Orevista o kasi oku tanga ndeti, ya fetika oku sandekiwa kunyamo wo 1879. Omo okuti otembo yi pongoloka, tua siatavo oku linga apongoloko Vutala Wondavululi. (Tala alitalatu kilu liemẽla lilo.) Vocipama cilo, o ka limbuka apongoloko a lingiwa Vutala Wondavululi. Ocina cipi ca litepa?

Kolofeka vialua, omanu vamue va siata oku sandiliya asapulo etu vo Internet, kuenje poku tanga asapulo aco, va lembelekiwa calua. Poku konomuisa vo Internet va pondola oku sanga asapulo alua. Citava oku tanga alivulu alua, olorevista, kuenda ovikanda viasapulo vo Internet.

Omo liaco, onumbi yetu yo Internet, www.jw.org., ya sokiyiwa ciwa okuti ci leluka oku lingamo akonomuiso. Vana va siata oku sandiliya asapulo vonumbi yetu yo Internet, va pondola oku tanga alivulu a sandekiwa kueci ci pitahãla 430 kalimi. Oku upisa ketendelo lilo, vakuakutanga asapulo etu, va pondola oku nõla ovipama vina via siata oku sandekiwa olosãi viosi Vutala Wondavululi woku tangela peka, okuti cilo ovipama viaco, vi sangiwa lika vonumbi yetu yo Internet. a

Omo okuti tu ka sandeka ovipama vialua vo Internet, Utala Wondavululi wowiñi, okuti wa enda oku kuata 32 kamẽla wa tepuluiwa kuenje, u kuete lika 16 kamẽla. Cilo Utala Wondavululi u kasi oku sandekiwa kueci ci soka 204 kalimi. Omo Utala Wondavululi wa tepuluiwa, ci ka ecelela oku u pongoluila kalimi alua.

Tu lavoka okuti apongoloko aco a tu kuatisa oku kundila omanu valua esapulo Liembimbiliya lina li nena omuenyo ko pui. Omo liaco, tu ka amamako oku sandeka asapulo alua hao a vetiya ovitima viomanu oku tangela peka kuenda vo Internet, oco tu kuatise omanu valua va sumbila Embimbiliya, haivo va yongola oku kũlĩha eci olio li longisa.

Asonẽhi