MUSI vhathu vha tshi khou engedzea, tshivhi na vhuvhi zwo mbo ḓi phaḓalala ḽifhasini. Muporofita Henoxe o sevha uri Mudzimu u ḓo fhelisa vhathu vhavhi. Zwiṅwe hafhu, vhuvhi ho bvela phanḓa vhu tshi engedzea. Vhaṅwe vharuṅwa vho shandukela Yehova nga u ṱutshela haya havho ngei ṱaḓulu, vha ambara mivhili ya vhathu, nahone nga vhupangwa vha ḓidzhiela vhasadzi. U ṱangana honoho nga dzimbeu ho ita uri vha bebe vhana vha mufuda u sili—vha miswonḓa vhane vha vhidzwa Vhanefilimi vhe vha nanisa vhuvhi na mabulayo shangoni. Mudzimu o pfa vhuṱungu musi a tshi vhona tsiko yawe ya kha ḽifhasi i tshi tshinyadzwa.

Nga murahu ha lufu lwa Henoxe, ho vha hu na muṅwe munna we a vha o fhambana na vhathu vhavhi. O vha a tshi pfi Noaxe. Ene na muṱa wawe vho lingedza u ita zwo lugaho phanḓa ha Mudzimu. Musi Mudzimu a tshi fhelisa vhathu vhavhi vha ḽeneḽo shango, o vha a tshi ṱoḓa u tsireledza Noaxe na zwipuka. Nga zwenezwo Mudzimu o mu vhudza uri a fhaṱe gungwa ḽihulwane. Noaxe na muṱa wawe vho vha vha tshi ḓo tsireledzea khathihi na mifuda minzhi ya zwipuka kha Maḓi Mahulu a khungulu yoṱhe. Noaxe o thetshelesa Mudzimu. Miṅwaha ya mahumi ye Noaxe a i fhedza a tshi khou fhaṱa gungwa, o vha e “muhuweleli wa u luga.” (2 Petro 2:5) O sevha vhathu nga ha Maḓi Mahulu ane a khou ḓa, fhedzi a vho ngo mu thetshelesa. Ha swika tshifhinga tsha uri Noaxe na vha muṱa wawe vha dzhene gungwani na zwipuka. Nga murahu ha zwenezwo Mudzimu a vala munango wa gungwa. Mvula ya mbo ḓi na.

Ho mbo ḓi na mvula khulu lwa maḓuvha a 40 na vhusiku ha 40 u swikela ḽifhasi ḽi tshi ḓala nga maḓi. Vhavhi vho fheliswa. Nga murahu ha miṅwedzi, musi maḓi a tshi kha ḓi xa, gungwa ḽa ima thavhani. Nga tshifhinga tsha musi Noaxe na muṱa wawe na zwipuka vha tshi bva gungwani vho vha vho no fhedza ṅwaha woṱhe vhe nga ngomu. Musi Noaxe a tshi sumbedza u livhuwa, o itela Yehova tshiṱhavhelo. Mudzimu o aravha Noaxe nga u khwaṱhisedza ene na vha muṱa wawe uri Ha tsha ḓo dovha a fhelisa vhathu nga Maḓi Mahulu. Yehova o ita musengavhadzimu sa khwaṱhisedzo na khumbudzo ya ḽeneḽi fulufhelo ḽi khuthadzaho.

Nga murahu ha Maḓi Mahulu, Mudzimu o dovha a ṋea vhathu milayo miswa. O vha ṋea thendelo ya u ḽa ṋama ya zwipuka. Naho zwo ralo, o vha thivhela uri vha songo ḽa malofha. O dovha a laya vhaḓuhulu vha Noaxe uri vha phaḓalale na ḽifhasi, fhedzi vhaṅwe a vho ngo thetshelesa. Nga fhasi ha vhurangaphanḓa ha Nimirodo vhathu vho kuvhangana nahone vha thoma u fhaṱa mutsheṱo muhulwane muḓini wa Babele. Ndivho yavho yo vha i ya u hanedza ndaela ya Mudzimu ya uri vha phaḓalale na ḽifhasi ḽoṱhe. Fhedzi Mudzimu o thithisa eneo mashandukwa nga u vilinganya luambo lwavho nahone a ita uri vha ambe nga ndimi dzo fhamba-fhambanaho. Samusi vho vha vha si tsha pfana vho mbo ḓi litsha wonoyo mushumo nahone vha balangana.

—Enea mafhungo a wanala kha Genesi dzindima 6 u ya kha 11; Yuda 14, 15.