Pfukelani kha mafhungo

Ndi Ngani Ṱhanzi dza Yehova vha sa Dzhii sia kha zwa Politiki?

Ndi Ngani Ṱhanzi dza Yehova vha sa Dzhii sia kha zwa Politiki?

 Ṱhanzi dza Yehova a vha dzhii sia kha zwa politiki nga ṅwambo wa zwiitisi zwa vhurereli, zwo thewaho kha zwine zwa funzwa nga Bivhili. A ri iti mafulo a u kunga vhathu, a ri voutheli mahoro a politiki kana vhonketheni, a ri sheli mulenzhe kha nyito naho i ifhio ya u wisa mivhuso. Ri tenda uri Bivhili i ṋea zwiitisi zwo khwaṱhaho zwa u tevhela buḓo ḽi tevhelaho:

  •   Ri tevhela tsumbo ya Yesu, we a hana u ṱanganedza vhuimo ha politiki. (Yohane 6:​15) O funza vhafunziwa vhawe uri vha songo vha “tshipiḓa tsha shango” nahone a zwi bvisela khagala uri a vho ngo tea u dzhia sia kha mafhungo a zwa politiki.​—Yohane 17:14, 16; 18:36; Marko 12:13-​17.

  •   Ri a fulufhedzea kha Muvhuso wa Mudzimu, we Yesu a amba zwi tevhelaho nga hawo: “Huno mafhungo maḓifha aya a Muvhuso a ḓo ḓivhadzwa ḽifhasini ḽoṱhe.” (Matthew 24:14) Samusi ri vhaimeli vha Muvhuso wa Mudzimu, vho laedzwaho uri vha ḓivhadze u ḓa hawo, a ri dzhii sia kha mafhungo a politiki a mashango oṱhe, u katela na a shango ḽine ra dzula khaḽo.​—2 Vhakorinta 5:​20; Vhaefesa 6:​20.

  •   Nga ṅwambo wa u sa dzhia hashu sia, ri kona u amba ro vhofholowa na vhathu vha madzangano oṱhe a politiki nga ha mafhungo maḓifha a Muvhuso wa Mudzimu. Ri lingedza u zwi sumbedza nga zwine ra zwi amba na zwine ra zwi ita uri ri ḓitika nga Muvhuso wa Mudzimu uri u piringulule thaidzo dzoṱhe dza shango.​—Psalme ya 56:11.

  •   Samusi ri tshi iledza politiki dzine dza fhandekanya vhathu, ri vhathihi kha vhurathu na vhukomana ha shango ḽoṱhe. (Vhakolosa 3:14; 1 Petro 2:17) Zwo fhambanaho na zwenezwo, vhurereli vhune ha dzhenelela kha mafhungo a politiki vhu fhandekanya miraḓo yaho.​—1 Vhakorinta 1:​10.

 U ṱhonifha mivhuso. Naho ri sa dzhii sia kha zwa politiki, ri ṱhonifha vhavhusi vha mivhuso ine ra vha fhasi hayo. Hezwi zwi tendelana na ndaela ya Bivhili ine ya ri: “Vhathu vhoṱhe nga vha ḓiṱukufhadzele vhavhusi vhavho.” (Vharoma 13:1) Ri thetshelesa mulayo, ri badela mithelo, nahone ri shumisana na mivhuso kha vhuḓidini ha u ṱhogomela vhadzulapo vhawo. A ri sheli mulenzhe kha vhuḓidini ha u wisa muvhuso, nṱhani hazwo ri tevhela nyeletshedzo ya Bivhili ya u rabelela “mahosi na vhoṱhe vha re vhuimoni,” zwihuluhulu musi vha tshi ita phetho dzine dza nga kwama mbofholowo yashu ya vhurabeli.​—1 Timotheo 2:​1, 2.

 Ri dovha ra ṱhonifha ndugelo dza vhaṅwe dza u ḓiitela phetho kha mafhungo a zwa politiki. Sa tsumbo, a ri thithisi dzikhetho kana u dzhenelela kha vhane vha ṱoḓa u voutha.

 Naa u sa dzhia sia ndi zwithu zwa musalauno? Hai. Vhaapostola na Vhakriste vha ḓanani ḽa u thoma ḽa miṅwaha vho dzhia vhukando vhu fanaho malugana na mivhuso i vhusaho. Bugu Beyond Good Intentions i ri: “Naho vho vha vha tshi tenda uri vha na vhuḓifhinduleli ha u ṱhonifha vhavhusi, Vhakriste vha u thoma a vho ngo shela mulenzhe kha mafhungo a zwa politiki.” Nga hu fanaho, bugu On the Road to Civilization i amba uri Vhakriste vha u thoma “vho vha vhe si na mukovhe kha zwa politiki.”

 Naa u sa dzhia sia kha zwa politiki zwi vhea khomboni u tsireledzea ha shango? Hai. Ri vhathu vha funaho mulalo lune vhavhusi a vho ngo tea u ofha tshithu. Ṱhogomelani muvhigo wo bveledzwaho nga dzangano ḽa National Academy of Sciences of Ukraine. U tshi amba nga ha u sa dzhia hashu sia, wonoyo muvhigo wo ri: “Vhanzhi ṋamusi vha nga kha ḓi sa takalela vhuimo ha Ṱhanzi dza Yehova; hezwi ndi zwone zwo itaho uri vha pomokwe nga muvhuso wa Vhunazi u re na tshiṱuhu na mivhuso ya Vhukomunisi tshifhingani tsho fhiraho.” Fhedzi na musi Ṱhanzi dzi tshi khou tovholwa nga muvhuso wa Soviet, vho “bvela phanḓa vhe vhadzulapo vha thetshelesaho mulayo.” Vho shuma nga u fulufhedzea na nga mbilu yoṱhe mabulasini na dzifemeni nahone a vho ngo vhuya vha vhonala vhe na khombo kha muvhuso wa Vhukomunisi.” Nga hu fanaho ṋamusi, wonoyo muvhigo wo phetha nga ḽa uri pfunzo na maitele a Ṱhanzi dza Yehova a zwi “vhei khomboni u tsireledzea na u fulufhedzea ha shango naho ḽi ḽifhio.”