Efetikilo 6:1-22
6 Eci omanu va fetika oku livokiya kilu lieve kuenda oku cita omãla vakãi,
2 omãla va Suku* yocili+ va mola okuti omãla vakãi vomanu va posoka. Kuenje ovo va kuela akãi vosi va nõla.
3 Noke Yehova wa popia hati: “Espiritu liange ka li pandikisa vali lomunu otembo yenda ño hũ,+ momo eye ukuetimba.* Omo liaco, oloneke viaye vi ka tẽla 120 kanyamo.”+
4 Koloneke viaco kuenda koloneke via kuamamo, kilu lieve kua kala ovindululu.* Vokuenda kuotembo yaco omãla va Suku yocili vamamako oku lipekela lomãla vakãi vomanu kuenje akãi vaco va cita omãla. Kosimbu omãla vaco va kala alume va pamele calua, haivo va kemãlele.
5 Kuenje Yehova wa mola okuti evĩho liomanu lia livokiya calua kilu lieve kuenda ovisimĩlo viosi viovitima viavo, via tekelele lika kevĩho otembo yosi.+
6 Yehova wa livela omo a lulika omanu kilu lieve kuenda wa yeva esumuo vutima.*+
7 Yehova wa popia hati: “Ndi nyõla kilu lieve omanu nda lulika, omanu kumue lovinyama viovimbo, ovinyama vi likoka posi kuenda oviluvo vi palãla kovailu, momo nda livela omo nda va lulika.”
8 Pole, Noha wa sanga ohenda kovaso a Yehova.
9 Owu owo ulandu wa Noha.
Noha wa kala ulume umue ukuesunga,+ wa pua eko pokati komanu va kala kotembo* yaye. Noha wa endaenda la Suku yocili.+
10 Vokuenda kuotembo, Noha wa linga isia yomãla vatatu valume okuti, Semi, Hama la Yafete.+
11 Pole, ilu lieve lia molẽhele okuti lia nyõleha kovaso a Suku yocili kuenda kua kala ungangala walua.
12 Kuenje Suku wa limbuka okuti ilu lieve lia nyõleha;+ omanu vosi va enda oku linga lika ovina vĩvi.+
13 Noke Suku wa sapuila Noha hati: “Nda nõlapo oku nyõla omanu vosi, momo kilu lieve kueyuka ungangala mekonda liavo, omo liaco, ndi va nyõlela kumosi lilu lieve.+
14 Li tungila ocimbaluku* lavaya awa.+ Kapamo olohondo kuenda ci laña lekokoto+ vokati lo kosamua.
15 O ci tunga ndoco: Usõvi wocimbaluku u kuate 300 kovikeya,* upati waco 50 kovikeya, oku lepa kuaco 30 kovikeya.
16 O ci kapa onjanela oco yece ocinyi* vocimbaluku okuti, yi kuata ukeya umosi oku upisa kolusoka. Epito liaco li kale ponele+ kuenda ci kapa osapalalo yatete, yavali, leyi yatatu.
17 “Ame ndi nena etande liovava+ kilu lieve, oco li nyõle oviluvo viosi vi kuete omuenyo* vemẽhi liovailu. Cosi ci kasi kilu lieve ci nyõleha.+
18 Ñasi oku linga ocisila cimue love kuenje ove o sukila oku iñila vocimbaluku, ove kumue lomãla vove valume, lukãi wove kuenda akãi vomãla vove.+
19 Oviluvo viosi vi kasi lomuenyo vi kapa vivali vivali vocimbaluku+ oco vi popeliwe kumue love okuti, ulume lomange;+
20 koviluvo vi palãla ndapata avio, kovinyama vio vimbo ndapata avio, kovinyama viosi vi likoka posi ndapata avio, ovio vi iñila love vivali vivali oco vi popeliwe.+
21 Ove puãi, ongolola loku pongiya ovikulia viñi viñi+ oco vi kale okulia kuove kuenda kuovinyama.”
22 Kuenje Noha wa linga cosi Suku o handelekele. Eye wa linga muẽle cosi.+
Atosi Pombuelo
^ Ondaka yimue okuti kelimi lio Heveru yi tiamisiwila komãla va Suku okuti, ovangelo.
^ Ale pamue, “momo eye o linga ndeci ci likuata letimba.”
^ Pamue ci lomboloka “Vakuakunyõla” okuti, vana va kupula vakuavo. Tala Elomboluilo.
^ Ale “co vala vutima.”
^ Lit., “kovitumbulukila viaye.”
^ Lit., “ocikasia”; onaviyu yinene.
^ Ukeya umosi u soka 44.5 kolosentimetulu. Tala Alombo. B14.
^ Kelimi lio Heveru tsóhar. Ondaka eyi ka yi tiamisiwila kepangu limue lieca ocinyi, ale onjanela, pole, ondaka yaco citava okuti, yi tiamisiwila kolusoka lu kuete ukeya umosi konepa ya velapo koku lepa.
^ Ale “ongusu yomuenyo.”
