Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) ATOPA 2016

A atuatu i to ea pae varua a tavini ai oe i roto i te hoê tuhaa fenua reo ê

A atuatu i to ea pae varua a tavini ai oe i roto i te hoê tuhaa fenua reo ê

“Ua haaputu vau i ta oe parau i roto i tau aau.”—SAL. 119:11.

HIMENE: 142, 92

1-3. (a) Eaha ta tatou fa matamua? (b) Eaha te mau fifi ta te feia e haapii ra i te hoê reo apî e farerei nei e eaha te mau uiraa e hiti mai? (A hi‘o i te hoho‘a matamua.)

I TEIE mahana, e rave rahi Ite no Iehova o te tauturu rahi nei ia tupu te parau tohu e poro “i te mau fenua atoa, e te mau opu atoa, e te mau reo atoa, e te mau nunaa atoa.” (Apo. 14:6) Tei rotopu atoa oe i te feia o te haapii ra i te tahi atu reo? Te tavini ra vetahi ei mitionare aore ra te poro ra i te vahi e hinaaro-rahi-hia ra te feia poro, i te tahi atu fenua. Ua haamata atoa vetahi i te apiti i te mau putuputuraa i roto i te hoê amuiraa reo ê i to ratou iho fenua.

2 Mea titauhia ia haafaufaa te mau tavini atoa a te Atua i to ratou ea pae varua e ta to ratou utuafare. (Luka 11:28) I te tahi taime, no te rahi paha o te ohipa, aita ’tura e taime faahou to tatou no te haafaufaa i ta tatou iho haapiiraa. Ua hau atu â râ te fifi o te feia i roto i te amuiraa reo ê.

3 Mea titauhia i te feia e tavini ra i roto i te amuiraa reo ê ia haapii i te hoê reo apî, ia tamau atoa râ i te haapii i te  mau mana‘o hohonu o te Atua. (Kor. 1, 2:10) E nafea tatou e nehenehe ai e na reira mai te peu e aita tatou e taa maitai ra i tei parauhia ra i roto i te amuiraa? No te aha ia haapao te mau metua e tavini nei i roto i te hoê amuiraa reo ê ua putapû anei to te tamarii aau i te parau mau?

TE HOÊ FIFI NO TO TATOU AUHOARAA E O IEHOVA

4. Na te aha e nehenehe e haafifi i to tatou auhoaraa e o Iehova? A faataa.

4 Aita ana‘e tatou e taa i te mau haapiiraa Bibilia na roto i te tahi atu reo, e nehenehe te reira e haafifi i to tatou auhoaraa e o Iehova. A ho‘i mai ai o Nehemia i Ierusalema, ua tapao oia e aita vetahi mau tamarii i taa i te reo Hebera. (A taio i te Nehemia 13:23, 24.) I te mea hoi e aita teie mau tamarii i taa i te Parau a te Atua, ua paruparu to ratou auhoaraa e o Iehova.—Neh. 8:2, 8.

5, 6. Eaha ta te tahi mau metua Kerisetiano o te tavini ra i roto i te amuiraa reo ê i tapao, e eaha te fifi?

5 Ua tapao te tahi mau metua Kerisetiano o te tavini ra i roto i te amuiraa reo ê e ua paruparu te auhoaraa o ta ratou tamarii e o Iehova. No te mea aita ta ratou tamarii e taa maitai ra i tei parauhia ra i te mau putuputuraa, aita te mau haapiiraa e turai ra ia ratou ia ohipa. Te parau ra Pedro o tei haere e to ’na utuafare i Auteralia mai Marite Apatoa ’tu: “A tauaparau ai no nia i te mau ohipa pae varua, e tia ia putapû te aau, a ô atoa mai ai te mau huru aau.” [1]Luka 24:32.

6 Ia taio tatou na roto i te hoê reo ê, eita paha tatou e putapû roa. Ia taio râ tatou na roto i to tatou iho reo, oia ïa. No te mea atoa mea fifi ia paraparau na roto i te tahi atu reo, e nehenehe tatou e rohirohi roa a fifihia ’tu ai ta tatou haamoriraa ia Iehova. No reira, a tapea noa ’i i te hinaaro puai e tavini i roto i te amuiraa reo ê, e titauhia ia paruru tatou i to tatou auhoaraa e o Iehova.—Mat. 4:4.

UA PARURU I TO RATOU AUHOARAA E O IEHOVA

7. Mea nafea to Babulonia i tamata ’i i te faahepo ia Daniela ia farii i ta ratou peu tumu e haapaoraa?

7 A afaihia ’i Daniela e to ’na mau hoa i Babulonia, ua tamata to Babulonia e faahepo ia ratou ia farii i ta ratou peu tumu e haapaoraa. Mea nafea? Ua haapiihia ratou “te parau . . . Kaladaio” e ua horoahia te i‘oa no Babulonia. (Dan. 1:3-7) Ua taaihia to Daniela i‘oa apî ia Bela, te atua matamua o Babulonia. Aita ïa e ore e ua hinaaro te arii Nebukanesa ia tiaturi Daniela e mea puai a‘e te atua o Babulonia i to Daniela Atua ra o Iehova.—Dan. 4:8.

No te mea ua haapii oia i te mau buka mo‘a, tei papaihia na roto i te reo Hebera, ua tapea oia i to ’na auhoaraa e o Iehova

8. Mea nafea Daniela i te tapearaa i te auhoaraa puai e o Iehova?

8 I Babulonia, ua pûpûhia te maa au mau a te arii, na Daniela. Ua “mana‘o . . . râ te aau o Daniela” e auraro i te ture a te Atua. (Dan. 1:8) No te mea ua tamau oia i te haapii i te mau buka mo‘a, tei papaihia na roto i te reo Hebera, ua tapea oia i to ’na auhoaraa e o Iehova a ora noa ’i i te hoê fenua ěê. (Dan. 9:2) Inaha, ua hau atu 70 matahiti i to Daniela afairaahia i Babulonia,  ua matau noa iho â oia i te piihia Daniela, to ’na i‘oa Hebera.—Dan. 5:13.

9. Eaha te huru feruriraa ta te taata papai o te Salamo 119 i faaite no nia i te Parau a te Atua?

9 Ua faaruru te taata papai o te Salamo 119 i te faainoraa a te mau mero o te aorai. Ua ite mai râ oia i te puai i roto i te Parau a te Atua e ua tauturu te reira ia ’na ia ore e riro mai mai ia vetahi ê. (Sal. 119:23, 61) Ua vaiiho oia i te Parau a te Atua ia ohipa i nia i to ’na mau huru aau hohonu.—A taio i te Salamo 119:11, 46.

IA PUAI NOA TO OUTOU AUHOARAA E O IEHOVA

10, 11. (a) Ia haapii tatou i te Parau a te Atua, eaha ta tatou fa? (b) E nafea e naea ’i ta tatou fa? A faataa.

10 Noa ’tu mea rahi te ohipa i roto i te amuiraa e i te raveraa ohipa, e titauhia ia faataa tatou pauroa i te taime no ta tatou iho haapiiraa e haamoriraa utuafare. (Eph. 5:15, 16) Ta tatou fa, e ere noa i te taioraa e rave rahi api aore ra i te faaineineraa i te hoê pahonoraa no te putuputuraa. O te vaiihoraa râ i te Parau a te Atua ia ohipa i nia ia tatou e e haapuai i to tatou faaroo.

11 Ia naea ta tatou fa, mea titauhia ia aifaito tatou. Ia haapii tatou, mea tia ia feruri eiaha noa i nia i to vetahi ê mau hinaaro, oia atoa râ i ta tatou iho e hinaaro mau ra. (Phil. 1:9, 10) Mea tia ia taa ia tatou e ia faaineine tatou no te taviniraa, no te mau putuputuraa aore ra no te hoê oreroraa parau, aita e titauhia ia tatou ia faaohipa i ta tatou iho e taio ra. Ei hi‘oraa, noa ’tu e tamata te hoê taata tunu maa i ta ’na i faaineine hou a afaihia ’i te maa, eita oia e ora noa i tera maa ta ’na i tamata. Ia maitai noa to ’na ea, mea titauhia ia faaineine tamau oia i te mau maa maitai na ’na iho. Hoê â huru, ia hinaaro tatou e haapuai i to tatou auhoaraa e o Iehova, e titauhia ia haapii tamau tatou i te Bibilia. E horoa mai teie haapiiraa i ta tatou e hinaaro mau ra.

12, 13. No te aha e rave rahi o te mana‘o ra e mea faufaa ia haapii i te Bibilia na roto i to ratou reo?

12 No e rave rahi o te tavini ra i roto i te hoê amuiraa reo ê, mea faufaa ia haapii tamau i te Bibilia na roto i ‘to ratou iho reo mau.’ (Ohi. 2:8) Ua ite te mau mitionare e ia puai noa ratou i roto i te fenua i tonohia ’i ratou, eita ta ratou e faaroo ra i te mau putuputuraa e navai.

13 Ua fa‘i Alain, o tei haapii i te reo Peresia fatata va‘u matahiti i teie nei: “Ia faaineine au no te mau putuputuraa na roto i te reo Peresia, e haapao noa vau i te reo. No te mea o to ’u feruriraa ta ’u e faaohipa na mua roa, aita to ’u aau e putapû i te mau mana‘o pae varua ta ’u e taio ra. No reira vau e faataa noa ’i i te  taime no te haapii i te Bibilia e te tahi atu mau papai na roto i to ’u iho reo.”

IA PUTAPÛ TE AAU O TA OE TAMARII

14. Ia papu i te mau metua Kerisetiano i te aha e no te aha?

14 Mea titauhia ia papu i te mau metua Kerisetiano e ua putapû te feruriraa e te aau o ta ratou tamarii. A hi‘o na te hi‘oraa o Serge e ta ’na vahine, Muriel, o tei tavini i roto i te amuiraa reo ê ua hau atu toru matahiti. Ua tapao raua e aita ta raua tamaiti, 17 matahiti to ’na, e oaoa ra i roto i te taviniraa aore ra i te mau putuputuraa. Te parau ra o Muriel: “Ua fiu roa o ’na i te haere e poro na roto i te tahi atu reo. Mea au roa hoi na ’na, na mua a‘e, e poro na roto i to ’na reo tumu, te reo Farani.” Te faataa ra o Serge: “I to mâua taaraa e ua haafifi teie tupuraa i ta mâua tamaiti ia haere i mua i te pae varua, ua faaoti mâua e ho‘i faahou i ta matou amuiraa na mua ’tu.”

A haapao ia putapû te aau o ta outou tamarii i te parau mau (A hi‘o i te paratarafa 14, 15)

15. (a) Eaha te tauturu i te mau metua ia faaoti e e nehenehe ratou e taui i te amuiraa? (b) Eaha te aratairaa ta te Deuteronomi 6:5-7 e horoa ra i te mau metua?

15 Eaha te tauturu i te mau metua ia faaoti e ho‘i i roto i te amuiraa o te faaohipa ra i te reo ta te tamarii e taa a‘e? A tahi, mea tia ia hi‘o e e taime e e puai anei to ratou no te haapii i ta ratou tamarii ia here ia Iehova e oia atoa no te haapii atu i te hoê reo ê i te hoê â taime. Te piti, e tapao paha ratou e aita ta ratou  tamarii e hinaaro e poro, e haere i te mau putuputuraa aore ra e tavini i roto i te mau tuhaa fenua reo ěê. No tera mau tumu, e faaoti paha te mau metua e ho‘i i roto i te amuiraa e faaohipa ra i te reo ta te tamarii e taa a‘e. I muri iho, ua puai maitai ana‘e to te tamarii auhoaraa e o Iehova, e faaoti ai te mau metua e ho‘i i roto i te amuiraa reo ê.—A taio i te Deuteronomi 6:5-7.

16, 17. Eaha tei tauturu i te mau metua ia haapii i ta ratou tamarii no nia ia Iehova?

16 Ua itehia mai i te mau metua te mau ravea no te haapii i ta ratou tamarii no nia ia Iehova na roto i to ratou iho reo a apiti ai i te mau putuputuraa aore ra pǔpǔ reo ê. E toru tamahine ta Charles, i roto i te area iva e 13 matahiti. E apiti ratou i te tahi pǔpǔ reo Lingala. Te parau ra oia: “Ua faaoti mâua e e faatere i te mau haapiiraa e haamoriraa utuafare na roto i to matou iho reo. E faaô atoa râ mâua i te mau faahi‘oraa e hauti na roto i te reo Lingala ia nehenehe ratou e haapii i tera reo ma te arearea.”

A tutava i te haapii i te reo o tera fenua e i te apiti i te mau putuputuraa (A hi‘o i te paratarafa 16, 17)

17 E metua tane o Kevin e e piti tamahine ta ’na, e pae e e va‘u matahiti. E haa rahi oia no te haapii ia raua i te parau mau, no te mea aita na tamahine e taa maitai ra i te mau putuputuraa na roto i te reo ê. Te parau ra oia: “E haapiiraa Bibilia ta mâua ta ’u vahine e ta mâua na tamahine na roto i te reo Farani, to  raua reo tumu. Ta mâua fa, e apiti i te hoê putuputuraa na roto i te reo Farani hoê taime i te ava‘e e i te mau taime faafaaearaa haapiiraa e haere matou i te mau tairururaa na roto i to matou iho reo tumu.”

18. (a) E nafea te Roma 15:1, 2 e tauturu ai ia oe ia rave i te hoê faaotiraa î i te paari ia tauturu oe i ta oe tamarii? (b) Eaha te mau mana‘o tauturu ta te tahi atu mau metua i horoa? (A hi‘o i te nota.)

18 Mea titauhia ia faaoti te mau utuafare taitahi eaha te mea maitai roa ’‘e no ta ratou tamarii e no to ratou auhoaraa e o Iehova. [2](Gal. 6:5) Te parau ra o Muriel e ua hinaaro raua ta ’na tane e tavini noa i roto i te amuiraa reo ê. Noa ’tu râ, ua faaoti raua e haere no te tauturu i ta raua tamaiti ia haapuai i to ’na here ia Iehova. (A taio i te Roma 15:1, 2.) I teie mahana, ua ite Serge e ua rave raua i te faaotiraa maitai. Te parau ra oia: “I te taime a ho‘i mai ai matou i roto i te amuiraa reo Farani, ua haere ta mâua tamaiti i mua i te pae varua e ua bapetizohia oia. Te tavini ra oia ei pionie tamau. E ua opua oia e ho‘i faahou i roto i te pǔpǔ reo ê!”

A VAIIHO I TE PARAU A TE ATUA E HAAPUTAPÛ I TO OUTOU AAU

19, 20. E nafea tatou e faaite e te haafaufaa ra tatou i te Parau a te Atua?

19 Mea here na Iehova i te mau taata atoa. Ua haapapai oia i te Bibilia ia fana‘o te “taata atoa” i te ite papu i te parau mau na roto hanere reo. (Tim. 1, 2:4) Ua ite oia e e puai to tatou auhoaraa e o ’na ia taio tatou i te Bibilia na roto i te reo ta tatou e taa a‘e.

20 Mea titauhia ia haa rahi tatou ia puai noa to tatou auhoaraa e o Iehova. E na reira tatou ma te haapii tamau i te Bibilia na roto i te reo ta tatou e taa a‘e. E tauturu atoa tatou i to tatou utuafare ia atuatu i to ratou ea pae varua, e e faaite e te haafaufaa ra tatou i te Parau a te Atua.—Sal. 119:11.

^ [1] (paratarafa 5) Ua tauihia te i‘oa.

^ [2] (paratarafa 18) No te ite mai i te mau faaueraa Bibilia o te tauturu i to outou utuafare, a hi‘o i te tumu parau “Aupururaa i te tamarii i te fenua ê—Te mau fifi e te mau haamaitairaa” i roto i Te Pare Tiairaa o te 15 no Atopa 2002.