Bugu Ya U Thoma Ya Samuele 2:1-36
2 Hanna a rabela a ri:
“Mbilu yanga i takalela Yehova,+Luṋanga* lwanga lwo huliswa nga Yehova.
Mulomo wanga wo aṱama u itela u fhindula maswina anga,Ngauri ndi takalela u tshidzwa nga iwe.
2 A hu na ane a vha mukhethwa u fana na iwe Yehova,A hu na muṅwe a fanaho na iwe,+A hu na tombo ḽine ḽa nga Mudzimu washu.+
3 U songo bvela phanḓa u tshi amba nga u ḓikukumusa;Hu songo bva ḽa lunyadzo mulomoni wau,Ngauri Yehova ndi Mudzimu ane a ḓivha zwoṱhe,+Mishumo yoṱhe u i kala nga nḓila yo teaho.
4 Vhura ha vhahali ho vunḓwa,Fhedzi vhane vha khukhulwa vha ṋewa maanḓa.+
5 Vhane vha ḽa vha fura vha tea u shuma uri vha wane vhurotho,Fhedzi vha re na nḓala a vha tshee na nḓala.+
A sa bebi o beba vhana vha sumbe,+Fhedzi we a vha e na vharwa vhanzhi o sala o ṱungufhala.
6 Yehova u a vhulaya, u a tshidza vhutshilo;*U a isa Vhiḓani,* u a vusa.+
7 Yehova u a ita uri muthu a vhe mushai kana mupfumi;+U a ṱukufhadza na u hulisa.+
8 U vusa a si na zwawe buseni,U vusa mushai kha thulwi ya miḽora,*+Uri a mu dzudze na vhakololo,A vha ṋea vhudzulo vhu ṱhonifheaho.
Ngauri thikho dza ḽifhasi ndi dza Yehova,+O tika ngadzo shango.
9 U linda hune vha fhulufhedzeaho vha kanda hone,+Fhedzi vhavhi vha ḓo fheliswa swiswini,+Ngauri muthu ha kundi nga u vha na maanḓa.+
10 Yehova u ḓo kwasha vhane vha lwa nae;*+U ḓo ita uri mibvumo i bvaho ṱaḓulu i vha ḓele.+
Yehova u ḓo haṱula u swika magumoni a ḽifhasi,+U ḓo ṋea khosi yawe maanḓa+U ḓo hulisa luṋanga* lwa muḓodzwa wawe.”+
11 Nga murahu ha zwenezwo, Elikana a vhuyelela nḓuni yawe ngei Rama; fhedzi mutukana a vha muḓinḓa wa* Yehova+ e na tshifhe Eli.
12 Vharwa vha Eli vho vha vhe vhavhi;+ vha sa ṱhonifhi Yehova.
13 Zwe vha vha vha tshi zwi ita vhathu nga nṱhani ha ndugelo yavho ya vhutshifhe ndi hezwi:+ Tshifhinga tshoṱhe musi muthu a tshi khou ṋekedza zwiṱhavhelo, muḓinḓa wa tshifhe o vha a tshi ḓa o fara forogo ya maṋo mararu musi ṋama i tshi khou vholomiswa,
14 a dzhenisa yeneyo forogo bodoni dza u bika. Tshifhe o vha a tshi dzhia tshiṅwe na tshiṅwe tshe forogo ya vha i tshi tshi ṱhavha. Zwenezwo ndi zwe vha vha vha tshi zwi ita kha Vhaisiraele vhane vha ḓa Shiḽo.
15 Zwiṅwe hafhu, na musi mapfura a sa athu u fhiswa,+ muḓinḓa wa tshifhe o vha a tshi ḓa a amba na muthu ane a khou ṋekedza tshiṱhavhelo a ri: “Ṋea tshifhe ṋama ya u gotsha. A nga si ḓo dzhia ṋama yo vholomiswaho, u ṱoḓa ṋama mbisi fhedzi.”
16 Arali onoyo muthu a mu fhindula a ri: “Ntendele ndi thome ndi fhise mapfura,+ nga murahu u kone u dzhia tshiṅwe na tshiṅwe tshine wa tshi tama,” o vha a tshi ri: “Hai, nṋee zwino; arali wa sa ita nga u ralo, ndi ḓo i dzhia nga khani!”
17 Nga zwenezwo, tshivhi tsha vhaḓinḓa vhenevho tsha vha tshihulu vhukuma phanḓa ha Yehova,+ ngauri vho vha vha sa ṱhonifhi zwifhiwa zwa Yehova.
18 Huno Samuele o vha a tshi shuma+ phanḓa ha Yehova, o ambara efodo*+ ya ḽinene, naho o vha a tshi kha ḓi tou vha mutukana.
19 Zwiṅwe hafhu, mme awe o vha a tshi mu rungela kuambaro ku si na zwanḓa, a tshi mu ḓisela kwone ṅwaha muṅwe na muṅwe musi a tshi ḓa na munna wawe u itela u ṋekedza zwiṱhavhelo zwa ṅwaha muṅwe na muṅwe.+
20 Eli a fhaṱutshedza Elikana na mufumakadzi wawe a ri: “Ngavhe Yehova a tshi u ṋea ṅwana ane a ḓo bebwa nga hoyu mufumakadzi u itela u dzhiela vhudzulo ṅwana we a ṋewa Yehova.”+ Vha vhuyelela hayani.
21 Yehova a humbula Hanna, a vhifha muvhilini;+ a beba vhatukana vhararu na vhasidzana vhavhili. Mutukana Samuele a bvela phanḓa a tshi aluwa phanḓa ha Yehova.+
22 Zwino Eli o vha o no kalaha vhukuma, fhedzi o vha o no pfa nga ha zwithu zwoṱhe zwe vharwa vhawe vha zwi ita+ kha Vhaisiraele vhoṱhe na uri vho vha vha tshi lala na vhafumakadzi vhane vha shuma muṋangoni wa dennde ḽa muṱangano.+
23 O vha a tshi dzulela u amba navho a tshi ri: “Ndi ngani ni tshi dzulela u ita zwenezwi zwithu? Ngauri zwithu zwine nda dzulela u zwi pfa nga vhathu vhoṱhe ndi zwivhi.
24 Aiwa vhana vhanga, muvhigo une nda u pfa nga vhathu vha Yehova a si wavhuḓi.
25 Arali muthu a khakhela muṅwe. Muṅwe muthu a nga mu humbetshela kha Yehova uri a mu khathutshele; fhedzi arali muthu a khakhela Yehova+ ndi nnyi ane a ḓo mu rabelela?” Fhedzi vha hana u thetshelesa khotsi avho, ngauri Yehova o vha o ḓiimisela u vha vhulaya.+
26 Nga zwenezwo, onoyo mutukana Samuele a aluwa a tshi takalelwa nga Yehova na nga vhathu.+
27 Ha ḓa munna o rumiwaho nga Mudzimu kha Eli a ri: “Zwe Yehova a zwi amba ndi hezwi: ‘Naa a tho ngo ḓivhonadza khagala kha nnḓu ya vhokhotsi au musi vhe dziphuli ngei Egipita nḓuni ya Farao?+
28 O nangwa kha tshaka dzoṱhe dza Isiraele+ uri a shume sa tshifhe wanga na uri a gonye kha aḽeṱare+ yanga u itela u ṋekedza zwiṱhavhelo, u itela u ṋekedza zwioro,* na u ambara efodo phanḓa hanga; ndo ṋea nnḓu ya vhomakhulukuku wau zwifhiwa zwoṱhe zwa u fhiswa nga mulilo zwi ṋekedzwaho nga Vhaisiraele.*+
29 Ndi ngani inwi vhathu ni tshi goḓa* zwiṱhavhelo zwanga na zwifhiwa zwanga zwe nda laedza uri zwi itwe fhethu hune nda dzula hone?+ Ndi ngani u tshi hulisa vhana vhau u fhira nṋe nga u ḓifusha nga zwipiḓa zwavhuḓi-vhuḓi zwa tshifhiwa tshiṅwe na tshiṅwe tsha vhathu vhanga vha Isiraele?+
30 “‘Ndi ngazwo Yehova Mudzimu wa Isiraele a tshi ri: “Ndo ri vha nnḓu yau na vha nnḓu ya makhulukuku wau vha ḓo tshimbila phanḓa hanga misi yoṱhe.”+ Fhedzi zwino Yehova u ri: “A zwi pfali uri ndi nga ita nga u ralo, ngauri vhane vha nkhulisa ndi ḓo vha hulisa,+ vhane vha nnyadza vha ḓo nyadziwa.”
31 Hu ḓo ḓa maḓuvha ane nda ḓo fhelisa maanḓa au na a nnḓu ya khotsi au uri nḓuni yau hu si tsha vha na muthu ane a lalama.+
32 Iwe u ḓo vhona swina hune nda dzula hone vhukati ha zwoṱhe zwavhuḓi zwi itwaho Isiraele,+ a hu tsha ḓo dovha ha vhuya ha vha na mukalaha nḓuni yau.
33 Muthu wa hau ane nda sa ḓo mu litshisa u shuma aḽeṱareni yanga u ḓo u swingisa a pfisa mbilu yau vhuṱungu, fhedzi vhanzhi vha nḓuni yau vha ḓo fa nga banga.+
34 Zwine zwa ḓo itea kha vharwa vhau vhavhili, Hofuni na Finiasi, zwi ḓo vha tshiga kha iwe: Vhuvhili havho vha ḓo fa nga ḓuvha ḽithihi.+
35 Ndi ḓo ḓivhetshela tshifhe a fhulufhedzeaho.+ U ḓo ita zwithu u tendelana na zwine mbilu yanga ya zwi funa; onoyo ndi ḓo mu fhaṱela nnḓu yo khwaṱhaho, u ḓo tshimbila phanḓa ha muḓodzwa wanga misi yoṱhe.
36 Muṅwe na muṅwe o salaho nḓuni yau u ḓo ḓa a mu gwadamela uri a wane tshelede na ḽofo ya vhurotho, u ḓo ri: “Ndi khou humbela uri u nṋee mushumo wa vhutshifhe uri ndi kone u ḽa vhurotho.”’”+
Ṱhaluso dzi re magumoni a siaṱari
^ Kana “Maanḓa.” Sedzani Mutevhe Wa Ṱhalutshedzo Ya Maipfi.
^ Kana “u a vusa.”
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Kana khamusi, “hune ha laṱwa hone mathukhwi.”
^ Kana khamusi, “Vhane vha lwa na Yehova vha ḓo ofha.”
^ Kana “maanḓa.” Sedzani Mutevhe Wa Ṱhalutshedzo Ya Maipfi.
^ Kana “a shumela.”
^ Sedzani Mutevhe Wa Ṱhalutshedzo Ya Maipfi.
^ Thevhedz., “vharwa vha Isiraele.”
^ Kana khamusi, “u ita uri mutsi wa tshiṱhavhelo u dubele nṱha.”
^ Thevhedz., “raha.”
