IA AU i te Mataio 13:24-26, ua parau Iesu: “E au te basileia o te ao i te hoê taata i ueue i te huero maitai i roto i ta ˈna ra aua. Ia taoto râ te taata ra, ua haere maira to ˈna enemi, ua ueue ihora i te zizania i roto i te sitona, e haere ê atura. E tupu aˈera te raau rii, e hotu ihora, itea ihora te zizania.” Te feaa nei te tahi mau taata papai e ua niuhia teie faahohoˈaraa i nia i te hoê tupuraa mau. Ia au râ i te mau papai no Roma i tahito ra, ua nehenehe te tahi ohipa mai tera e tupu.

Te parau ra te hoê titionare Bibilia e i raro aˈe i te ture Roma, e hara rahi ia ueue i te zizania i roto i te faaapu a te hoê taata no te tahoo atu. I te mea hoi e ua titauhia te hoê ture, te auraa ïa e ua tupu mau te reira. Te faataa ra te aivanaa ite i te pae ture, Alastair Kerr, e i roto i te matahiti 533 o to tatou tau, ua pia te emepera Roma Justinien i ta ˈna buka Digeste. E haapotoraa teie o te ture Roma e te vai atoa ra i roto te mau faahitiraa a te tahi mau aivanaa no nia i te ture i te mau matahiti 100-250 o to tatou tau. Ia au i te buka Digeste, ua faahiti o Ulpien, hoê o na aivanaa, te tahi ohipa tei tupu i te piti o te senekele. Ua ueuehia te zizania i roto i te faaapu a te tahi atu taata. Ua ino roa te faaapu. Te faataa ra te Digeste i te tiaraa a te taata faaapu e titau i te aufauraa i te taata rave hara no te maa tei ore i tupu.

Ua tupu iho â teie mau ohipa i raro aˈe i te hau emepera Roma i tahito ra. Te faaite mai ra ïa te reira e ua nehenehe te faahohoˈaraa ta Iesu i faaohipa e tupu.