Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATOPA 2016

 AAMU

Tutava i te pee i te mau hi‘oraa maitai

Tutava i te pee i te mau hi‘oraa maitai

Ua ani au ia Izak Marais, “Ua ite oe ehia matahiti to ’u?” Pahono maira oia, “Ua ite maitai au ehia matahiti to oe.” Ua taniuniu mai oia ia ’u i Colorado mai Patterson, New York. E faataa ’tu vau no te aha mâua i tauaparau ai i nia i te reira.

UA FANAUHIA vau i Wichita, Kansas, Marite i te 10 no Titema 1936, o vau te matahiapo o na tamarii e maha. E mau tavini taiva ore ia Iehova to ’u na metua, William raua Jean. E tavini o te amuiraa to ’u papa, e parauhia i teie nei, tiaau o te tino matahiapo. Ua haapii to ’u mama i te parau mau i to ’na mama ra, o Emma Wagner. Ua haapii Emma i te parau mau i e rave rahi taata, mai ia Gertrude Steele, o tei tavini ei mitionare i Porto Rico. * E rave rahi ïa hi‘oraa maitai ta ’u.

UA HAAMANA‘O VAU I TE MAU HI‘ORAA MAITATAI

Te pûpû ra to ’u papa i te mau vea i te hoê aroâ

I te hoê po mahana maa, i te paeraa o to ’u matahiti, ua pûpû mâua to ’u papa Te Pare Tiairaa e te vea Tamahanahanaraa (A ara mai na! i teie mahana) na te taata e haere ra na te aroâ. I tera tau, ua ô atoa to matou fenua i roto i te Piti o te tama‘i rahi. Area to ’u papa, ua tapea oia i to ’na tiaraa amui ore. Ua taero roa te hoê taote, ua tapiri mai ia matou e ua faaooo oia i to ’u papa ei taata mǎta‘u hanoa. Ua pari oia ia ’na i te imiraa i te otoheraa eiaha o ’na e afaihia i te tama‘i. Ua tapiri roa ’tu te taote i to ’na hoho‘a mata i te hoho‘a mata o to ’u papa e ua parau, “No te aha eita ’i oe e tupai mai ia ’u,  taata mǎta‘u hanoa!” Ua riaria vau, ua faahiahia roa râ vau i to ’u papa. Aita oia i faaea i te opere i te mau vea na te mau taata e hi‘o noa ra ia raua. Te haere noa ra te hoê faehau, tuô atura te taote ia ’na: “E hi‘o noa ïa oe teie taata mǎta‘u hanoa?” Ua ite teie faehau e ua taero teie taata, parau atura oia: “A ho‘i i te fare, haere e haapee i to oe taero!” Haere atura raua toopiti. Te mauruuru nei au ia Iehova no te itoito ta ’na i horoa i to ’u papa. E piti fare hahuraa huruhuru taa ta ’na i Wichita. E haere atoa teie taote e hahu i to ’na huruhuru taa i ǒ!

E to ’u na metua, i te hoê tairururaa i Wichita i te mau matahiti 1940

I te va‘uraa o to ’u matahiti, ua hoo to ’u na metua i to raua fare e ua hamani raua i te hoê fare tavere nainai. I muri iho, ua haere matou i Colorado, aita i atea noa ’‘e i te Grand Junction, no te haere e poro i te vahi e hinaarohia ra te feia poro. E pionie to ’u na metua e e ohipa ta raua, eiaha râ ma te taime taatoa, te faaapu e te vahi faaamuraa animara. Maoti te haamaitairaa a Iehova e ta raua ohipa pororaa itoito, ua mau mai ïa te hoê amuiraa. I te 20 no Tiunu 1948, ua bapetizo to ’u papa ia ’u i roto i te hoê anavai iti i nia i te mou‘a, oia atoa te feia o tei farii i te parau mau, mai ia Billie Nichols e ta ’na vahine. Ua haere raua i muri a‘e i roto i te tuhaa haaati e ua na reira atoa ta raua tamaiti e ta ’na vahine.

E rave rahi hoa to matou o tei haa rahi ra i roto i te taviniraa ia Iehova, mai te utuafare Steele: Don raua Earlene, Dave raua Julia e Si raua Martha. Ua oaoa roa matou i te paraparau i nia i te Bibilia e o ratou e ua ohipa mau â to ratou hi‘oraa i roto i to ’u oraraa. Ua faaite ratou ia ’u e e faufaahia te oraraa e e oaoa atoa ia tuuhia te Faatereraa arii i te parahiraa matamua.

HAERE FAAHOU I TE TAHI ATU VAHI

I te 19raa o to ’u matahiti, ua ani mai Bud Hasty, hoê hoa o te utuafare, ia apiti i roto i te taviniraa pionie i te Hau amui no Marite i te pae Apatoa. Ua ani mai te tiaau haaati ia haere i Ruston, i Louisiane. I reira, e rave rahi Ite no Iehova tei faaea i te haere i te mau putuputuraa e i te pororaa. Ua parau mai oia ia faatere pauroa te mau putuputuraa i te mau hebedoma atoa noa ’tu aita e taata e haere mai. Ua faaineine mâua i te hoê vahi ta mâua i ite mai. Ua faatere mâua i te mau putuputuraa atoa. I te omuaraa, o mâua ana‘e i te putuputuraa. E taui noa mâua, e faatere hoê i te hoê tuhaa o te putuputuraa, e na te tahi ïa e pahono i te mau uiraa atoa. Mai te peu e e faahi‘oraa, e haere mâua i nia i te tahua, aita e taata i nia i te parahiraa! I muri iho, ua haamata te hoê tuahine ruhiruhia i te apiti i te mau putuputuraa. Ua haamata atoa te tahi mau piahi Bibilia e te tahi feia aita i haere faahou i te mau putuputuraa e i te pororaa i te na reira. Oioi roa ’tura matou i te riro mai ei amuiraa.

I te hoê mahana, ua farerei mâua Bud i te hoê perepitero o te Ekalesia a te Mesia, ua paraparau oia i nia i te mau irava aita vau i ite. Ua huru ê au e ua feruri hohonu vau i ta ’u i haapiihia mai. Hoê hebedoma, ua haapii au e tae roa ’tu te maororaa po no te imi i te mau pahonoraa i ta ’na mau uiraa. Ua tauturu mau â te reira ia ’u ia haapuai i to ’u auhoaraa e o Iehova e ua hinaaro vau e farerei i te tahi atu â perepitero.

I muri iti noa ’‘e i te reira, ua ani mai te tiaau haaati ia haere i El Dorado i Arkansas, no te tauturu i te hoê amuiraa. A faaea noa ’i au i ǒ, ua titau-pinepine-hia vau ia haere i Colorado i mua i te hoê tomite no te faaoti o vai te faaôhia no te tau faehau. I te hoê taime a tere ai au e te tahi mau pionie, ua û matou i Texas, e ua ino roa to ’u pereoo. Ua taniuniu matou i te hoê taeae, ua haere mai oia e tii ia matou e ua haere matou i to ’na fare e i te putuputuraa. I reira, ua faaarahia te amuiraa no nia i to matou ati purumu, e ua horoa mai te mau taeae i te tahi moni. Ua hoo atoa te taeae i to ’u pereoo no te hoê tino moni fatata 2 500 farane.

 Ua haere matou i Wichita. I ǒ, ua tavini hoê hoa piri no matou ei pionie, o McCartney to ’na i‘oa. E pii noa matou ia ’na Doc. E hoa rahi matou ta ’na na tamaiti maehaa, Frank raua Francis. Ua hoo mai ratou i to ratou pereoo tahito ia ’u fatata 2 500 farane, hoê â tino moni e to ’u pereoo ino. A tahi ra vau a ite papu ai e i to ’u tuuraa i te Faatereraa arii i te parahiraa matamua i roto i to ’u oraraa, ua horoa mai Iehova i te mau mea ta ’u i hinaaro mau. I tera tere, ua haafarerei te utuafare McCartney ia ’u i te hoê tuahine nehenehe, o Bethel Crane to ’na i‘oa. Ua tavini to ’na mama, o Ruth, i Wellington, Kansas, ei pionie e tae roa i te 90raa o to ’na matahiti. Ua faaipoipo mâua Bethel aita i naea hoê matahiti i muri a‘e, i 1958, e ua haamata mâua i te taviniraa pionie i El Dorado.

TITAU-MANIHINI-RAA FAAHIAHIA MAU

Ua hinaaro mâua e pee i te mau hi‘oraa maitatai a paari mai ai, ua faaoti ïa mâua e farii i te mau titau-manihini-raa atoa no ǒ mai i ta Iehova faanahonahoraa. Ua tonohia mâua ei pionie taa ê i Walnut Ridge i Arkansas. I muri a‘e, i 1962, ua oaoa roa mâua i te titau-manihini-raahia mai no te 37raa o te piha haapiiraa no Gileada. Ua oaoa roa mâua e tei roto atoa Don Steele i ta mâua piha haapiiraa. I muri a‘e i te faatuiteraahia matou, ua tonohia mâua Bethel i Nairobi, i Kenya. Ua oto mâua i te faarueraa ia New York. I to mâua râ tapaeraa i te tauraa manureva no Nairobi, a ite ai i to tatou mau taeae o tei haere mai e farerei ia mâua, ua oaoa roa mâua!

Mary raua Chris Kanaiya i roto i te taviniraa i Nairobi

Aita i maoro, ua au roa mâua i Kenya e i te poro i reira. O Chris raua Mary Kanaiya ta mâua mau piahi Bibilia matamua tei farii i te parau mau. Tei roto noa â raua i te taviniraa taime taatoa i Kenya. I te matahiti i muri a‘e, ua anihia mâua ia haere i Kampala, i Uganda. O mâua na mitionare matamua i tera fenua. Mea au roa i tera mau taime no te mea e rave rahi o tei hinaaro e haapii i te mau pue parau mau Bibilia, e ua riro mai ratou ei taeae e tuahine no tatou. Tera râ, i muri a‘e toru matahiti e te afa i Afirika, ua ho‘i mâua i Marite no te  haamau i te hoê utuafare. Ua rahi a‘e to mâua oto i to mâua faarueraa i te fenua Afirika i te mahana a faarue ai mâua ia New York. Ua here roa mâua i te feia i Afirika e ua mana‘o mâua e ho‘i i reira ia tae i te hoê mahana.

TE HOÊ HOPOIA APÎ

Ua haere mâua i te pae tooa o te râ o Colorado, i reira to ’u na metua i te oraraa. Tau taime i muri a‘e, ua fanau mai ta mâua e tamahine, o Kimberly to ’na i‘oa, e 17 ava‘e i muri a‘e, ua fanauhia mai o Stephany. Mea faufaa roa no mâua ta mâua hopoia apî ei metua. Ua haa rahi mâua no te haapii i te parau mau i ta mâua na tamahine nehenehe mau. Ua hinaaro mâua e pee i te mau hi‘oraa maitatai ta vetahi i vaiiho mai. Ua ite mâua e e nehenehe te hi‘oraa maitai e ohipa i nia i te tamarii, aita râ i papu e e tavini ratou ia Iehova a paari mai ai. Teie râ hoi, ua faarue hoê taeae e tuahine to ’u i te parau mau. Mea maitai e e pee faahou raua i te mau hi‘oraa maitai o tei vaiiho-atoa-hia mai ia raua.

Ua oaoa roa mâua i te aupuru i ta mâua na tamahine, a tutava noa ’i i te rave amui i te tahi mau ohipa. I te mea hoi e ua faaea matou piri ia Aspen, i Colorado, ua haapii matou i te faahee i nia i te hiona, ia nehenehe matou e haere e faahee i te tahi taime. E taime ïa teie no mâua no te tauaparau e ta mâua na tamahine a paiuma ’i matou na nia i te mau matini utaraa taata. E haere atoa matou e to matou fare tavere, mea anaanatae te mau aparauraa a parahi noa ’i i mua i te auahi. Noa ’tu mea apî â raua, ua ui raua i te mau uiraa mai teie, “Eaha ta ’u e rave ia paari au?” e “Teihea huru taata ta ’u e faaipoipo?” Ua tutava mâua i te haapii i ta mâua na tamahine ia here ia Iehova. Ua faaitoito noa mâua ia raua ia riro te taviniraa taime taatoa ei fa na raua e ia faaipoipo noa i te hoê taata hoê â fa e ta raua. Ua tutava atoa mâua i te tauturu atu ia taa ia raua e mea au a‘e eiaha e faaipoipo oioi. E pinepine mâua i te parau atu, “A faaea taa noa e tae roa i te taime a naea ’i to orua 23 matahiti.”

Ua pee mâua i te hi‘oraa o to mâua nau metua e ua haa rahi no te apiti i te mau putuputuraa e no te haere tamau i roto i te taviniraa e te utuafare. Ua rave mâua i te faanahoraa ia faaea mai vetahi i roto i te taviniraa taime taatoa i te fare. Pinepine atoa mâua i te tauaparau i te oaoa ta mâua i ite ei mitionare. Ua tiaturi mâua e ia tae i te hoê mahana, e haere matou e maha i te fenua Afirika. Ua hinaaro roa ta mâua na tamahine e haere.

E haapiiraa utuafare tamau noa ta matou. E faaohipa matou i te mau tupuraa o te nehenehe e tupu i te fare haapiiraa e na ta mâua na tamahine e rave i te tuhaa o te Ite no Iehova tei pahono i te mau uiraa. Ua au roa raua e haapii mai te reira, e ua rahi atu â to raua tiaturiraa. A paari mai ai râ, ua amuamu raua i te tahi taime no nia i te haapiiraa utuafare. I te hoê taime, ua toaruaru roa vau, parau atura vau ia raua ia haere i roto i to raua piha e aita te haapiiraa e  ravehia. Ua huru ê roa raua, haamata ’tura raua i te ta‘i e te parau mai e e hinaaro raua e haapii. I muri iho, ua taa ia mâua e ua tauturu mau â mâua ia raua ia haafaufaa i te haapiiraa no nia ia Iehova. A mairi ai te tau, ua au roa raua e haapii e ua ohie atoa no raua ia faaite mai i to raua mau mana‘o e huru aau. I te tahi taime, ua riro ei mea fifi roa ia faaroo ia raua ia parau mai e aita raua e farii i te hoê haapiiraa Bibilia. Tera râ, ua ite maitai mâua i to raua huru. I muri a‘e a haaferuri ai mâua ia raua, e farii raua i te mau ture aveia a Iehova.

FAATANO ATU Â I TE MAU TAUIRAA

Ua hemo oioi te mau matahiti a aupuru ai mâua i ta mâua na tamahine. Maoti te tauturu e te aratairaa a te faanahonahoraa a te Atua, ua rave mâua i ta mâua hopoia e haapii i ta mâua tamarii ia here ia Iehova. Ua mauruuru roa mâua a haamata ’i raua i te tavini ei pionie i te otiraa ta raua haapiiraa tuarua. Ua haapii atoa raua i te ohipa no te aufau i ta raua mau haamâu‘araa. Ua haere raua i Cleveland, i Tennessee e e piti atu â tuahine, no te tavini i te vahi e hinaaro-rahi-hia te feia poro. Ua mihi roa mâua ia raua. Ua oaoa râ mâua i te iteraa e ua faaohipa raua i to raua oraraa i roto i te taviniraa taime taatoa. Ua haamata faahou mâua Bethel i te tavini ei pionie, e maoti te reira i ohipa ai mâua i muri a‘e ei mono i roto i te tuhaa haaati e i te mau tairururaa.

Hou ta mâua na tamahine a haere ai i Tennessee, ua haere raua i Lonedona i Beretane, e mataitai i te amaa. Ua farerei mai ia Stephany, 19 matahiti to ’na i tera taime, hoê taeae apî mero o te Betela, o Paul Norton to ’na i‘oa. I te tahi atu tere, ua farerei o Kimberly, hoê o to ’na hoa ohipa, Brian Llewellyn. I te 23raa o to ’na matahiti, ua faaipoipo Stephany ia Paul. E te matahiti i muri a‘e, i te 25raa o to ’na matahiti, ua faaipoipo Kimberly ia Brian. Ua faaea taa noa ïa raua e tae roa i te faito 23 matahiti. Ua oaoa roa mâua i te hoa faaipoipo ta raua i maiti.

Paul raua Stephany, Kimberly raua Brian i te amaa no Malawi i 2002

Ua parau mai ta mâua na tamahine e ua tauturu te mau hi‘oraa ta mâua e ta to raua papa e mama ruau i vaiiho mai ia ‘mata i te imi i te Faatereraa arii na mua roa,’ noa ’tu te fifi ra raua i te pae moni. (Mat. 6:33) I Eperera 1998, ua titau-manihini-hia o Paul raua Stephany i te 105raa o te piha haapiiraa no Gileada, e ua tonohia raua i Malawi, i Afirika. I te hoê â taime, ua titau-manihini-hia Brian raua Kimberly ia ohipa i te Betela no Lonedona e i muri a‘e, ua tonohia raua i te Betela i Malawi. Ua oaoa roa mâua no te mea ua rave ta mâua na tamahine i te ohipa maitai roa ’‘e i to raua oraraa.

TE TAHI ATU TITAU-MANIHINI-RAA FAAHIAHIA MAU

I Tenuare 2001, mai ta ’u i faahiti i te omuaraa, ua taniuniu mai taeae Marais, tiaau o te mau tuhaa huriraa. Ua faataa mai oia e ua faanaho te mau taeae i te hoê faaineineraa o te tauturu i te feia huri na te ao atoa nei ia taa maitai atu â i te mau papai reo Beretane. Noa ’tu e 64 matahiti to ’u i tera taime, ua hinaaro ratou e faaineine ia ’u ia riro vau ei taeae e horoa i te haapiiraa. Ua pure mâua Bethel no nia i te reira e ua paraparau mâua i to mâua na metua vahine no te ite i to raua mana‘o. Noa ’tu e ua paari raua e aita raua e nehenehe e tauturu mai, ua hinaaro raua ia haere mâua. Ua taniuniu atu vau e ua parau e e oaoa roa mâua i te farii i teie titau-manihini-raa faahiahia mau.

Ite atura to ’u mama e e ma‘i mariri ai taata to ’na. Parau atura vau ia ’na e e faaea mâua e tauturu i to ’u tuahine Linda ia haapao ia ’na. Ua patoi mama e ua parau, “E ino roa ’tu â paha ia vau, mai te peu e aita orua e haere.” Tera atoa to Linda mana‘o. Ua mauruuru roa mâua e ua ineine raua i te rave i tera huru haapaeraa, no te tauturu atoa a te mau taeae e tuahine no tera vahi. Hoê mahana i muri a‘e i to mâua haereraa i te Pu haapiiraa a te mau Ite no Iehova i Patterson, ua taniuniu mai Linda no te faaite e ua pohe mama. Mai ta ’na i faaitoito  ia mâua ia rave, ua haa rahi mâua i roto i teie hopoia apî.

Ua oaoa roa mâua i te faarooraa e ua tonohia mâua na mua roa i te amaa no Malawi, i reira ta mâua na tamahine e ta raua tane i te taviniraa. Mea oaoa ia ite faahou te tahi i te tahi. I muri a‘e, ua haere mâua i Zimbabwe e i Zambie no te horoa i tera faaineineraa. I muri a‘e e toru matahiti e te afa to mâua horoaraa i tera faaineineraa, ua ho‘i mâua i Malawi no te papai i te aamu o te mau Ite no Iehova o tei hamani-ino-hia no to ratou tiaraa amui ore Kerisetiano. *

I roto i te taviniraa e ta mâua na mootua

I 2005, ua oto faahou mâua i te faarue i te fenua Afirika. Ua ho‘i mâua i te fare i Basalt, i Colorado. Te tamau râ mâua Bethel i te tavini ei pionie i reira. I 2006, ua ho‘i mai Brian raua Kimberly e ora i pihaiiho noa i ǒ mâua no te aupuru i ta raua na tamahine e piti, Mackenzie raua Elizabeth. Tei Malawi noa â o Paul raua Stephany, tei roto Paul i te Tomite amaa i te taviniraa. I teie nei, fatata 80 matahiti to ’u, mea oaoa roa na ’u ia ite i te mau tane apî, o tei ohipa e o vau, e amo i te mau hopoia o ta ’u i amo na. No te maitai o ta mâua mau tamarii e ta mâua nau mootua, ua tutava mâua i te pee i te mau hi‘oraa o ta vetahi i vaiiho mai. Ua hopoi mai te reira i te oaoa rahi.

^ par. 5 A hi‘o i Te Pare Tiairaa o te 1 no Me 1956 api 269-272, e o te 15 no Mati 1971 api 186-190 no te haapii atu â no nia i te ohipa mitionare o te mau mero o te utuafare o Steele (Farani).

^ par. 30 Ei hi‘oraa, a hi‘o i te aamu o Trophim Nsomba i roto i Te Pare Tiairaa o te 15 no Eperera 2015, api 27-31.