Pfukelani kha mafhungo

Ndi Ngani Ṱhanzi dza Yehova vha sa yi Nndwani?

Ndi Ngani Ṱhanzi dza Yehova vha sa yi Nndwani?

Ṱhanzi dza Yehova a vha yi nndwani nga nṱhani ha zwiitisi zwi tevhelaho:

  1. U thetshelesa Mudzimu. Bivhili i amba uri vhashumeli vha Mudzimu vha ḓo “dzhia mafumo vha fula malembe ngao’,” nahone “a vha tsha ḓo guda u lwa.”—Yesaya 2:4.

  2. U thetshelesa Yesu. Yesu o vhudza muapostola Petro a ri: “Vhuyedzedza banga ḽau vhudzuloni haḽo, ngauri vhoṱhe vhane vha fara mabanga vha ḓo fa nga banga.” (Mateo 26:52) Nga zwenezwo Yesu a sumbedza uri vhatevheli vhawe vha nga si shumise zwiṱhavhane zwa nndwa.

    Vhafunziwa vha Yesu vha thetshelesa ndaela ine ya amba uri a vha “tshipiḓa tsha shango” zwenezwo vha zwi sumbedza nga u sa dzhia sia kha mafhungo a zwa politiki. (Yohane 17:16) A vha gwalabi musi hu tshi itwa phetho dza zwa vhuswole kana u thivhela vhathu vhane vha ṱoḓa u dzhenela vhuswole.

  3. U funa vhaṅwe. Yesu o laedza vhafunziwa vhawe uri vha “funane.” (Yohane 13:34, 35) Nga zwenezwo vho vha vha tshi ḓo vhumba vhurathu na vhukomana ha shango ḽothe, vhune ha sa ḓo vha na muraḓo une wa ḓo lwa na muṅwe.—1 Yohane 3:10-12.

  4. Tsumbo ya Vhakriste vha u thoma. Encyclopedia of Religion and War i ri: “Vhatevheli vha Yesu vha u thoma-thoma vho hana nndwa na u ya vhuswoleni,” nge vha ṱhogomela uri eneo maitele a “lwisana na lufuno lwo funzwaho nga Yesu na ndaela ya uri muthu a fune maswina awe.” Nga hu fanaho, mugudi wa zwa vhurereli wa Mudzheremane ane a pfi Peter Meinhold o amba zwi tevhelaho nga vhenevho vhafunziwa vha Yesu, o ri: “Zwo vha zwi tshi dzhiiwa zwi songo fanela uri Mukriste a vhe swole.”

U thusa tshitshavha

Ṱhanzi dza Yehova vha a thusa vhukuma tshitshavha nahone a vha na khombo kha mashango ane vha dzula khao. Ri ṱhonifha mivhuso, u tendelana na ndaela dzi re Bivhilini:

  • “Vhathu vhoṱhe nga vha ḓiṱukufhadzele vhavhusi vhavho.”—Vharoma 13:1.

  • “Kesare mu ṋeeni zwi re zwa Kesare, Mudzimu ni mu ṋee zwi re zwa Mudzimu.”—Mateo 22:21.

Nga zwenezwo, ri thetshelesa milayo, ri badela mithelo nahone ri shumisana na mivhuso kha vhuḓidini ha u ita uri tshitshavha tshi dzule tsho tsireledzea.