1-2. Ri ḓo amba nga ha mini kha ino thero?

NI ḒIPFA hani musi tshithu tshe na tshi lindela nga maṱo matswuku tshi sa swiki nga tshifhinga tshe na vha no tshi lavhelela ngatsho? Naa ni nga vhilaela? Khamusi ni nga ḓipfa u fana na zwi re kha Mirero 13:12 ine ya ri: “Musi u tshi lenga u wana zwe wa zwi lavhelela zwi lwadza mbilu.” Fhedzi ni nga ḓipfa hani arali na pfa uri hu na zwiitisi zwavhuḓi zwa uri ndi ngani tshenetsho tshithu tshi songo swika nga tshifhinga tshe na tshi lavhelela ngatsho? Khamusi ni nga ḓiimisela u lindela ni sa fheli mbilu.

² Kha ino thero, ri ḓo amba nga ha vhulivhisi vhu re Bivhilini vhune ha nga ri thusa uri ri dzule ri tshi ‘lindela ri sa fheli mbilu.’ (Mika 7:7) Ri ḓo dovha ra amba nga ha vhuimo vhuvhili vhune khaho ra ḓo tea u lindela Yehova a tshi dzhia vhukando ri sa fheli mbilu. Ri ḓo fhedzisela nga u amba nga ha phaṱhutshedzo dzine dza ḓo waniwa nga vho ḓiimiselaho u lindela.

3. Mirero 13:11 i ri gudisa mini?

³ Mirero 13:11 i ri gudisa uri ndi ngani ri sa tei u fhela mbilu. I ri: “Lupfumo lwo kuvhanganywaho nga u ṱavhanya lu ḓo fhela, fhedzi lupfumo lwa ane a lu kuvhanganya nga zwiṱuku nga zwiṱuku lu ḓo anda.” Ri guda mini kha lwonolu luṅwalo? Muthu o ṱalifhaho u ita zwithu nga vhuronwane a sa fheli mbilu nahone musi a tshi ita zwenezwo, hu vha na mvelelo dzavhuḓi.

4. Ri guda mini kha Mirero 4:18?

⁴ Mirero 4:18 i ri vhudza uri: “Nḓila ya vhavhuya i nga tshedza tsha nga matsheloni tshine tsha ḓi penya tshi tshi ya u swika  masiari tshivhangalala.” Heyi ndimana i sumbedza uri Yehova u thusa vhathu u pfesesa tshipikwa tshawe nga zwiṱuku nga zwiṱuku. Fhedzi i nga dovha ya ri thusa u pfesesa nḓila ine Mukriste a ita ngayo tshanduko vhutshiloni hawe na u sendela tsini na Yehova. Zwi dzhia tshifhinga uri muthu a sendele tsini na Yehova. Arali ra guda na u shumisa zwine ra zwi wana Bivhilini na kha ndangulo ya Mudzimu, ri ḓo tshila u fana na Kristo nga zwiṱuku nga zwiṱuku. Zwi ḓo dovha zwa ita uri ri ḓivhe Mudzimu khwine. Ṱhogomelani nḓila ye Yesu a zwi bvisela ngayo khagala.

5. Yesu o shumisa tsumbo ifhio u itela u sumbedza uri muthu u ita tshanduko nga zwiṱuku nga zwiṱuku?

⁵ Yesu o shumisa tshifanyiso u itela u ṱalutshedza uri mulaedza wa Muvhuso une ra u huwelela u fana na mbeu ine ya hula nga zwiṱuku nga zwiṱuku mbiluni dza vhathu vhane vha funa u ita zwo lugaho. O ri: “Mbeu yone i tshi khou mela na u aluwa, ene [muzwali] a sa ḓivhi zwine zwa ita uri i mele. Ngauri mavu a ita uri mbeu i mele nga zwiṱuku nga zwiṱuku, hu thoma u bvelela tsinde, goroi ya kona u rumbuwa, ya fheleledza yo vhibva.” (Marko 4:27, 28) Yesu o vha a tshi khou amba mini? O vha a tshi khou ṱalutshedza uri samusi tshimela tshi tshi aluwa nga zwiṱuku nga zwiṱuku, na muthu ane a ṱanganedza mulaedza wa Muvhuso u ḓo ita tshanduko nga zwiṱuku nga zwiṱuku. Sa tsumbo, musi vhagudiswa vhashu vha Bivhili vha tshi vha na vhushaka havhuḓi na Yehova, ri thoma u vhona tshanduko dzavhuḓi dzine vha khou dzi ita. (Vhaef. 4:22-24) Fhedzi ri tea u zwi humbula uri Yehova ndi ene ane a ita uri mbeu i hule.—1 Vhakor. 3:7.

6-7. Ri guda mini kha nḓila ye Yehova a sika ngayo ḽifhasi?

⁶ Kha zwoṱhe zwine Yehova a ita, u dzhia tshifhinga tshine tsha ṱoḓea uri a ite wonoyo mushumo. Yehova u ita zwenezwo uri a rendise dzina ḽawe na uri a thuse vhaṅwe. Sa tsumbo, ṱhogomelani nḓila ye Yehova a lugiselela ḽifhasi nga zwiṱuku nga zwiṱuku uri ḽi kone u dzulwa nga vhathu.

⁷ Musi Bivhili i tshi ṱalusa nḓila ye Yehova a  sika ngayo ḽifhasi, i ri vhudza uri o ḽi “kala,” a ‘fhaṱa’ na u vhea “tombo ḽaḽo ḽa thikho.” (Yobo 38:5, 6) O ita na u ḓifha tshifhinga tsha u sedzulusa mushumo wawe. (Gen. 1:10, 12) Humbulani nḓila ye vharuṅwa vha ḓipfa ngayo musi vha tshi vhona tshithu tshiṅwe na tshiṅwe tshiswa tshe Yehova a tshi sika. Zwi tea u vha zwo vha takadza vhukuma! Nga nṱhani ha zwenezwo, vho “huwelela nga dakalo.” (Yobo 38:7) Ri guda mini kha zwenezwo? Zwo dzhiela Yehova miṅwaha ya zwigidi na zwigidi uri a sike ḽifhasi, dziṋaledzi na zwoṱhe zwi tshilaho, fhedzi musi Yehova a tshi sedza zwoṱhe zwe a zwi sika nga vhuronwane, o wana zwi “zwavhuḓi vhukuma.”—Gen. 1:31.

8. Ndi zwifhio zwine ra ḓo amba nga hazwo zwino?

⁸ Tsumbo dze ra amba nga hadzo dzi ri sumbedza uri hu na vhulivhisi ho vhalaho vhu re Bivhilini vhune ha ri funza uri ri tea u lindela ri sa fheli mbilu. Zwa zwino ri ḓo amba nga ha zwiimo zwivhili zwine khazwo ra tea u lindela Yehova ri sa fheli mbilu.

9. Ndi vhuimo vhufhio vhune khaho ra nga tea u lindela Yehova?

⁹ Ri nga tea u lindela uri Yehova a fhindule thabelo dzashu. Musi ri tshi rabela uri Yehova a ri fhe nungo dza u konḓelela thaidzo kana uri a ri thuse u kunda vhushayanungo, ri nga vhona u nga Yehova u khou lenga u fhindula thabelo yashu. Ndi ngani Yehova a sa fhinduli thabelo dzashu dzoṱhe nga u ṱavhanya?

10. Ndi ngani ri tshi tea u lindela ri sa fheli mbilu uri Yehova a fhindule thabelo dzashu?

¹⁰ Yehova u thetshelesa thabelo dzashu. (Ps. 65:2) U dzhia thabelo dzashu dzi bvaho mbiluni sa vhuṱanzi ha uri ri na lutendo khae. (Vhahev. 11:6) Musi ri tshi amba na Yehova nga thabelo uri a ri thuse u ita zwine zwa mu takadza, u ṱoḓa u vhona arali ro ḓiimisela u ita zwine a zwi funa. (1 Yoh. 3:22) Ngauralo, musi ri tshi humbela Yehova uri a ri thuse u litsha u ita zwine a si zwi fune, zwi nga ṱoḓa uri ri si fhele mbilu na u ita zwine ra nga kona uri ri ite tshanduko vhutshiloni hashu. Yesu o ri thusa u pfesesa uri zwi nga itea dziṅwe thabelo dzashu dzi si fhindulwe nga u ṱavhanya. O ri: “Dzulani ni tshi humbela, ni ḓo ṋewa; dzulani ni tshi ṱoḓa, ni ḓo wana; dzulani ni tshi khokhonya, ni ḓo vulelwa; ngauri ane a humbela u ḓo ṋewa, ane a ṱoḓa u ḓo wana, na ane a khokhonya u ḓo vulelwa.” (Mat. 7:7, 8) Arali ra tevhela nyeletshedzo ya uri ‘ri dzule ri tshi rabela,’ ri nga vha na vhungoho ha uri Khotsi ashu wa ṱaḓulu u a ri pfa na uri u ḓo fhindula thabelo dzashu.—Vhakol. 4:2.

11. Musi thabelo yashu i tshi nga i khou lenga u fhindulwa, Vhahevheru 4:16 i nga ri thusa hani?

¹¹ Naho zwi tshi nga vhonala u nga thabelo yashu i khou lenga u fhindulwa, Yehova u ri fhulufhedzisa uri u ḓo i fhindula “nga tshifhinga tsho teaho.” (Vhalani Vhahevheru 4:16.) Ndi ngazwo ri sa tei u vhea Yehova mulandu arali tshiṅwe tshithu tshi sa itei nga u ṱavhanya nga nḓila ye ra humbula ngayo. Sa tsumbo, vhathu vhanzhi vho rabela lwa miṅwaha minzhi uri Muvhuso wa Mudzimu u fhelise ḽino shango. Na Yesu o ri vhudza uri ri rabele uri Muvhuso wa Mudzimu u ḓe. (Mat. 6:10) Fhedzi zwi nga vha vhutsilu u fhelelwa nga lutendo kha Mudzimu nga nṱhani ha uri vhufhelo a ho ngo ḓa nga tshifhinga tshe riṋe ra vha ro tshi lavhelela. (Hab. 2:3; Mat. 24:44) Zwi nga sumbedza vhuṱali u dzula ro lindela Yehova na u mu rabela ri na lutendo lwa uri u ḓo ri fhindula. Vhufhelo vhu ḓo ḓa nga tshifhinga tsho teaho ngauri Yehova o no ḓi vhea “ḓuvha na tshifhinga” tshine ha ḓo ḓa ngatsho. Nahone ḽeneḽo ḓuvha ḽi ḓo vha ḽo teaho kha vhathu vhoṱhe.—Mat. 24:36; 2 Pet. 3:15.

12. Ndi lini hune u sa fhela mbilu zwa nga ri konḓela vhukuma?

 ¹² Zwi nga ṱoḓea uri ri si fhele mbilu musi ri tshi farwa nga nḓila i si yavhuḓi. Vhathu vha ḽino shango vha anzela u sa fara zwavhuḓi vhathu vha iṅwe mbeu, vha muṅwe muvhala wa lukanda, vha luṅwe lushaka kana vha iṅwe mvelele. Vhaṅwe vha ita na u sa farwa zwavhuḓi nga nṱhani ha vhuholefhali. Vhunzhi ha vhathu vha Yehova vho konḓelela u sa farwa zwavhuḓi nga nṱhani ha zwine vha zwi tenda zwi bvaho Bivhilini. Musi ri tshi farwa nga nḓila i si yavhuḓi, ri tea u humbula zwe Yesu a amba. O ri: “We a konḓelela u swika vhufheloni u ḓo tshidzwa.” (Mat. 24:13) Fhedzi ni tea u ita mini arali na ḓivha uri muṅwe muthu o ita tshivhi tshihulwane? Musi vhahulwane vho no ḓivhadzwa eneo mafhungo, naa ni ḓo zwi sia zwanḓani zwa vhahulwane na lindela ni sa fheli mbilu uri vha zwi tandulule nga nḓila ya Yehova? Vhahulwane vha nga tea u ita mini musi muthu o ita tshivhi tshihulwane?

13. Yehova u ṱoḓa uri vhahulwane vha ite mini musi hu na we a ita tshivhi tshihulwane?

¹³ Musi vhahulwane vha tshi pfa uri hu na we a ita tshivhi tshihulwane tshivhidzoni, vha ṱoḓa “vhuṱali vhu bvaho ṱaḓulu” nga thabelo uri vha ḓivhe uri Yehova u dzhia hani eneo mafhungo. (Yak. 3:17) Tshipikwa tshavho ndi u thusa o itaho tshivhi uri a “rembuluwe” arali zwi tshi konadzea. (Yak. 5:19, 20) Vha dovha vha ṱoḓa u ita zwine vha nga kona uri vha tsireledze tshivhidzo na u khuthadza vho vhaisalaho. (2 Vhakor. 1:3, 4) Musi vhahulwane vha tshi ḓivha uri hu na we a ita tshivhi tshihulwane, vha thoma nga u ṱoḓisisa uri ho itea mini zwa vhukuma nahone zwenezwo zwi nga dzhia tshifhinga. Nga murahu vha a rabela na u ṋea nyeletshedzo i bvaho Maṅwaloni nahone vha kaidza “nga nḓila yo teaho.” (Yer. 30:11) Naho vhahulwane vha sa lengi u tandulula eneo mafhungo, a vha dzhii phetho nga tshihaḓu. Musi vhahulwane vha tshi tevhela vhulivhisi ha Yehova, tshivhidzo tshoṱhe tshi a vhuyelwa. Naho vhahulwane vha tshi nga tandulula eneo mafhungo nga nḓila yo teaho, muthu o vhaiswaho a nga kha ḓi sala o vhaisala. Arali zwenezwo zwo itea kha inwi, ni nga ita mini uri ni fhungudze vhuṱungu vhune na khou vhu pfa?

14. Ndi tsumbo ifhio i re Bivhilini ine ya nga ni khuthadza arali no vhaiswa vhukuma nga muṅwe Mukriste?

¹⁴ Naa no no vhuya na vhaiswa vhukuma nga muṅwe muthu, khamusi nga wahaṋu wa  Mukriste? Ni nga wana tsumbo dzavhuḓi Ipfini ḽa Mudzimu dzi ri gudisaho uri ri nga lindela hani Yehova uri a dzudzanye eneo mafhungo. Sa tsumbo, naho Yosefa a songo farwa zwavhuḓi nga vhakomana vhawe, ho ngo zwi tendela zwi tshi ita uri a bilufhale. Nṱhani hazwo, o ita zwe a vha a tshi nga kona uri a shumele Yehova nahone Yehova a mu lambedza nge a konḓelela a sa fheli mbilu. (Gen. 39:21) Mafheleloni Yosefa o vha hangwela nahone a vhona nḓila ye Yehova a mu fhaṱutshedza ngayo. (Gen. 45:5) U fana na Yosefa, na riṋe ri a khuthadzwa musi ri tshi sendela tsini na Yehova na u lindela u swikela a tshi lugisa eneo mafhungo nga tshifhinga tshawe.—Ps. 7:17; 73:28.

15. Muṅwe wahashu wa tshifumakadzini o thuswa nga mini uri a konḓelele u sa farwa zwavhuḓi na uri a vhe na mulalo?

¹⁵ Naho ri sa ḓo ṱangana na zwe Yosefa a ṱangana nazwo, fhedzi ri a vhaisala musi ri tshi farwa nga nḓila i si yavhuḓi. Arali ra farwa nga nḓila i si yavhuḓi nga wahashu kana nga muṅwe muthu a sa gwadameli Yehova, ri ḓo vhuyelwa arali ra shumisa vhulivhisi vhu re Bivhilini. (Vhafil. 2:3, 4) Kha ri ambe nga ha zwiṅwe zwe wahashu wa tshifumakadzini a sedzana nazwo. O vhaisala vhukuma musi a tshi wana uri muṅwe we a vha a tshi shuma nae o vha a tshi khou vhudza vhaṅwe vhashumi zwithu zwi si zwavhuḓi nga hae. Nṱhani ha uri onoyo wahashu a ṱavhanye u dinalea, o ḓifha tshifhinga tsha u humbulisisa nga ha tsumbo ya Yesu. Musi Yesu a tshi semiwa, ho ngo lifhedza. (1 Pet. 2:21, 23) Musi a tshi humbula zwenezwo, a phetha nga ḽa uri ha nga zwi iti mafhungo. A vho zwi wana nga murahu uri onoyo mushumisani u na vhulwadze nahone u na mutsiko. Onoyo wahashu a humbula uri khamusi mushumisani wawe o vha a songo ḓiimisela u mu vhaisa. Ngauralo, wahashu a takala vhukuma nge a konḓelela u sa farwa zwavhuḓi a sa fheli mbilu nahone a vha na mulalo.

16. Ni nga khuthadzwa nga mini musi ni tshi khou konḓelela u farwa nga nḓila i si yavhuḓi? (1 Petro 3:12)

¹⁶ Arali ni tshi khou pfa vhuṱungu nga nṱhani ha u sa farwa zwavhuḓi kana nga zwiṅwe-vho, humbulani uri Yehova u tsini na “vho ṱungufhalaho.” (Ps. 34:18) U a ni funa ngauri a ni fheli mbilu na ngauri ni mu kumedzela muhwalo waṋu. (Ps. 55:22) Ndi ene muhaṱuli wa ḽifhasi ḽoṱhe. U vhona zwoṱhe zwine zwa khou itea. (Vhalani 1 Petro 3:12.) Musi no sedzana  na thaidzo dzine ni si kone u dzi piringulula, ni humbule uri zwa ndeme ndi u lindela Yehova a tshi dzhia vhukando.

17. Yehova o ri fhulufhedzisa u ri itela mini kha Yesaya 30:18?

¹⁷ Hu si kale, Khotsi ashu wa ṱaḓulu u ḓo ri fhaṱutshedza nga Muvhuso wawe. Yesaya 30:18 i ri: “Yehova o lindela a sa fheli mbilu uri a ni sumbedze uri u a ni takalela, u ḓo takuwa uri a ni sumbedze khathutshelo. Ngauri Yehova ndi Mudzimu wa khaṱhulo yo teaho. Hu takala vhoṱhe vhane vha dzula vho mu lavhelela.” Vhane vha dzula vho lindela Yehova vha ḓo wana phaṱhutshedzo nnzhi zwino na shangoni ḽiswa ḽi ḓaho.

18. Ri ḓo wana phaṱhutshedzo dzifhio tshifhingani tshi ḓaho?

¹⁸ Musi vhathu vha Mudzimu vha tshi dzhena shangoni ḽiswa, a vha tsha ḓo dovha vha sedzana na thaidzo dzine vha sedzana nadzo ṋamusi. U farwa nga nḓila i si yavhuḓi na vhuṱungu zwi ḓo vha zwi si tsheeho. (Nzumb. 21:4) Ri ḓo vha ri si tsha lila tshithu ngauri hu ḓo vha hu na zwo eḓanaho vhathu vhoṱhe. (Ps. 72:16; Yes. 54:13) Ri ḓo vha ro fhaṱutshedzwa vhukuma!

19. Yehova u khou ita uri ri lugele mini nga zwiṱuku nga zwiṱuku?

¹⁹ Nga tshino tshifhinga, Yehova u khou ita uri ri lugele u tshila fhasi ha Muvhuso wawe nga u ri thusa uri ri kunde nḓowelo mmbi na u tshila nga nḓila ine ya mu takadza. Ni songo kulea nungo na litsha u shumela Yehova. Zwivhuya zwi tshee phanḓa! Musi ro lindela tshenetsho tshifhinga tshavhuḓi, kha ri vhe na dakalo musi ro lindela ri sa fheli mbilu uri Yehova a ite zwe a fhulufhedzisa.