Bugu Ya U Thoma Ya Samuele 13:1-23
13 Saulo o vha e na miṅwaha ya . . .* musi a tshi vha khosi,+ o vhusa Isiraele miṅwaha mivhili.
2 Saulo o nanga vhanna vha 3 000 kha ḽa Isiraele; vha 2 000 kha vhenevho vho vha vhe na Saulo ngei Mikemasha na ngei dzinguni ḽa thavhani dza Bethele, vha 1 000 vho vha vhe na Yonathani+ ngei Gibia+ kha ḽa Benyamini. Vhaṅwe vhathu a vha litsha vha vhuyelela madenndeni avho.
3 Yonathani a vhulaya tshigwada tsha maswole tsha Vhafilisita+ tshe tsha vha tshi Geba,+ Vhafilisita vha zwi pfa. Saulo a ita uri hu lidzwe luṋanga+ shangoni ḽoṱhe, ha pfi: “Vhahevheru kha vha zwi pfe!”
4 Vhaisiraele vhoṱhe vha pfa mafhungo a uri: “Saulo o vhulaya tshigwada tsha maswole a Vhafilisita, Vhaisiraele vha thoma u vhengwa nga Vhafilisita.” Ngauralo, vhathu vha vhudzwa uri vha tevhele Saulo ngei Giligala.+
5 Vhafilisita na vhone vha kuvhangana u itela u lwa na Vhaisiraele, vho vha vhe na gariki dza nndwa dza 30 000, vhaṋameli vha bere vha 6 000 na maswole o ḓalaho sa muṱavha wa khunzi-khunzini ya lwanzhe;+ vha gonya vha ya vha atha madennde Mikemasha vhubvaḓuvha ha Bethavena.+
6 Vhaisiraele vha vhona uri zwo vha vhifhela, ngauri vho vha vho tsikeledzea vhukuma; vhathu vha dzumbama mabakoni,+ luwani, hune ha vhulungwa waini na milindini ya zwisima.
7 Vhaṅwe Vhahevheru vho ita na u wela Mulambo wa Yorodane vha ya shangoni ḽa Gada na ḽa Giḽiada.+ Fhedzi Saulo o vha a tshi kha ḓi vha Giligala, vhathu vhoṱhe vhane vha khou mu tevhela vho vha vho tshuwa.
8 A fhedza maḓuvha a sumbe o lindela hu tshi swika tshifhinga tshe tsha vhewa nga Samuele, fhedzi Samuele a si ye Giligala, vhathu vha balangana vha sia Saulo.
9 Mafheleloni Saulo a ri: “Nḓiseleni tshiṱhavhelo tsha u fhiswa na tshiṱhavhelo tsha u pfumedzana.” A ṋekedza tshiṱhavhelo tsha u fhiswa.+
10 Fhedzi musi a tshi tou fhedza u ṋekedza tshiṱhavhelo tsha u fhiswa, Samuele a swika. Saulo a ya a mu ṱanganedza, a mu lumelisa.
11 Samuele a ri: “Wo ita mini?” Saulo a fhindula a ri: “Ndo vhona vhathu vha tshi khou balangana vha ntsia,+ iwe u sa khou swika nga tshifhinga tshe ra langana tshone, Vhafilisita vho vha vha tshi khou kuvhangana ngei Mikemasha.+
12 Nda humbula uri: ‘Zwino Vhafilisita vha ḓo ḓa vha lwa na nṋe ngei Giligala, vha wana ndi sa athu u humbela uri Yehova a ntakalele.’ Nga zwenezwo, nda pfa ndi tshi kombetshedzea u ṋekedza tshiṱhavhelo tsha u fhiswa.”
13 Samuele a amba na Saulo a ri: “Wo ita zwa vhutsilu. A wo ngo tevhedza ndaela ye Yehova Mudzimu wau a u ṋea yone.+ Arali u vhe wo i tevhedza, Yehova o vha a tshi ḓo khwaṱhisa muvhuso wau wa vhusa Isiraele lini na lini.
14 Fhedzi zwino muvhuso wau u nga si ime lini na lini.+ Yehova u ḓo wana munna ane a takadza mbilu yawe,+ Yehova u ḓo mu nanga uri a vhe murangaphanḓa wa vhathu vhawe,+ ngauri a wo ngo tevhedza zwe Yehova a u laya.”+
15 Samuele a ṱuwa Giligala a gonyela Gibia kha ḽa Benyamini, Saulo a vhala vhathu; a wana uri u kha ḓi vha na vhanna vha ṱoḓaho u vha 600.+
16 Saulo na murwa wawe Yonathani khathihi na vhathu vhane vha kha ḓi vha navho vho vha vho dzula Geba+ kha ḽa Benyamini. Vhafilisita vho vha vho gammba Mikemasha.+
17 Maswole a bva madenndeni a Vhafilisita e zwigwada zwiraru. Tshiṅwe tshigwada tsha fara nḓila i yaho Ofura, shangoni ḽa Shuala;
18 tshiṅwe tshigwada tsha fara nḓila i yaho Bethe-horoni,+ tshiṅwe tsha fara nḓila i yaho mukanoni wo livhanaho na govha ḽa Tseboimi, thungo ya sogani.
19 Ho vha hu si na muthu ane a ita zwithu nga tsimbi* shangoni ḽoṱhe ḽa Isiraele, ngauri Vhafilisita vho ri: “Vhahevheru vha songo ita mabanga na mapfumo.”
20 Vhaisiraele vhoṱhe vho vha vha tshi ya kha Vhafilisita u itela uri vha vha itele madzembe, piki, mbaḓo kana u ṱuṱulisa segere.
21 Mutengo wa u ṱuṱulisa madzembe, piki, zwishumiswa zwa forogo zwa maṋo mararu, mbaḓo na u lugisa thanda i re na ṱhodzi ya tsimbi* ya u khada kholomo wo vha u phimu.*
22 Nga ḓuvha ḽa nndwa, ho vha hu si na muthu na muthihi we a vha e na Saulo na Yonathani we a vha o fara banga kana pfumo;+ ho vha hu Saulo na murwa wawe Yonathani fhedzi vho faraho zwiṱhavhane.
23 Huno maswole* a Vhafilisita o vha o ya pharani ya Mikemasha.+
