U ITELA u ri thusa uri ri ḓivhe Messia, Yehova Mudzimu o hevhedza vhaporofita vhanzhi vha Bivhili uri vha ṋekedze zwidodombedzwa nga ha u bebwa, vhuḓinḓa, na lufu lwa o fulufhedziswaho uri u ḓo vha Muphulusi. Honovhu vhuporofita hoṱhe ha Bivhili ho ḓadzea kha Yesu Kristo. Ho tea nahone ho tou kokotolo nga nḓila i mangadzaho. U itela u fanyisa zwenezwi, kha ri ṱhogomele vhuporofita vhu  si gathi he ha dzula ho amba nga ha zwiitea zwi tshimbidzanaho na u bebwa ha Messia na musi a tshee muṱuku.

Muporofita Yesaya o dzula o amba uri Messia o vha a tshi ḓo vha muḓuhulu wa Khosi Davida. (Yesaya 9:6) Vhukuma, Yesu o bebwa kha lushaka lwa Davida.—Mateo 1:1, 6-17.

 Mixa, ane na ene a vha muporofita wa Mudzimu, o dzula o amba uri onoyu ṅwana u ḓo fheleledza o vha muvhusi nahone u ḓo bebelwa “Betlehema Efurata.” (Mixa 5:1) Musi Yesu a tshi bebwa, ho vha hu na miḓi mivhili kha ḽa Isiraele ye ya vha i tshi vhidzwa Betlehema. Muṅwe wo vha u tsini na Nazaretha dzinguni ḽi re devhula ha ḽeneḽo shango, nahone muṅwe wo vha u tsini na Yerusalema kha ḽa Yuda. Muḓi wa Betlehema we wa vha u tsini na Yerusalema wo vha u tshi vhidzwa Efurata. Yesu o bebwa muḓini wonoyo, nga nḓila ye vhuporofita ha dzula ho amba ngaho!—Mateo 2:1.

Vhuṅwe vhuporofita ha Bivhili ho dzula ho amba uri Murwa wa Mudzimu ‘u ḓo vhidzwa e Egipita.’ Musi Yesu a tshi kha ḓi vha muṱuku, o iswa Egipita. O vhuyelela he a bebelwa hone nga murahu ha u fa ha Herode, ngauralo zwenezwo zwa ḓadzisa vhuporofita.—Hosea 11:1; Mateo 2:15.

Kha  tshati i re kha siaṱari 200, maṅwalo o tevhekanyiswaho nga fhasi ha ipfi “Vhuporofita” a na zwidodombedzwa malugana na Messia. Nga khumbelo a vhambedzeni na maṅwalo o tevhekanyiswaho nga fhasi ha maipfi “U Ḓadzea.” U ita nga u ralo zwi ḓo khwaṱhisa lutendo lwaṋu nahone ni ḓo zwi vhona uri Ipfi ḽa Mudzimu ndi ngoho.

Musi ni tshi khou ṱolisisa enea maṅwalo, humbulani uri honoho vhuporofita ho ṅwaliwa maḓanani manzhi a miṅwaha Yesu a sa athu bebiwa. Yesu o ri: “Zwo fanela u khunyelela zwoṱhe zwo ṅwalwaho zwi tshi amba nṋe mulayoni wa Mushe na kha vhaporofita na kha Dzipsalme.” (Luka 24:44) Samusi zwo tou ralo na kha Bivhili yaṋu, zwoṱhe zwo ḓadzea ngangoho—u ya nga he zwa dzula zwo ambiwa ngaho!