Nye o sima catiamẽla keteke 21 ya Cembanima yunyamo wo 2012, okuti olio eteke va Maya va popele vati, lia laikele oku nena apongoloko voluali luosi? Citava okuti elavoko liaco lia ku nenela esanju, ale esumuo. Kuli hẽ ovina vikuavo ka via suilepo omanu va siata oku popia viatiamẽla kesulilo lioluali okuti noke ka vi tẽlisiwa?

Nye ci popiwa catiamẽla ‘kesulilo lioluali’ lia tukuiwa Vembimbiliya? (Mateo 24:3) Vamue va kuete usumba wokuti, ilu lieve li ka timĩhiwa londalu. Vakuavo, va kuete esanju lovina vi laika oku pita kesulilo lioluali. Valua, va konyõha omo va sima vati, esulilo lioluali ka liya lonjanga. Omanu vaco va kuete hẽ ovisimĩlo viesanda ale ovisimĩlo viavo viocili?

Citava okuti eci o yeva ovina Embimbiliya li longisa viatiamẽla kesulilo lioluali lulo, o komõha. Embimbiliya ka li lombolola lika ovina vi ka pita kesulilo lioluali. Olio, li lombololavo esunga lieci omanu valua, va siatela oku konyõha okuti, ka va yongola vali oku talamẽla toke kesulilo. Tu ku laleka oku kũlĩhĩsa ndomo Embimbiliya li tambulula apulilo a siata oku lingiwa lomanu a tiamẽla kesulilo lioluali.

EMBIMBILIYA LI TAMBULULA NDOCO: “[Suku] wa seveta oluali koviseveto vialuo okuti ka lu sengiwa vali.”​—Osamo 104:5.

Ilu lieve ka li ka nyõliwa londalu pamue locimalẽho cikuavo. Momo Embimbiliya li longisa okuti, omanu va ka kala palo posi otembo ka yi pui. Elivulu Liosamo 37:29, li popia hati: “Olondingesunga vi piñala ofeka, vi tungamo oloneke ka vi pui.”​—Osamo 115:16; Isaya 45:18.

Suku noke yoku lulika ilu lieve, wa popia hati: ‘Lia posoka’ kuenda wa amamako sanjukila upange waye. (Efetikilo 1:31) Suku ka yongola oku nyõla ongongo, pole, wa likuminya oku “nyõla ava va nyõla ilu lieve,” oco a li teyuile otembo ka yi pui.​—Esituluilo 11:18.

Citava okuti poku tanga olondaka vi sangiwa kelivulu lia 2 Petulu 3:7, o komõha. Ocinimbu caco ci popia ndoco: “Ilu li kasi ndeti longongo ya angiliyiwila ondalu.” Olondaka evi hẽ ka vi lekisa okuti ilu lieve li ka nyõliwa londalu? Ocili okuti, olonjanja vimue Embimbiliya li tukula “ilu,” “ongongo” kuenda “ondalu” vupopi wocindekaise. Kũlĩhĩsa ulandu u sangiwa kelivulu Liefetikilo 11:1, kuna tu tanga ndoco: “Oluali luosi lua kala lelimi limosi lupopi umosi.” Ondaka “oluali” ya tukuiwa ndeti, yi lomboloka omanu va tungile kilu lieve.

Olondaka via livangako vi lekisa okuti, ilu, ongongo, kuenda ondalu via tukuiwa kelivulu lia 2 Petulu 3:7, vi lombolokavo upopi wocindekaise. Kocinimbu catãlo leci cepandu, ku lombolola ovina via pita kotembo Yetande lio koloneke via Noha. Kotembo yaco, oluali luosi lua nyõliwa pole, ilu lieve ka lia takatele. Puãi, toke cilo oluali ka lua takatele. Omo liaco, poku lekisa okuti Etande lia kundula “oluali” ci lomboloka omanu vãvi va kala kilu lieve. Poku tukula okuti “ilu” lia nyõliwa, ci lombolokavo enyolẽho lia vana va vialele omanu palo posi. (Efetikilo 6:11) Cimuamue haico okuti, olondaka via tukuiwa kelivulu lia 2 Petulu 3:7, vi lomboloka oku nyõliwa elisi kuolondigãivi kuenda ovoviali osi a vĩha.

EMBIMBILIYA LI TAMBULULA NDOCO: “Oluali lu takata loñeyi yaluo, puãi u o lingainga ocipango ca Suku o kala oloneke ka vi pui.” ​—1 YOANO 2:17.

“Oluali” lua tukuiwa ndeti okuti lu takata, ka lu lomboloka osi. Pole, lu lomboloka omanu vana ka va lingi ocipango ca Suku. Ndeci ondotolo yi teta onepa yimue yetimba ya nyõleha oco yi popele omuenyo wombeyi, cimuamue haico Suku a ka linga okuti, o ka  ‘malãko’ evĩho liosi oco omanu vawa va kale palo posi lesanju. (Osamo 37:9) Omo liaco, “esulilo lioluali,” li pondola oku tu nenela esanju.

Embimbiliya limue poku tukula ondaka “esulilo lioluali” li popia ndoco: “Esulilo liovina viosi,” ale “esulilo liotembo.” (Mateo 24:3; Nova Versão Internacional) Omo okuti omanu longongo va ka puluka kesulilo, ka ca sungulukile hẽ oku sima okuti ku keya otembo yokaliye yovina viosi? Embimbiliya li eca etambululo poku tukula olonjanja vialua okuti, ‘omuenyo wiyako.’​—Luka 18:30.

Yesu wa tukula otembo yi keya kovaso yoloneke okuti, ‘oku tumbuluiwa kuovina viosi.’ Eye o ka tumbulula ekalo liomanu ndeci Suku a yonguile kefetikilo lioluali. (Mateo 19:28) Kotembo yaco, tu ka kuata esanju lialua poku mola oku tẽlisiwa kuovisonehua evi:

• Oluali luokaliye palo posi loku kolapo kuomanu vosi.​—Isaya 35:1; Mika 4:4.

• Upange u komõhisa haiwo u nena esanju.​—Isaya 65:21-23.

• Ovovei osi a ka sakuiwa.​—Isaya 33:24.

• Ava va kuka va ka linga amalẽhe.​—Yovi 33:25.

• Ava va fa va ka pinduiwa.​—Yoano 5:28, 29.

Nda tu linga “ocipango ca Suku,” lovina a tu tuma, ka tu kuatela usumba esulilo lioluali. Pole, tu kuata elavoko.

EMBIMBILIYA LI TAMBULULA NDOCO: “Haico ene, eci vu mola ovina evi okuti vi kasi loku lingiwa, limbuki okuti Usoma wa Suku u kasi ocipepi.”​—LUKA 21:31.

Ulongisi umue, wa soneha velivulu li tukuiwa hati, The Last Days Are Here Again [Oloneke Via Sulako Vieya Ale,] ndoco: “Apongoloko a siata oku iya ño ocipikipiki, kuenda ekalo lĩvi liomanu, li ka nena esulilo lioluali lulo.” Ca piãla enene nda ka tu pondola oku lombolola ndomo epongoloko liaco lekalo lĩvi vi ka pita.

Ocili okuti, ovaprofeto vana va soneha ovitumasuku Viembimbiliya viatiamẽla kesulilo lioluali, ka va setekele oku lombolola ovolandu a pita kotembo yavo lovisimĩlo viavo muẽle. Ovo, va vetiyiwa la Suku oco va lombolole ovina vi lekisa okuti, esulilo lioluali lulo, li kasi ocipepi. Kũlĩhĩsa vimue pokati kovitumasuku viaco, kuenda limbuka ovitumasuku vi kasi oku tẽlisiwa koloneke vilo.

•   Ovoyaki, onjala, ovilemawe, kuenda afengi lovovei a ponda.​—Mateo 24:7; Luka 21:11.

• Evokiyo lievĩho.​—Mateo 24:12.

• Ilu lieve li kasi oku nyõliwa lomanu.​—Esituluilo 11:18.

• Omanu va lisole ovo muẽle, va sole olombongo, kuenda va sole ayele okuti Suku ci sule.​—2 Timoteo 3:2, 4.

• Oku sandoka kuepata.​—2 Timoteo 3:2, 3.

• ◼ Omanu valua ka va tava kondimbukiso yokuti, esulilo li kasi ocipepi.​—Mateo 24:37-39.

• ◼ Oku kundiwa kuolondaka viwa Viusoma wa Suku voluali luosi.​—Mateo 24:14.

Olondaka via Yesu viokuti, eci vu mola “ovina evi viosi,” vi tu vetiya oku limbuka okuti, esulilo lioluali li kasi ocipepi. (Mateo 24:33) Omo okuti Olombangi Via Yehova vi tava kondimbukiso yesulilo, vi kasi oku kundila omanu kueci ci soka 236 kolofeka.

EMBIMBILIYA LI TAMBULULA NDOCO: ‘Osimbu va popia vati: ‘Tua kolapo, tu kasi lombembua!’ oco oku nyõleha ocipikipiki kuiya kokuavo, ndeci olongembia viya ku o misi. Kuenje, lomue o puluka.’​—1 VA TESALONIKE 5:3.

Embimbiliya li sokisa esulilo lioluali lolongembia vioku cita okuti, vi kuata ukãi ocipikipiki. Esulilo li keya ocipikipiki, ndeci olomgembia vi kuata ukãi o misi okuti, vi li vokiya toke koku cita. Ondotolo yaye pamue yu sapuila eteke lioku cita. Kuenje, ndaño otembo yaco yi tumãla, pole, wa kolela okuti ndopo o cita. Cimuamue haico ci pita loku kuata ovisimĩlo ka via suilepo viatiamẽla kesulilo lioluali okuti, ndaño ka via suilepo pole, ka vi pongolola “oloneke via sulako.”​—2 Timoteo 3:1.

Ove pamue o lipula ndoco: ‘Omo tua siata oku mola ondimbukiso yesulilo lioluali, momo lie omanu valua ka va limbukila ondimbukiso yaco?’ Embimbiliya li lekisa okuti, eci esulilo lioluali li kala ocipepi, omanu valua va ka tomba ondimbukiso yaco. Omo ka va ka limbuka apongoloko vokuenda kuoloneke via sulako, va ka fetika oku sepula ndoco: “Tunde eteke akulu vetu va pekela, ovina viosi vi kasi ño ndeci via kala tunde kefetikilo lioluali.” (2 Petulu 3:3, 4) Eci ci lekisa okuti, ondimbukiso yoloneke via sulako ya  laikele oku muiwa lomanu, pole, valua va yi sepula.​—Mateo 24:38, 39.

Ocipama cilo ca konomuisa lika olondimbukiso vimue via tukuiwa Vembimbilisba vi lekisa okuti esulilo li kasi ocipepi. a O yongola hẽ oku lilongisa vali ovina vikuavo? Momo lie ku pingila Kombangi yimue ya Yehova oco yu ku longise Embimbiliya ocali? O pondola oku lingila elilongiso liaco konjo yove, kocitumãlo cikuavo ca sunguluka, ale votelefone. Ove o sukila lika oku sokiya ciwa otembo kuenje, o ka tambula asumũlũho alua.