Te mau tavana 4:1-24
4 I muri iho râ i to Ehuda poheraa, rave faahou aˈera te ati Iseraela i te mea ino i te aro o Iehova.+
2 Tuu atura Iehova ia ratou i te rima o Iabina te arii no Kanaana,+ tei arii na i Hazora. O Sisera te raatira o ta ˈna nuu, tei ora na i Haroseta+ o te mau nunaa.*
3 Tiaoro aˈera te ati Iseraela ia Iehova,+ no te mea e 900 pereoo tamaˈi e ˈoˈe to nia iho i te huira*+ ta Iabina,* e i haavî rahi na oia i te ati Iseraela+ e 20 matahiti.
4 O Debora, e peropheta vahine,+ te vahine faaipoipo a Lapidota, te tavana ra i Iseraela i taua mau mahana ra.
5 I parahi na oia i raro aˈe i te tumu tamara a Debora i ropu ia Rama+ e ia Betela+ i te tuhaa fenua mouˈa o Epheraima, e i pauma na te ati Iseraela ia ˈna ra no te ite i te mau faaotiraa haavaraa a te Atua.
6 Faaue atura oia e tii ia Baraka+ te tamaiti a Abinoama i Kedesa-naphatali+ e parau atura ia ˈna: “Ua faaue Iehova te Atua o Iseraela: ‘A haere* i te mouˈa Tabora, e a rave 10 000 tane o te opu o Naphatali e to Zebuluna na muri ia oe.
7 E faahaere au ia Sisera, te raatira o te nuu a Iabina, ia oe ra, e ta ˈna mau pereoo tamaˈi e ta ˈna mau pǔpǔ faehau i te tahora o Kisona,+ e e tuu vau ia ˈna i to rima.’”+
8 Parau maira Baraka ia ˈna: “Ia haere mai oe na muri ia ˈu, e haere au. Ia ore râ oe ia haere na muri ia ˈu, eita vau e haere.”
9 Parau atura oia: “E haere au na muri ia oe. Tera râ, eita oe e faahanahanahia i teie tere ta oe e haere ra, i te rima hoi o te tahi vahine e tuu ai Iehova ia Sisera.”+ Tia aˈera Debora i nia e haere atura na muri ia Baraka i Kedesa.+
10 Titau atura Baraka te opu o Zebuluna e to Naphatali+ i Kedesa, e pee aˈera 10 000 tane ia ˈna. O Debora atoa tei pauma na muri ia ˈna.
11 Area o Hebere te ati Keni, ua faataa ê ïa ia ˈna i te ati Keni,+ te huaai o Hobaba to Mose metua tane hoovai,+ e ua patiahia to ˈna fare ie i pihai iho i te tumu raau rahi i Zaananima i Kedesa.
12 Faaarahia ˈtura ia Sisera e ua pauma Baraka te tamaiti a Abinoama i te mouˈa Tabora.+
13 I reira iho, haaputuputu ihora Sisera pauroa ta ˈna pereoo tamaˈi, e 900 pereoo e ˈoˈe to nia iho i te huira,* e pauroa te pǔpǔ faehau tei na muri ia ˈna, mai Haroseta o te mau nunaa mai no te haere i te tahora o Kisona.+
14 Parau atura Debora ia Baraka: “A tia i nia, teie hoi te mahana e tuu ai Iehova ia Sisera i to rima. Aita anei Iehova e haere nei na mua ia oe?” Pou ihora Baraka mai nia mai i te mouˈa Tabora e na 10 000 tane na muri ia ˈna.
15 Faarapu ihora Iehova+ ia Sisera e pauroa ta ˈna pereoo tamaˈi e pauroa te nuu i mua i te ˈoˈe a Baraka. Pou ihora Sisera mai nia mai i to ˈna pereoo e horo ê atura na raro.
16 Aˈuaˈu atura Baraka i te mau pereoo tamaˈi e te nuu tae roa i Haroseta o te mau nunaa. Pau ihora ïa te nuu taatoa a Sisera i te ˈoˈe, aita hoê i toe.+
17 Horo ê atura râ Sisera i te fare ie o Iaela+ te vahine faaipoipo a Hebere+ te ati Keni, e hau hoi to rotopu ia Iabina+ te arii no Hazora e te utuafare o Hebere te ati Keni.
18 Haere maira Iaela e farerei ia Sisera e parau maira ia ˈna: “A tomo mai, to ˈu fatu, a tomo mai i ǒ nei. Eiaha e mǎtaˈu.” Tomo atura ïa Sisera i roto i to ˈna fare ie, e tapoˈi ihora Iaela i te tahi ahu taoto i nia ia ˈna.
19 Na ô atura Sisera ia ˈna: “A horoa mai na maa pape ia inu vau, te hinaaro ra hoi au e inu.” Tatara ihora Iaela i te tahi pute û,* horoa ˈtura ia ˈna ia inu oia,+ e tapoˈi faahou atura ia ˈna.
20 Parau atura Sisera ia ˈna: “A tia i te tomoraa o te fare ie, e ia haere noa mai te tahi e ani ia oe e tane anei to ǒ nei, a parau aita.”
21 Rave maira râ Iaela te vahine faaipoipo a Hebere i te tahi naero rahi fare ie e te tahi hamara. E a taoto maitai ai Sisera tei rohirohi roa, tapiri omoˈe maira oia ia ˈna e patiti ihora ia ˈna i taua naero rahi ra na te aoao o to ˈna upoo e tae roa i te repo, e pohe ihora Sisera.+
22 Tae atura Baraka i reira a aˈuaˈu ai oia ia Sisera. Haere maira Iaela e farerei ia ˈna e parau maira: “A haere mai, e faaite au ia oe i te tane ta oe e imi nei.” Tomo atura oia i ǒ ˈna e ite atura ia Sisera e tarava ra ua pohe, e te naero rahi fare ie tei pipiha ˈtu na te aoao o to ˈna upoo.
23 Mea na reira to Iabina te arii o Kanaana i te vîraa i tera mahana i te Atua i mua i te ati Iseraela.+
24 Uˈana noa ˈtura te aroraa a te ati Iseraela ia Iabina te arii o Kanaana+ e ia haamou roa ratou ia ˈna.+
Nota i raro i te api
^ Aore ra “Haroseta-ha-guima.”
^ Heb: “pereoo tamaˈi auri.”
^ Heb: “ta ˈna.”
^ Aore ra “A aratai i to oe mau taata.”
^ Aore ra “pereoo tamaˈi auri.”
^ Pute û iri animara.
