A tiai ia Iehova ma te tiaturiraa e a faaitoito

“Tiai ia Iehova [ma te tiaturiraa]; e faaitoito; e na ˈna e faaitoito mai i to aau ra: e tena na, e tiai â oe ia Iehova [ma te tiaturiraa].”—SALAMO 27:14.

1. Eaha te faufaaraa o te tiaturiraa, e e nafea te taˈo e faaohipahia ˈi i roto i te mau Papai?

 E AU te tiairaa, aore ra tiaturiraa, mau i te maramarama anaana. E tauturu mai te reira ia hiˈo na nia ˈˈe i te mau fifi e vai nei e ia faaruru i te tau no a muri aˈe ma te itoito e te oaoa. O Iehova anaˈe te nehenehe e horoa mai i te hoê tiaturiraa papu, o ta ˈna hoi e rave nei na roto i ta ˈna Parau faaurua. (Timoteo 2, 3:16) Inaha i roto i te Bibilia, e rave rahi taime e faahitihia ˈi te mau taˈo “tiaturiraa,” “tiaturihia,” e ma te “tiaturi” no te faataa i te tiairaa ru e te papu i te hoê mea maitai e i te mea e tiaihia ra. * E ere taua tiaturiraa ra i te tahi noa hinaaro, aita e niu aore ra e ravea e tupu ai te reira.

2. Eaha te faahopearaa o te tiaturiraa i nia i te oraraa o Iesu?

² A û ai oia i te tamataraa e te fifi, ua hiˈo Iesu na nia ˈˈe i te taunei e ua tiai ia Iehova ma te tiaturiraa. “O tei faaoromai i te [pou haamauiuiraa], aore i haapao i te haama, [no te oaoa] i tuuhia mai i mua i tana aro; e te parahi ra i teie nei i te pae atau i te terono o te Atua ra.” (Hebera 12:2; MN) No te mea ua tiatonu maite oia i te ravea e faatia ˈi i te mana arii o Iehova e e faaraa ˈi i to ˈNa iˈoa, aita roa ˈtu Iesu i hahi ê i to ˈna haerea auraro i te Atua, noa ˈtu eaha ta ˈna i faaruru.

3. Eaha te faahopearaa o te tiaturiraa i nia i te oraraa o te mau tavini a te Atua?

³ Te faahiti ra te arii Davida i te taairaa i rotopu i te tiaturiraa e te itoito, ma te parau e: “Tiai ia Iehova [ma te tiaturiraa]; e faaitoito; e na ˈna e faaitoito mai i to aau ra: e tena na, e tiai â oe ia Iehova [ma te tiaturiraa].” (Salamo 27:14) Ia hinaaro tatou ia itoito to tatou aau, eiaha roa ˈtu tatou e vaiiho i to tatou tiaturiraa ia mohimohi, ia vai maramarama noa râ i roto i to tatou feruriraa e ia poihere atu tatou. Ia na reira tatou, e nehenehe tatou e pee ia Iesu i roto i te faaiteraa i te itoito e te itoito rahi a rave ai tatou i te ohipa ta ˈna i faaue i ta ˈna mau pǐpǐ e rave. (Mataio 24:14; 28:19, 20) Oia mau, te faahitihia ra te tiaturiraa e te  faaroo e te here ei huru maitai faufaa roa o te vai maoro ta te mau tavini a te Atua e faaite rahi nei.—Korinetia 1, 13:13.

Mea “rahi” anei to oe “tiaturiraa”?

4. Eaha ta te mau Kerisetiano faatavaihia e to ratou mau hoa o te mau “mamoe ê atu” e tiai ru nei?

⁴ E oraraa faahiahia te tiai maira i te nunaa o te Atua. Te tiai ru nei te mau Kerisetiano faatavaihia i te tavini e te Mesia i nia i te raˈi, area te mau “mamoe ê atu” ra, te tiaturi ra ïa ia ‘faaorahia ratou i te tapea o te pohe e ia noaa te tiamâ maitai o te tamarii [i te fenua] a te Atua.’ (Ioane 10:16; Roma 8:19-21; Philipi 3:20) To roto atoa te tiamâraa mai i te hara e te mau faahopearaa ino roa o te reira i taua “tiamâ maitai” ra. E tuu mai iho â Iehova—Tei horoa mai i ‘te mau mea maitatai i hohia mai e te mau mea tia roa e maitai roa ˈi’—i te mea maitai roa ˈˈe na ta ˈna mau tavini taiva ore.—Iakobo 1:17; Isaia 25:8.

5. E nafea e “rahi” ai to tatou “tiaturiraa”?

⁵ Eaha te tuhaa rahi a te tiaturiraa Kerisetiano i roto i to tatou oraraa? I roto i te Roma 15:13 (MN), te taio nei tatou e: “Ia faaîhia mai outou i te oaoa e te hau i te faarooraa e te Atua, e noaa ˈi te tiaturiraa, ia rahi to outou [tiaturiraa] i te mana o te [varua moˈa] ra.” Oia, e nehenehe te tiaturiraa e faaauhia, eiaha i te hoê mori hinu i roto i te poiri, i te mau hihi mahana anaana râ i te poipoi, a î atu ai to tatou oraraa i te hau, te oaoa, te tumu, e te itoito. A tapao e e ‘rahi to tatou tiaturiraa’ ia tiaturi tatou i te Parau papaihia a te Atua e ia fanaˈo tatou i to ˈna varua moˈa. Te na ô ra te Roma 15:4 e: “Te mau parau atoa . . . i papaihia i mutaa ihora, i papaihia ïa ia ite tatou; ia noaa to tatou tiairaa [ma te tiaturiraa], i te faaoromai e te mahanahana o te parau i papaihia ra.” No reira a ui ia oe iho: ‘Te faaoraora noa ra anei au i to ˈu tiaturiraa ma te haapii maite i te Bibilia, ma te taio i te reira i te mau mahana atoa? Te ani pinepine ra anei au i te varua o te Atua na roto i te pure?’—Luka 11:13.

6. Ia anaana noa to tatou tiaturiraa, ia ara ïa tatou i te aha e tia ˈi?

⁶ Ua haapuaihia Iesu, ei Hiˈoraa no tatou, e te Parau a te Atua. Ma te haamanaˈo maite ia ˈna, e ore tatou ‘e toaruaru e e ore to tatou aau e taiâ.’ (Hebera 12:3) Mea tano ia parau e mai te peu e e iti mai to tatou tiaturiraa no ǒ mai i te Atua ra i roto i to tatou feruriraa e to tatou aau aore ra ia tiatonu tatou i te tahi atu mea—peneiaˈe te mau mea materia aore ra te mau tapao a teie nei ao—e oioi roa tatou i te paruparu i te pae varua, a ere atu ai paha i te puai e te itoito morare. E e nehenehe atoa tatou e ‘[iri] i to tatou faaroo.’ (Timoteo 1, 1:19; MN) Area te tiaturiraa mau ra, e haapuai ïa i to tatou faaroo.

Tiaturiraa—faufaa roa no te faaroo

7. Mea faufaa roa te tiaturiraa no te faaroo, e nafea ïa?

⁷ “Te faaroo, o te tiai-papu-raa ïa i te mau mea e tiaturihia nei, te ite-papu-raa i te mau mea aore hoi e itehia ra,” ta te Bibilia ïa e parau ra. (Hebera 11:1, MN) No reira, e ere te tiaturiraa i te tahi noa mea o te apee i te faaroo; e tuhaa faufaa te reira no te faaroo. A hiˈo na ia Aberahama. I te manaˈo taata, ua mairi to raua Sara ta ˈna vahine matahiti no te fanau i te tamarii i to Iehova fafauraa i te horoa ˈtu i te tahi tamaiti aiˈa. (Genese 17:15-17) Eaha to Aberahama huru? “O tei ore . . . i haapao ra e aore e [tiaturiraa], faaroo atura ïa ma te [tiaturiraa], e e riro oia ei metua no te mau fenua atoa e rave rahi.” (Roma 4:18; MN) Oia, ua horoa to Aberahama tiaturiraa no ǒ mai i te Atua ra i te hoê niu papu i to ˈna faaroo e e fanau mai oia i te hoê tamaiti. E to ˈna faaroo, ua haapuai ïa e ua haapapu i to ˈna tiaturiraa. Inaha, ua noaa ia Aberahama e ia Sara te itoito no te faarue i to raua nohoraa e to raua fetii e e ora e tae noa ˈtu i to raua poheraa i roto i te mau tiahapa i te hoê fenua ê!

8. E nafea te faaoromai haapao maitai e haapuai ai i te tiaturiraa?

⁸ Ua haapuai noa Aberahama i to ˈna tiaturiraa ma te auraro roa ia Iehova, noa ˈtu e mea fifi te reira. (Genese 22:2, 12) Oia atoa, ma te auraro e te faaoromai i roto i te taviniraa a Iehova, e nehenehe tatou e tiaturi i ta tatou utua maitai. Ua papai Paulo e: “Na te faaoromai e faatupu i te [tiaraa taata fariihia],” o te faatupu hoi i te tiaturiraa, e ‘e ore te [tiaturiraa] e faahaama mai.’ (Roma 5:4, 5; MN) No reira Paulo i papai atoa ˈi  e: “Te hinaaro nei matou ia faaite tamau maite â outou atoa i taua itoito na, ia noaa te [tiaturiraa] ite papu e tae noa ˈtu i te hopea ra.” (Hebera 6:11; MN) E nehenehe taua huru feruriraa maitai ra, niuhia i nia i te hoê taairaa piri roa e o Iehova, e tauturu ia tatou ia faaruru i te mau huru fifi atoa ma te itoito, e ma te oaoa atoa.

“E oaoa i te tiaturiraa”

9. Te rave-tamau-raa i te aha e nehenehe ai tatou “e oaoa i te tiaturiraa”?

⁹ Ua hau ê roa to tatou tiaturiraa no ǒ mai i te Atua ra i te mau mea atoa ta te ao e nehenehe e pûpû mai. Te na ô ra te Salamo 37:34 e: “E tiai atu ia Iehova [ma te tiaturiraa], a haapao maite ai i to ˈna eˈa, e na ˈna oe e faateitei ia noaa ia oe te fenua; e ite oe i te pohe o te feia paieti ore ra.” Oia, e tano roa ia ‘oaoa tatou i te [tiaturiraa].’ (Roma 12:12; MN) No te reira râ, e mea tia ia manaˈo noa tatou i to tatou tiaturiraa. Te manaˈo tamau ra anei oe i to oe tiaturiraa no ǒ mai i te Atua ra? E nehenehe anei oe e feruri ia oe i roto i te Paradaiso, ma te oraora maitai e te tapitapi ore, haaatihia e te feia here, e ma te rave i te ohipa au mau? Te feruriruri ra anei oe i te mau hohoˈa o te Paradaiso i roto i ta tatou mau papai? E au tera feruriruri-tamau-raa i te horoiraa i te hoê haamaramarama a ite atu ai i te mau mea nehenehe mau. Ia ore tatou e horoi i te haamaramarama, eita tatou e ite maitai i te nehenehe o te mau mea no te reporepo. E nehenehe te tahi atu mau mea e haru i to tatou ara-maite-raa. Eiaha roa ˈtu tatou e vaiiho i te reira ia tupu!

10. No te aha te hiˈoraa tatou i te utua maitai e ohipa maitai ai i nia i to tatou taairaa e o Iehova?

¹⁰ Parau mau, o to tatou here ia Iehova te tumu rahi e tavini ai tatou ia ˈna. (Mareko 12:30) E nehenehe râ tatou e tiai ru i te utua maitai. Inaha, te hinaaro ra Iehova ia na reira tatou! Te na ô ra te Hebera 11:6 (MN) e: “Aore e faaroo ra e ore roa oia e mauruuru: o te haamori i te Atua ra, e faaroo oia e, e Atua, e tia ˈi, e o oia te faautua [maitai] i te feia i imi papu ia ˈna ra.” No te aha Iehova e hinaaro ai ia hiˈo tatou ia ˈna mai te Faautua maitai? No te mea ia na reira tatou, te faaite ra ïa tatou e ua ite maitai tatou i to tatou Metua i te raˈi. Mea horoa noa oia, e mea here na ˈna ta ˈna mau tamarii. A feruri na e e oioi tatou i te peapea e te toaruaru aita anaˈe to tatou ‘e tiaturiraa e e [tau no a muri aˈe].’—Ieremia 29:11; MN.

11. Mea nafea to ˈna tiaturiraa no ǒ mai i te Atua ra i te tautururaa ia Mose ia rave i te mau faaotiraa paari?

¹¹ Te hoê hiˈoraa faahiahia o te hoê taata i tiatonu noa i to ˈna tiaturiraa no ǒ mai i te Atua ra, o Mose ïa. Ei “tamaiti a te tamahine a Pharao,” e mana e e tiaraa teitei to Mose e tei ia ˈna ra te mau taoˈa a Aiphiti. Ua tapi anei oia i taua mau mea ra, aore ra ua tavini anei oia ia Iehova? Ua maiti Mose ma te itoito i te tavini ia Iehova. No te aha? No te mea ua “haapao maite . . . oia i te utua [maitai] ra ei hoo.” (Hebera 11:24-26;  MN) Oia, aita roa ˈtu Mose i tâuˈa ore i te tiaturiraa ta Iehova i tuu i mua ia ˈna.

12. No te aha te tiaturiraa Kerisetiano e au ai i te hoê taupoo?

¹² Ua faaau te aposetolo Paulo i te tiaturiraa i te hoê taupoo. E paruru to tatou taupoo taipe i to tatou puai feruriraa, a nehenehe atu ai tatou e rave i te mau faaotiraa paari, e haamau i te mau fa faufaa roa papu, e e tapea i te taiva ore. (Tesalonia 1, 5:8) E taupoo taipe anei to nia i to oe upoo i te mau taime atoa? Mai te peu e e, e niu ïa oe mai ia Mose raua Paulo i to oe tiaturiraa ‘eiaha i nia i te taoˈa rahi itea ore, i te Atua râ o tei horoa hua mai i te mau mea atoa nei ei raveraa na tatou.’ Parau mau, e titauhia te itoito no te patoi i te mau peu apî matauhia, ma te haapae i te mau fa miimii, e hoona râ te tutavaraa! No te aha hoi e farii ai i te mau mea atoa e ere i “te ora mau,” o te tiai maira i te feia e tiaturi ra e e here ra ia Iehova?—Timoteo 1, 6:17, 19, MN.

“E ore roa vau e faarue ia oe”

13. Eaha ta Iehova e haapapu ra i ta ˈna mau tavini taiva ore?

¹³ E titauhia ia feruri maitai te feia o te niu i to ratou tiaturiraa i nia i teie nei faanahoraa o te mau mea, i te mau mea riaria i mua ia ratou a faaruru ai teie nei ao i “te pohe” mauiui o te puai noa ˈtu. (Mataio 24:8) Aita râ te feia e tiai ra ia Iehova ma te tiaturiraa e riaria ra i te reira. E tamau ratou i te ‘parahi ma te [panoonoo ore] e e faaea noa ma te mǎtaˈu ore i te ino.’ (Maseli 1:33; MN) No te mea aita ratou e tiai ra i teie nei faanahoraa ma te tiaturiraa, te faaohipa nei ratou ma te oaoa i te aˈoraa a Paulo: “Ei parahiraa nounou taoˈa ore to outou, ia mauruuru i ta outou i noaa ra; o te Atua iho hoi tei parau mai e, E ore roa vau e taiva ia oe, e ore roa vau e faarue ia oe, e ore, e ore roa ˈtu.”—Hebera 13:5.

14. No te aha eiaha ˈi te mau Kerisetiano e tapitapi rahi roa i to ratou mau hinaaro materia?

¹⁴ “E ore roa,” “e ore roa ˈtu”—te faaite maitai ra teie mau parau papu maitai e e haapao te Atua ia tatou. Ua haapapu atoa mai Iesu i te tapitapi î i te here o te Atua, ma te parau e: “E mata na . . . outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra [te mau mea materia faufaa roa o te oraraa] ia outou. E teie nei, eiaha e tapitapi i to ananahi ra, na ananahi hoi e tapitapi i ta ˈna iho.” (Mataio 6:33, 34) Ua ite Iehova e mea fifi no tatou ia faaite i te itoito rahi no to ˈna Basileia e i te hoê â taime ia amo i te mau hopoia teimaha no te haapao i to tatou mau hinaaro pae tino. No reira, e tiaturi roa anaˈe i ta ˈna ravea e to ˈna hinaaro e haapao i to tatou mau hinaaro.—Mataio 6:25-32; 11:28-30.

15. E nafea te mau Kerisetiano e tapea ˈi i ‘te mata maitai’?

¹⁵ E faaite tatou i to tatou tiaturi ia Iehova ia tapea tatou i ‘te mata maitai.’ (Mataio 6:22, 23) Mea haavare ore te mata maitai, mea viivii ore te manaˈo turai, e aita e nounou e e haru tiaraa miimii. Te auraa e tapea i te mata maitai, e ere e ora i roto i te veve iti rahi aore ra e ore e amo i ta tatou mau hopoia Kerisetiano. Te auraa râ e faaite i “te feruriraa haapao maitai” a tuu noa ˈi tatou i te taviniraa a Iehova i te parahiraa matamua.—Timoteo 2, 1:7, MN.

16. No te aha e hinaarohia ˈi te faaroo e te itoito no te tapea i te mata maitai?

¹⁶ E titauhia te faaroo e te itoito no te tapea i te mata maitai. Ei hiˈoraa, ia onoono te hoê paoti ohipa i te parau ia oe ia ohipa tamau i te hoê taime i faataahia no te mau putuputuraa Kerisetiano, e tapea anei oe ma te itoito i ta oe mau fa faufaa roa i te pae varua? Ia feaa te hoê taata e e tapea Iehova i ta ˈNa parau fafau e haapao i ta ˈNa mau tavini, e faarahi noa ïa Satani i te faaheporaa e e nehenehe taua taata ra e faaea roa i te haere i te mau putuputuraa. Oia, na roto i to tatou ereraa i te faaroo e vaiiho ai tatou ia Satani ia faatere ia tatou, a haamau atu ai oia eiaha o Iehova i ta tatou mau fa faufaa roa. Auê te tâpû ati e!—Korinetia 2, 13:5.

“E tiai atu ia Iehova” ma te tiaturiraa

17. E nafea te feia e turui ra i nia ia Iehova e haamaitaihia ˈi i teie nei â?

¹⁷ Te faaite tamau ra te mau Papai e eita roa ˈtu te feia e tiai ra ia Iehova ma te tiaturiraa e e turui ra i nia ia ˈna, e ere i te tahi mea. (Maseli 3:5, 6;  Ieremia 17:7) Parau mau e i te tahi taime, e mea tia paha ia mauruuru ratou i te mea iti i te pae materia, te hiˈo ra râ ratou i te reira ei haapaeraa iti ia faaauhia i te mau haamaitairaa e tiai maira ia ratou. Te faaite ra ïa ratou e ‘te tiai ra ratou ia Iehova’ ma te tiaturiraa e ua papu ia ratou e i te pae hopea, e horoa ˈtu oia na ta ˈna mau tavini taiva ore i te mau hinaaro tia atoa o to ratou aau. (Salamo 37:4, 34) No reira ratou e oaoa ˈi i teie nei â. “Ta te feia parau-tia e tiai ra, e oaoa ïa hopea, o tei tiaturihia râ e te paieti ore ra, e mou ïa.”—Maseli 10:28.

18, 19. (a) Eaha te haapapuraa î i te here ta Iehova e horoa maira? (b) E nafea tatou e tapea noa ˈi ia Iehova i to tatou “rima atau” ra?

¹⁸ Ia haere te hoê tamaroa iti ma te tapea i te rima o to ˈna metua tane, e ite oia i te panoonoo ore. Oia atoa no tatou a haere ai tatou e to tatou Metua i te raˈi. “Eiaha e mǎtaˈu,” ta Iehova ïa i parau ia Iseraela, “tei pihai-atoa-iho vau ia oe . . . E tauturu vau ia oe . . . O vau hoi to Atua ra, o Iehova, o tei mau ia oe i to rima atau ra; o tei parau atu ia oe e, Eiaha e mǎtaˈu; o vau hoi to oe tauturu.”—Isaia 41:10, 13.

¹⁹ Auê ïa hohoˈa mahanahana ta te reira e horoa ra—te tapea ra Iehova i to tatou rima! “Ua tuu vau ia Iehova ei muâ ia ˈu,” ta Davida ïa i papai. “Tei tau rima atau oia, e ore au e aueue.” (Salamo 16:8) E nafea tatou e tapea noa ˈi ia Iehova i to tatou “rima atau” ra? Na roto ïa e piti aˈe ravea. A tahi, e vaiiho tatou i ta ˈna Parau ia aratai ia tatou i roto i te mau tuhaa atoa o te oraraa; e a piti, e tiatonu tatou i te utua maitai hanahana ta Iehova i tuu i mua ia tatou. Ua himene te papai salamo Asapha e: “E tia . . . vau ia oe ra; e na to rima atau i mau mai ia ˈu. E riro oe i te aratai ia ˈu i ta oe ra parau, e te hopea aˈe ra e hopoi ai oe ia ˈu i te ao.” (Salamo 73:23, 24) Ma taua haapapuraa ra, e nehenehe mau â tatou e faaruru i te tau no a muri aˈe ma te tiaturi.

‘Te fatata maira to outou ora’

20, 21. Eaha te tiai maira i te feia e tiai ra ia Iehova ma te tiaturiraa?

²⁰ A mairi ai te mahana taitahi, e mea ru atu â ia tapea noa ia Iehova i to tatou rima atau ra. Ua fatata te ao a Satani i te û i te hoê ati aita i tupu aˈenei, o te haamata ma te haamouraa o te haapaoraa hape. (Mataio 24:21) E riro te huitaata faaroo ore i te riaria. Area te mau tavini itoito a Iehova ra, e oaoa ïa i to ratou tiaturiraa i te roaraa o taua tau huanane ra. “Ua tupu anaˈe teie nei mau mea,” ta Iesu ïa i parau, “e nânâ i to outou mata i nia, e faateitei i to outou upoo, te fatata maira hoi to outou ora.”—Luka 21:28.

²¹ No reira, e oaoa anaˈe i to tatou tiaturiraa no ǒ mai i te Atua ra e eiaha tatou e vare aore ra e hema i te mau faaanaanataeraa paari a Satani. I te hoê â taime, e haa puai anaˈe no te faahotu i te faaroo, te here, e te mǎtaˈu i te Atua. Ia na reira tatou, e noaa ia tatou te itoito no te auraro ia Iehova i roto i te mau tupuraa atoa e no te patoi i te Diabolo. (Iakobo 4:7, 8) Oia, “ia etaeta, e na ˈna e faaitoito mai i to outou aau, outou atoa, e te feia e tiaturi ia Iehova ra.”—Salamo 31:24.

[Nota i raro i te api]

Eaha ta oe e pahono?

• Mea nafea to Iesu tiaturiraa i te tautururaa ia ˈna ia faaite i te itoito?

• E nafea te faaroo e taaihia ˈi i te tiaturiraa?

• E nafea te tiaturiraa e te faaroo e horoa ˈi i te hoê Kerisetiano i te itoito no te haamau i te mau fa faufaa roa papu i roto i te oraraa?

• No te aha te feia e “tiai ia Iehova” ma te tiaturiraa e nehenehe ai e hiˈo i te tau no a muri aˈe ma te tiaturi?

[Uiraa haapiiraa]

[Hohoˈa i te api 29]

Mea apî anei aore ra mea paari, e nehenehe anei oe e hiˈo ia oe iho i roto i te Paradaiso?