha-Kol. 1:9-11.

3 SHUMISANI ZWE NA GUDA: Arali ra vhona uri ndi zwa ndeme lungafhani u ita zwiṅwe zwithu, zwi a ri vhuyedza vhukuma. Zwo tou ralo na nga u guda Bivhili. Muṅwe muswa wa tshinnani we a ḓowela u guda Bivhili ane a pfi Gabriel u ri: “U guda zwi nthusa uri ndi kone u kunda thaidzo dza ḓuvha ḽiṅwe na ḽiṅwe, nahone zwi ita uri ndi kone u thusa na vhaṅwe.” O dovha a ri: “Ndi lingedza u shumisa zwithu zwoṱhe zwine nda zwi guda vhutshiloni hanga.” (Doit. 11:18; Yosh. 1:8) Vhukuma, hu na nḓivho nnzhi ya Mudzimu ine ra nga i wana na u i shumisa.—Mir. 2:1-5.

MVUSULUSO: Ri na ndugelo khulwane vhukuma ya u ṱolisisa nḓivho ya Yehova ane a vha Tshisima tsha vhuṱali hoṱhe. (Vha-Roma 11:33) Nga zwenezwo, tshifhingani tshi ḓaho musi ni tshi guda, itani vhungoho ha uri ni thoma nga u rabela Yehova na u mu humbela uri a ni thuse u dzudzanya muhumbulo waṋu na u ni ṋea muya wawe mukhethwa. Nga murahu, ni imenyana uri ni kone u elekanya nga ha zwe na zwi vhala. Zwiṅwe hafhu, shumisani zwe na zwi guda vhutshiloni haṋu. Musi ni tshi ita zwenezwi zwithu zwa ndeme, ni ḓo takalela ngudo yaṋu ya Bivhili nahone i ḓo ni vhuyedza.