Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATOPA 2016

A faatupu i to oe faaroo i ta Iehova i fafau

A faatupu i to oe faaroo i ta Iehova i fafau

“Te faaroo nei, o te . . . ite i te mau mea [e vai mau nei] aore e hi‘ohia nei.”HEB. 11:1.

HIMENE: 54, 125

1. Eaha to tatou mana‘o no nia i te faaroo?

E ERE pauroa te taata te faatupu i te faaroo. (Tes. 2, 3:2) E horoa râ Iehova i te faaroo i te feia atoa o te haamori ia ’na. (Roma 12:3; Gal. 5:22) Auê tatou i te oaoa e ua horoa mai Iehova i te faaroo!

2, 3. (a) E nafea tatou e faufaahia ’i i te faaroo? (b) Eaha te mau uiraa ta tatou e hi‘opoa mai i teie nei?

2 Ua horoa mai Iehova i ta ’na Tamaiti here, ia nehenehe te hara a te taata o te faatupu i te faaroo ia Iesu e faaorehia. E nehenehe te taata e riro mai ei hoa no Iehova e e ora e a muri noa ’tu. (Ioa. 6:44, 65; Roma 6:23) Mea maitai mau Iehova i nia ia tatou! Noa ’tu e taata hara tatou e mea tano ia pohe tatou, ua ite Iehova e e nehenehe tatou e rave i te mea maitai. (Sal. 103:10) Ua tauturu mai oia ia haapii i te parau apî oaoa no nia ia Iesu e to ’na tusia. A haamata ’i tatou i te faatupu i te faaroo ia Iesu e i te pee i to ’na hi‘oraa, ua nehenehe atura tatou e tiatonu i te ora mure ore!—A taio i te Ioane 1, 4:9, 10.

3 Eaha râ ta tatou e nehenehe atu â e haapii no nia i te  faaroo? Mai te peu e ua ite tatou no nia i ta te Atua i rave no tatou e ta ’na e rave i mua nei, te auraa ïa e e faaroo to tatou? E hi‘o ana‘e eaha te titauhia ia rave.

IA FAATUPU OE I TE FAAROO I ROTO I TO OE AAU

4. Ia faatupu tatou i te faaroo, e nafea te reira e ohipa ’i i nia ia tatou?

4 Ia faatupu tatou i te faaroo ia Iehova e ia Iesu, eita noa tatou e ite i ta raua i rave e e rave â no tatou. E hinaaro atoa râ tatou e ora ia au i ta raua i haapii mai. Te hinaaro nei tatou e tauturu ia vetahi ê ia haapii o vai raua. Ua parau te aposetolo Paulo: “Ia fa‘i hoi to vaha i te Fatu ra ia Iesu, e ia faaroo to aau e ua faatia te Atua ia ’na i te poheraa ra, e ora ïa oe. O te aau hoi to te taata nei i faaroo, e ia roaa ’tu te parau-tia; o te vaha hoi tei fa‘i i te parau, e ia roaa ’tu te ora.”—Roma 10:9, 10; Kor. 2, 4:13.

5. No te aha mea faufaa te faaroo, e eaha te titauhia ia puai noa te faaroo? A horoa i te hoê hi‘oraa.

5 Mea papu, no te fana‘o i te ora mure ore i roto i te ao apî a te Atua, mea titauhia ia faatupu tatou i te faaroo e ia puai noa te reira. E au te faaroo i te hoê raau tupu. Mea titauhia ia pîpî noa i te pape ia tupu maitai te reira. Ia tarani râ tatou i te pape, e mǎrô e e pohe te raau tupu. Hoê â huru, ia papu ia tatou e te tupu maitai ra e te rahi noa ra to tatou faaroo.—Tito 2:2; Tes. 2, 1:3; Luka 22:32; Heb. 3:12.

TE FAATAA RA TE BIBILIA EAHA TE FAAROO

6. Eaha na piti faataaraa ta te Hebera 11:1 e horoa ra no nia i te faaroo?

6 I roto i te Hebera 11:1, te faataa ra te Bibilia eaha te faaroo. (A taio.) (1) Te faaroo, o “te tiaturi ïa i te mau mea e tiaihia nei.” I roto i te mau mea e “tiaihia nei,” te vai ra te mau parau fafau a te Atua no a muri a‘e. Ei hi‘oraa, ua papu ia tatou e e faaorehia te ino e e itehia te hoê ao apî. (2) Te faaroo, o “te ite” ïa, aore ra te haapapuraa maramarama, o “te mau mea [e vai mau nei] aore e hi‘ohia nei.” Ua ite tatou e mea mau te Atua ra Iehova, Iesu Mesia, te mau melahi e te Faatereraa arii i te ra‘i, noa ’tu aita tatou e ite ra i te reira. (Heb. 11:3) E nafea tatou e faaite ai e e faaroo mau to tatou i te mau parau fafau a te Atua e i te mau mea ta tatou e ore e ite? E na reira tatou na roto i to tatou huru oraraa, ta tatou mau parau e haaraa.

7. E nafea te hi‘oraa o Noa e tauturu mai ai ia taa i te auraa o te faaroo? (A hi‘o i te hoho‘a matamua.)

7 Eaha ta Noa i haapii mai no nia i te faaroo? Ua parau Paulo no Noa, “a faaitehia mai ai oia e te Atua i te mau mea aore â i itea maira, e roohia ihora e te mǎta‘u, i tarai ai i te pahi ia ora to ’na fetii.” (Heb. 11:7) No te mea ua faatupu Noa i te faaroo i ta Iehova i parau ia ’na, ua hamani oia i tera araka rarahi. Peneia‘e ua ani to ’na mau taata tapiri no te aha oia i hamani ai i te araka. Ua papu ia tatou e aita Noa i mamû noa. Te parau ra te Bibilia e e taata poro i te parau-tia o Noa. (Pet. 2, 2:5) Ua faaara oia i te taata e e hopoi mai te Atua i te diluvi no te haamou i te feia ino. Peneia‘e ua parau iho â oia mai ta Iehova i parau ia ’na: “Ua fatata roa te hopea o te taata atoa ra ia ’u; ua î hoi te fenua i te parau-tia ore ia ratou,” e “teie au e hopoi mai i te diluvi  i nia i te fenua nei, ia pohe roa te mau mea ora e huti i te aho i raro a‘e i teie nei ra‘i; te mau mea ora atoa o te fenua nei, e pohe ïa.” Ua faataa paha Noa i te taata eaha ta ratou e rave no te ora mai. Ua faaue Iehova ia haere i roto i te araka.—Gen. 6:13, 17, 18.

8. Eaha ta Iakobo i parau no nia i te faaroo?

8 Ua papai atoa Iakobo no nia i te faaroo. E au ra e ua na reira oia i muri a‘e i to Paulo papairaa i to Hebera. Ua papai Iakobo: “A faaite mai na oe i to oe faaroo, aore e ohipa ra, a faaite atu ai au ia oe i to ’u faaroo i ta ’u nei ohipa.” (Iak. 2:18) Ua faataa Iakobo e no te faatupu i te faaroo, mea tia ia rave hau atu â i te tiaturi-noa-raa. Te tiaturi ra te mau demoni e te vai mau ra te Atua, aita râ ratou e faatupu ra i te faaroo ia Iehova. Te patoi u‘ana ra hoi ratou ia ’na. (Iak. 2:19, 20) Ia faatupu te hoê taata i te faaroo, e rave oia i te mau ohipa maitatai ia mauruuru te Atua ia ’na. Tera ta Aberahama i rave. Ua papai Iakobo: “Aore anei to tatou metua ra o Aberahama i tiahia mai i te ohipa, a hopoi ai oia i ta ’na tamaiti ra ia Isaaka i nia i te fata ra? Te ite ra hoi oe, e na te faaroo i faatupu i ta ’na ohipa, e no te ohipa i tia roa ’i te faaroo.” Haapapu atura Iakobo e mea faufaa ore te faaroo aita ana‘e e ohipa ma te parau: “Mai te tino nei hoi ia ore te varua ra, e mea pohe ïa, oia atoa te faaroo aore e ohipa ra, e mea pohe atoa ïa.”—Iak. 2:21-23, 26.

9, 10. Eaha te auraa ia faatupu i te faaroo i te Tamaiti?

9 Hau atu 30 matahiti i muri a‘e, ua papai Ioane i ta ’na Evanelia e na episetole e toru. Mai vetahi taata papai Bibilia, ua taa ia Ioane eaha te faaroo. Ua faaohipa oia e rave rahi taime i roto i ta ’na mau papai i te ihoparau Heleni hurihia i te tahi taime ei “faatupu i te faaroo”.

E faatupu tatou i te faaroo i te Tamaiti ma te auraro ia Iesu

10 Ei hi‘oraa, ua faataa Ioane: “O tei faaroo i te Tamaiti ra e ora mure ore to ’na; e o tei ore i faaroo i te Tamaiti ra, e ore oia e ite i te ora; te vai ra ïa te riri o te Atua i nia iho ia ’na.” (Ioa. 3:36) No te faatupu i te faaroo i te Tamaiti, mea tia ia auraro tatou ia Iesu. Pinepine hoi Iesu i te parau i roto i ta Ioane mau papai e no te fana‘o i te ora mure ore, mea tia ia faatupu tatou i te faaroo ia ’na e i to ’na Metua.—Ioa. 3:16; 6:29, 40; 11:25, 26; 14:1, 12.

11. E nafea ia faaite i to tatou mauruuru ia Iehova no te parau mau?

11 Ua faaohipa Iehova i to ’na varua mo‘a no te tauturu ia tatou ia taa i te parau no nia ia ’na e ta ’na Tamaiti e no te tauturu atoa mai ia faatupu tatou i te faaroo ia raua. (A taio i te Luka 10:21.) E nafea tatou e nehenehe ai e faaite i to tatou mauruuru ia Iehova no te mau mea atoa ta ’na i rave? Eiaha roa ’tu tatou e faaea i te haamauruuru ia ’na, ua farii hoi oia ia faatupu tatou i te auhoaraa e o ’na na roto ia Iesu, “te tumu e te faaoti i to tatou faaroo.” (Heb. 12:2) Mea faufaa atoa ia tamau tatou i te haapuai i to tatou faaroo ma te pure noa ia Iehova e ma te haapii i ta ’na Parau.—Eph. 6:18; Pet. 1, 2:2.

A faatupu i te faaroo ma te faaite atu ia vetahi ê te mau parau apî oaoa i te mau taime atoa (A hi‘o i te paratarafa 12)

12. Eaha ta tatou e rave mai te peu e e faatupu tatou i te faaroo?

 12 E tia ia faaite tatou na roto i ta tatou mau haaraa e e faaroo puai to tatou i ta Iehova mau parau tohu. Ei hi‘oraa, e tamau tatou i te poro i te taata no nia i te Faatereraa arii a te Atua, e i te tauturu atu ia riro mai ratou ei pǐpǐ na Iesu. E tamau atoa tatou i te “hamani maitai . . . i te taata atoa, ia rahi atu râ i to te fetii faaroo ra.” (Gal. 6:10) E haa rahi tatou no te “haapae . . . i te taata tahito e ta ’na atoa ra mau parau” no te mea eita tatou e hinaaro ia haafifihia to tatou auhoaraa e o Iehova.—Kol. 3:5, 8-10.

E TUHAA TE FAAROO I TE ATUA NO TO TATOU NIU

13. (a) Eaha te faufaaraa o “te faaroo i te Atua”? (b) Mea nafea te Bibilia i te faataaraa i te reira, e no te aha?

13 Te parau ra te Bibilia: “Aore e faaroo ra e ore roa [te Atua] e mauruuru: o te haamori i te Atua ra, e faaroo oia e, e Atua, e tia ’i, e o oia te faautua [aore ra haamaitai] i te feia i imi papu ia ’na.” (Heb. 11:6) Te faaite atoa ra te Bibilia e “te faaroo i te Atua” hoê o na ohipa matamua tei titauhia ia faatupu te mau Kerisetiano mau. E tuhaa te reira o to tatou “tumu” aore ra niu. (Heb. 6:1) Hau atu â i te faaroo, mea titauhia ia faatupu tatou i te tahi atu mau huru maitatai faufaa no te fana‘o i te hoê auhoaraa e o Iehova, a atuatu noa ’tu ai i te reira.—A taio i te Petero 2, 1:5-7; Iuda 20, 21.

14, 15. Ia faaauhia i te here, eaha te faufaaraa o te faaroo?

14 Ua faahiti te feia papai Bibilia i te faaroo hau atu â i te tahi atu huru maitai. Te auraa ïa anei e o te faaroo te huru maitai faufaa roa ’‘e te titauhia ia faatupu tatou?

15 Ua faaau Paulo i te faaroo i te here. Ua papai oia: “E tei ia ’u te mau faaroo tapao atoa e tia ’i ia hopoi ê atu i te mou‘a, e aore o ’u aroha [aore ra here], aita roa a ’u e faufaa.” (Kor. 1, 13:2) Ua parau Iesu e ia here i te Atua “te ture . . . hau i te rahi” o “te ture matamua teie e te hau i te rahi,” o te hereraa ïa i te Atua. (Mat. 22:35-40) E tauturu mai te here ia faatupu i te tahi atu mau huru maitatai e mauruuru ai te Atua. Ei hi‘oraa, te parau ra te Bibilia no te here e “e faaroo i te  mau mea atoa.” E tauturu mai ïa te here ia tiaturi, aore ra ia faatupu i te faaroo, i te mau mea atoa ta te Atua e parau mai ra na roto i te Bibilia.—Kor. 1, 13:4, 7.

16, 17. Eaha ta te Bibilia e parau ra no nia i te faaroo e te here? Eaha te huru maitai tei hau i te tahi atu, no te aha?

16 Mea faufaa roa te faaroo e te here, e pinepine te feia papai Bibilia i te amui na huru maitatai. Ua faaitoito Paulo i to ’na mau taeae ia rave i “te tapo‘i ouma ra o te faaroo e te hinaaro, [aore ra here.]” (Tes. 1, 5:8) Ua papai Petero no nia ia Iesu: “O ta outou e here na, ore noa ai outou i te ite mata iana ra; o ta outou e faaroo na, ore noa ai outou e hio iana i teienei.” (Pet. 1, 1:8, Te Faufaa Api) Ua ani Iakobo i to ’na mau taeae faatavaihia: “E ere anei o te feia tao‘a ore o teie nei ao ta te Atua i maiti ei feia tao‘a i te faaroo ra, e ei feia ai‘a i te basileia ta ’na i parau e horoa mai i te feia e hinaaro [aore ra here] ia ’na ra?” (Iak. 2:5) Ua papai Ioane: “E faaroo tatou i te i‘oa o ta ’na Tamaiti o Iesu Mesia, e e aroha [aore ra here] tatou ia tatou iho.” O te faaueraa a te Atua ïa teie.—Ioa. 1, 3:23.

17 Ua papai atoa râ Paulo: “E teie nei, te vai nei te faaroo, e te tiai, e te aroha, e toru ra; o tei hau râ i taua toru nei, o te aroha ïa.” (Kor. 1, 13:13) I mua nei, eita tatou e faatupu faahou i te faaroo i ta te Atua mau parau fafau no nia i ta ’na ao apî, inaha e tupu mau te reira. E ora tatou i te oraraa faahiahia mau ta te Bibilia e faahiti ra. Ia faatupu noa râ i te here no te Atua e te taata te titauhia ia tatou. Inaha, e rahi roa ’tu â to tatou here no ratou e a muri noa ’tu.

UA HAAMAITAI IEHOVA I TO TATOU FAAROO

18, 19. Eaha tei itehia no te mea ua faatupu te nunaa o te Atua o teie mahana i te faaroo, e o vai te tano ia aruehia?

18 Ua faatupu te nunaa o Iehova no teie tau i te faaroo i te Faatereraa arii a te Atua e ua turu i te reira. Ua here atoa ratou te tahi i te tahi. Ua na reira ratou no te mea ua vaiiho ratou i te varua mo‘a ia aratai i to ratou oraraa. (Gal. 5:22, 23) Eaha tei itehia? Hau atu i te 8 mirioni taeae e tuahine na te ao atoa nei te ite nei i te hau e te auhoêraa i roto i te mau amuiraa. Mea papu, e mau huru maitatai puai mau te faaroo e te here.

19 Maoti noa te tauturu a to tatou Atua i nehenehe ai e faatupu i teie auhoêraa. Mea tano ïa ia arue tatou ia ’na no te ohipa ta ’na i rave. (Isa. 55:13) Auê tatou i te mauruuru e maoti oia i nehenehe ai tatou e “ora . . . i te faaroo.” (Eph. 2:8) E tamau Iehova i te tauturu e rave rahi atu â taata ia faatupu i te faaroo ia ’na. I muri iho, e î te fenua atoa i te taata tia roa, te rave i te parau-tia e te oaoa, o te arue ia Iehova e a muri noa ’tu!