Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Eperera 2017

Ia haamaitai to tatou huru feruriraa horoa noa ia Iehova

Ia haamaitai to tatou huru feruriraa horoa noa ia Iehova

“Haamaitai ia Iehova, . . . i te mea ua horoa noa [te mau taata] ia ratou ihora.”—TAV. 5:2.

HIMENE: 150, 10

1, 2. (a) Eaha ta Eliphaza raua Biladada i parau no ta te Atua e mana‘o ra no nia i ta tatou taviniraa? (b) Eaha ta Iehova i parau?

HAU atu i te 3 000 matahiti i teie nei, ua haere e toru tane e paraparau ia Ioba, te hoê tavini taiva ore a te Atua. Ua tuu o Eliphaza ati Temani, hoê o na tane, i te tahi mau uiraa faufaa mau ia Ioba: “E faufaa anei ta te taata ia hopoi i te Atua ra, mai te taata nei e faufaahia ta ’na i te haapao maitai? Te mauruuru ra anei te Puaihope i ta oe ra parau-tia? e faufaa anei ta ’na o oe i faatitiaifaro i to oe e‘a?” (Ioba 22:1-3) Ua tiaturi papu o Eliphaza e, te pahonoraa i teie mau uiraa, e “Aita” ïa. Ua parau o Biladada ati Sua, hoê atoa o na tane, e eita te taata e nehenehe e riro ei feia parau-tia i mua i te aro o te Atua.—A taio i te Ioba 25:4.

No ǒ mai ia Iehova ra to tatou mau huru maitatai aore ra aravihi atoa e te ite ra oia e nafea tatou e faaohipa ’i i te reira

2 Ua turai Eliphaza raua Biladada ia Ioba ia mana‘o e mea faufaa ore ta ’na mau tutavaraa no te tavini ia Iehova. Ua hinaaro nau tane ia tiaturi Ioba e, no te Atua, e ere tatou i te mea faufaa a‘e i te manumanu, aore ra i te to‘e. (Ioba 4:19; 25:6) Ua parau anei raua i te reira no te mea e feia haehaa raua? (Ioba 22:29) Parau mau, e Atua hau ê Iehova e e taata  iti haihai roa tatou ia faaauhia ’tu ia ’na. Tei nia ana‘e tatou i te hoê mou‘a, aore ra tei roto i te manureva a hi‘o atu ai i raro mai, e taa roa ia tatou i to tatou faito nainai roa e to tatou faufaa ore. Tera anei râ to Iehova mana‘o no nia i ta tatou mau tutavaraa no te tavini ia ’na e no te haa rahi no te Faatereraa arii? E ere! Ua na ô Iehova ia Eliphaza, Biladada e ia Zophara, te tahi atu o na tane, e e haavare ta ratou mau parau. Faaite atura te Atua e ua mauruuru oia ia Ioba e ua pii ia ’na “tau tavini.” (Ioba 42:7, 8) Ia papu maitai ïa ia tatou e mea faufaa te mau taata tia ore no te Atua.

EAHA TA OE E HOROA NA IEHOVA?

3. Eaha ta Elihu i parau no nia i ta tatou mau tutavaraa no te tavini ia Iehova? Eaha ta ’na i hinaaro e parau?

3 Te faarooroo noa ra o Elihu, hoê tane apî, i te aparauraa rotopu ia Ioba e na toru tane. I te otiraa ta ratou aparauraa, ua ui Elihu ia Ioba no nia ia Iehova: “E ia rave oe i te mea tia, e aha ta oe e horoa iana; e aha tana e farii mai no roto mai i to rima?” (Ioba 35:7, Te Bibilia Mo’a V.C.J.S., 1976.) Ua tamata atoa anei Elihu i te parau e mea faufaa ore ta tatou mau tutavaraa no te tavini i te Atua? Aita. Aita Iehova i a‘o ia Elihu, mai ta ’na i rave i te tahi atu mau tane. Mea taa ê to Elihu mana‘o. Te parau ra oia e aita ta Iehova e apî ia haamori tatou ia ’na. Eita te Atua e hinaaro i te tahi noa ’‘e mea. Eita e mea ta tatou e nehenehe e rave e hau atu â ’i ta ’na faufaa aore ra to ’na puai. Inaha, te mau huru maitatai aore ra aravihi atoa e vai nei ia tatou nei, no ǒ mai ïa i te Atua, e te ite ra oia e nafea tatou e faaohipa ’i i te reira.

4. Eaha te huru o Iehova ia hamani maitai tatou ia vetahi ê?

4 Ia faatupu tatou i te here taiva ore no te feia e haamori ra ia Iehova, mai te huru ra e, no ’Na, ua na reira tatou ia ’na. Te taio ra tatou i te Maseli 19:17: “O tei hamani maitai i te taata rii ra, ua horoa oia i te tao‘a na Iehova; e na ’na e hopoi mai i ta ’na utua [aore ra haamaitairaa].” Te ite ra Iehova i te mau taime atoa e aroha hamani maitai ai tatou ia vetahi ê. E noa ’tu o ’na te Atua poiete o te ao taatoa, te faariro nei Iehova i teie mau ohipa ei tarahu na ’na, o ta ’na e faaho‘i ma te pûpû e rave rahi ô faahiahia mau. Te haapapu ra Iesu, ta te Atua Tamaiti, i te reira.—A taio i te Luka 14:13, 14.

5. Eaha nau uiraa ta tatou e hi‘opoa i teie nei?

5 I tahito ra, ua titau manihini Iehova i te peropheta Isaia ia riro ei auvaha no ’na e ia tavini ia ’na ma te hoê taviniraa taa ê. (Isa. 6:8-10) Ua farii Isaia i te titau-manihini-raa ma te aau tae e ua parau: “Teie au; o vau ta oe e tono.” I teie atoa mahana, te farii nei Iehova i te feia taiva ore ia apiti mai i roto i ta ’na ohipa. Te faaite nei e tausani tavini a Iehova i te hoê â huru feruriraa e o Isaia. Ua ineine ratou i te farii i te hopoia no te tavini ia Iehova i e  rave rahi vahi e i roto e rave rahi tuhaa taa ê. Ua ineine atoa i te faaruru i te mau tupuraa fifi. E nehenehe râ te tahi taata e feruri: ‘Mea au na ’u e horoa i te rima tauturu i roto i ta Iehova taviniraa. Mea faufaa mau râ anei ta ’u e rave ra? E ia ore au e apiti atu, eita anei Iehova e haapao ia ravehia iho â ta ’na ohipa?’ Ua feruri a‘ena oe mai tera? E hi‘opoa ana‘e mea nafea te tahi mau tupuraa i roto i te oraraa o Debora raua Baraka, piti tavini a Iehova i tahito ra, e nehenehe ai e tauturu mai ia pahono i teie nau uiraa.

E TAUI TE ATUA I TE MǍTA‘U EI ITOITO

6. No te aha e au ra mea ohie a‘e no te nuu a Iabina ia upootia i nia i te mau Iseraela?

6 E aito Iseraela o Baraka, area o Debora, e peropheta vahine ïa. E 20 matahiti to Iabina arii Kanaana hamani-ino-noa-raa i te mau Iseraela. No te ino o te nuu a Iabina, ua mǎta‘u roa te mau Iseraela o te mau oire iti i te haere i rapae i to ratou fare. E 900 pereoo tama‘i e tipi auri to nia iho ta te nuu a Iabina, area ta Iseraela, aita e mauhaa tama‘i ta ratou e tano no te aro, aita e haana tama‘i no te paruru ia ratou iho.—Tav. 4:1-3, 13; 5:6-8. *

7, 8. (a) Eaha te mau faaueraa matamua a Iehova ia Baraka? (b) Mea nafea Iseraela i upootia mai ai i nia i te nuu a Iabina? (A hi‘o i te hoho‘a matamua.)

7 Ia faaauhia i te nuu a Iabina, e au ra e mea paruparu Iseraela e mea ohie ia upootia i nia ia ratou. Ua faaue râ Iehova ia Baraka na roto ia Debora, te peropheta vahine: “E haere oe i te mou‘a ra o Tabora, e e aratai atoa oe i na taata hoê ahuru i te tausani no te mau tamarii a Naphatali, e no te mau tamarii a Zebuluna? E na ’u e aratai mai i te raatira o te nuu a Iabina ra ia Sisera ia oe nei i te pape ra o Kisona, ma te mau pereoo atoa e te taata atoa no ’na; e na ’u oia e tuu atu i to oe na rima.”—Tav. 4:4-7.

8 Ua anihia te tauturu, e 10 000 tane tei haere i te mou‘a Tabora. Aro atura Baraka e to ’na mau taata i te nuu enemi i te vahi piihia Taanaka. (A taio i te Tavana 4:14-16.) Ua tauturu anei Iehova i te mau Iseraela? E. Ua topa taue mai te ûa i nia i te tahua aroraa mǎrô e varihia ihora tera vahi. Mea ohie ïa no te mau Iseraela no te aro atu. Ua auau Baraka i te nuu a Sisera i nia 24 kilometera e tae roa ’tu i te hoê vahi piihia Haroseta. A tere noa ’i oia, mure ihora te pereoo tama‘i a Sisera i roto i te vari. Pau ihora oia i raro e horo atura i Zanaima, i pihaiiho paha ia Kedesa. I reira, ua tapuni Sisera i roto i te tiahapa o te hoê vahine o Iaela te i‘oa. Ua rohirohi roa Sisera e varea oioi atura oia i te taoto. A taoto noa ’i oia, ma te itoito, ua haapohe Iaela ia ’na. (Tav. 4:17-21) Ua horoa Iehova te upootiaraa ia Iseraela i nia i to ratou mau enemi! *

PITI HURU FERURIRAA TAA Ê ROA NO NIA I TE TAVINIRAA MA TE HOROARAA IA TATOU IHO

9. Eaha ta tatou e haapii mai i roto i Te mau tavana 5:20, 21 no nia i te tama‘i i nia ia Sisera?

9 E haapii atu â tatou no nia i te mau tupuraa tei faataahia i roto i Te mau tavana pene 4 ma te taio i te pene i muri mai. Te parau mai ra Te mau tavana 5:20, 21: “I na te ra‘i mai te mau fetia i te aro, ua aro ïa  ia Sisera i to ratou haerea. Na te pape ra na Kisona ratou i rave e pau atura.” Te auraa ïa e ua tauturu te mau melahi i te mau Iseraela i roto i tera aroraa aore ra ua topa mai te ofai no te ra‘i mai? Aita te Bibilia e faataa ra. Tera râ, e au ra e mea tano ia mana‘o e ua faaora Iehova i to ’na nunaa ma te faatopa i te ûa rahi i te vahi e i te taime tano, aita ’tura ïa na 900 pereoo tama‘i i nehenehe faahou e tere ma te ohie. I roto i Te mau tavana 4:14, 15, ua taio mai tatou e toru taime e maoti Iehova i upootia ’i Iseraela. Aita i tia i na 10 000 Iseraela o tei horoa i te rima tauturu ia parau e maoti ratou i upootia ’i ratou.

10, 11. Eaha Meroza? No te aha i faainohia ’i ratou?

10 E hi‘opoa ana‘e i teie nei i te tahi ohipa anaanatae mau. I muri a‘e a upootia ’i Iseraela, ua himene Debora raua Baraka i te arueraa ia Iehova. Ua himene raua: “E katara [aore ra faaino] outou ia Meroza, te parau maira te melahi a Iehova, e katara hua outou i to reira, no te mea aore ratou i haere mai e tauturu ia Iehova, e tauturu ia Iehova, i taua feia puai ra.”—Tav. 5:23.

11 Eaha mau na Meroza? Aita e haapapuraa mau. Ua manuïa râ te faainoraa i nia ia Meroza e aita ’tura e mea i toe mai o te nehenehe e faaite mai eaha mau na Meroza. O te hoê oire paha o Meroza aita te taata no reira i hinaaro e apiti atu ia Baraka i te tama‘i. Inaha, e 10 000 rima tauturu tei haere e aro i te ati Kanaana, ua faaroo paha ïa to Meroza te aniraahia te rima tauturu. Aore ra e oire paha Meroza na reira o Sisera i te hororaa ia ore oia e roaa ia Baraka. Peneia‘e ua nehenehe te feia no Meroza e haru ia Sisera, aita râ ratou i na reira. A feruri na ia ratou e hi‘o ra i teie aito ino mau e horo ra na te mau aroâ no te imi i te ora! I nehenehe na ratou e rave i te tahi ohipa faufaa no te turu i te opuaraa a Iehova. Ahani ratou i na reira, ua haamaitai ïa Iehova ia ratou. A nehenehe ai râ ratou e rave i te tahi mea no Iehova, aita ratou i na reira noa ’‘e. E au ra e mea taa ê roa te feia no Meroza ia Iaela, o tei haa ma te itoito.—Tav. 5:24-27.

E titauhia ia hi‘opoa tatou i to tatou huru feruriraa no nia i te taviniraa i te Atua

12. Eaha na huru feruriraa e piti e itehia ra i roto i Te mau tavana 5:9, 10? Eaha te haapiiraa e huti mai no tatou?

12 I roto i Te mau tavana 5:9, 10, (New World Translation), te ite ra tatou e mea taa ê roa te huru feruriraa o na 10 000 rima tauturu i te feia o tei ore i horoa i te rima tauturu. Ua haapopou Debora raua Baraka “i te mau raatira o Iseraela, o tei pûpû ia ratou iho i rotopu i te nunaa.” Mea taa ê roa ratou i te feia “i nia i te mau asini anaana ra” o tei mana‘o e mea faahiahia roa ratou no te rave i te taviniraa ma te horoaraa ia ratou iho. Te parauhia ra no tera mau taata e mai te feia “o te parahi i nia i te mau vauvau unauna” e “o te haere ra na te e‘atia” ratou, e oraraa fana‘o to ratou. Area, te feia tei horoa i te rima tauturu, ua haere ratou e o Baraka e aro na te mau aivi ofaifai no Tabora e te peho varivari no Kisona. Ua parauhia i teie feia o tei hinaaro i te hoê oraraa fana‘o: “A feruri!”  Ua titauhia ia hi‘opoa maitai ratou e ia feruri i te mau taime ta ratou i ere ma te oreraa e horoa i te rima tauturu no ta Iehova ohipa. I teie mahana, e titau-atoa-hia ia hi‘opoa tatou i to tatou iho huru feruriraa no nia i te taviniraa i te Atua.

13. Mea nafea te huru feruriraa o te mau ati Reubena, Dana e Asera i taa ê ai i to Zebulona e Naphatali?

13 Ua nehenehe na 10 000 rima tauturu e ite roa ’tu mea nafea Iehova i te ohiparaa ei Arii hau ê. Ua nehenehe ratou e faatia ia vetahi ê i te reira, a faaite ai ratou i te mau ohipa “parau-tia a Iehova.” (Tav. 5:11) Area te mau ati Reubena, Dana e Asera, ua haapeapea rahi a‘e ratou no ta ratou iho mau faufaa mai ta ratou mau nǎnǎ, mau pahi e uahu, i ta ratou i rave no ta Iehova ohipa. (Tav. 5:15-17) E ere râ te mau ati atoa mai ia ratou. “Ua faaruru” te mau ati Zebulona e Naphatali “i te pohe” no te turu ia Debora raua Baraka. (Tav. 5:18) E nehenehe tatou e huti mai i te haapiiraa faufaa i teie na huru feruriraa no nia i te taviniraa ma te horoaraa ia tatou iho.

“HAAMAITAI IA IEHOVA”

14. E nafea tatou e faaite ai e te turu ra tatou i to Iehova mana arii hau ê i teie mahana?

14 I teie mahana, eita tatou e turu i ta Iehova faatereraa ma te aro. Te faaite nei râ tatou i to tatou turu ma te poro ma te itoito rahi. Hau atu â i na mua ’‘e, e hinaarohia te mau rima tauturu no ta Iehova ohipa. E mirioni taeae, tuahine e feia apî o te horoa ra ia ratou iho i roto e rave rau huru taviniraa taime taatoa. Ei hi‘oraa, e rave rahi te tavini ra ei pionie, te ohipa ra i te Betela, te patu ra i te mau Piha a te Basileia e te horoa ra i te rima tauturu i te mau tairururaa. Te haa rahi ra te tahi mau matahiapo i roto i te mau tomite tuatiraa e te fare ma‘i e no te faanahoraa i te mau tairururaa. Ia papu ia tatou e te mauruuru ra Iehova i to tatou  hinaaro e tavini ia ’na i roto i te mau tuhaa atoa e titauhia. Ia papu atoa ia tatou e eita oia e haamoe i ta tatou mau tutavaraa.—Heb. 6:10.

Hou oe a rave ai i te hoê faaotiraa, e feruri e nafea te reira e ohipa ’i i nia i to oe utuafare e ta oe amuiraa (A hi‘o i te paratarafa 15)

15. E nafea tatou e papu ai e aita tatou e ere ra i to tatou oaoa i roto i ta Iehova ohipa?

15 E titauhia ia hi‘opoa tatou i to tatou huru feruriraa no nia i te taviniraa ma te horoaraa ia tatou iho. E nehenehe tatou e uiui: ‘Te vaiiho ra anei au ia vetahi ê ia rave i te rahiraa o te ohipa? Mea haapeapea a‘e na ’u te noaaraa i te mau tao‘a materia i te taviniraa ia Iehova? Aore ra te pee ra vau i te faaroo e te itoito o Baraka, Debora, Iaela e na 10 000 rima tauturu ma te faaohipa i te mau mea atoa ta ’u e fana‘o ra no te tavini ia Iehova? Te feruri ra anei au e haere i te tahi atu oire aore ra fenua ia noaa mai hau atu â moni e ia maitai atu â to ’u oraraa? Mai te peu e e, te pure ra anei au ia Iehova no te ite e nafea teie faaotiraa e ohipa ’i i nia i to ’u utuafare e ta ’u amuiraa?’ *

16. Noa ’tu eita Iehova e hinaaro i te tahi noa ’‘e mea, eaha ta tatou e nehenehe e pûpû na ’na?

16 Te horoa mai ra Iehova i te fana‘oraa taa ê e turu i ta ’na faatereraa. Mai te tau o Adamu raua Eva mai â, ua hinaaro te Diabolo ia patoi te taata ia Iehova. Ia turu râ tatou i ta Iehova faatereraa, e faaite papu tatou ia Satani no teihea pae tatou. E turai mai to tatou faaroo e taiva ore ia horoa ia tatou iho no ta Iehova taviniraa, e e faaoaoa roa te reira ia ’na. (Mas. 23:15, 16) E nehenehe to tatou Atua e faaohipa i to tatou turu taiva ore e auraro no te pahono i ta Satani mau pariraa. (Mas. 27:11) E nehenehe tatou e pûpû i to tatou auraro ia Iehova, mea faufaa roa te reira no ’na e e faaoaoa te reira ia ’na.

17. Eaha ta Te mau tavana 5:31 e haapii mai ra no nia i te tupu i a muri a‘e?

17 Fatata te mau taata atoa i te fenua nei i te au a‘e i ta Iehova faatereraa i te tahi atu faatereraa. Te tiai ru nei tatou i tera taime! E tuea paha to tatou mana‘o i to Debora raua Baraka o tei himene: “Ia na reira atoa te mau enemi atoa no oe i te pohe, e Iehova e: area te feia i hinaaro ia [oe] ra, ia riro ïa ratou, mai te mahana ia hiti mai to ’na anaana rahi ra!” (Tav. 5:31) E tupu te reira ia faaore Iehova i te ao ino a Satani. Ia haamata te tama‘i o Aramagedo, eita Iehova e titau i te mau rima tauturu a te taata no te haamou i te enemi. “E tia noa mai” râ tatou e e “hi‘o i te ora na Iehova.” (Par. 2, 20:17) A tiai noa ’i, mea rahi ta tatou e nehenehe e rave no te turu i ta Iehova faatereraa ma te itoito rahi.

18. E nafea vetahi ê e faufaahia ’i i ta tatou taviniraa ma te horoaraa ia tatou iho?

18 Ua haamata Debora raua Baraka i ta raua himene upootiaraa ma te arue ia Iehova, eiaha râ i te taata. Ua himene raua: “E haamaitai ia Iehova, . . . i te mea ua horoa noa [te mau taata] ia ratou ihora.” (Tav. 5:1, 2) Hoê â huru, ia tavini tatou ia Iehova i roto i te mau tuhaa atoa e titauhia, e nehenehe atoa vetahi ê e itoitohia no te “haamaitai ia Iehova!”

^ par. 6 E tamauhia te tipi i nia i te mau pereoo tama‘i, peneia‘e i te ropuraa o te mau huira, a riro atu ai teie mau pereoo ei mauhaa taparahi taata.

^ par. 8 E nehenehe outou e ite hau atu â no nia i teie mau tupuraa faahiahia i roto i Te Pare Tiairaa o te 1 no Tetepa 2015, api 12-15.